សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្លិបអ្នកកាសែតកម្ពុជា (ក.អ.ក) : ករណីឈ្មោះ មូល រតនៈ អាចចាត់ទុកថា ជាលើកទី១ ដែលសមាជិក ក.អ.ក. ត្រូវបានសមត្ថកិច្ចឃាត់ខ្លួនពីបទព្រហ្មទណ្ឌ ដែលល្មើសនឹងវិជ្ជាជីវៈធ្ងន់ធ្ងរ ។ នេះបើយោងតាមសេចក្ដីប្រកាសព័ត៌មាន របស់ក្លិបអ្នកកាសែតកម្ពុជា (ក.អ.ក)។
ក្លិបអ្នកកាសែតកម្ពុជា (ក.អ.ក) មានការភ្ញាក់ផ្អើល និងសោកស្តាយជាខ្លាំងក្រោយពីទទួលបាន ព័ត៌មានថាឈ្មោះ មូល រតនៈ ភេទប្រុស អាយុ ៣០ឆ្នាំ មុខរបរនិពន្ធនាយកកាសែតសេនាបតីញូស៍ និង ជាសមាជិករបស់ក្លិបអ្នកកាសែតកម្ពុជា ត្រូវបានសមត្ថកិច្ចឃាត់ខ្លួនលើបណ្តឹងបទល្មើសព្រហ្មទណ្ឌពីបទ ក្លែងបន្លំធ្វើជាបុគ្គលិករបស់អគ្គនាយកដ្ឋានវិទ្យុ និងទូរទស្សន៍បាយ័ន ដើម្បីជម្រិតទារប្រាក់ពីថ្នាក់ដឹកនាំ តាមអង្គភាពស្ថាប័នរដ្ឋនានា។
ក.អ.ក សូមជម្រាបជូនសាធារណជនថា ជានិច្ចកាល ក.អ.ក តែងតែណែនាំ និងក្រើនរម្លឹកដល់ សមាជិក សមាជិកា ដែលមានចំនួនជាង ៦០០នាក់ឱ្យគោរពនូវក្រមសីលធម៌វិជ្ជាជីវៈ រួមទាំងលក្ខន្តិកៈ និងបទបញ្ជាផ្ទៃក្នុងរបស់ ក.អ.ក ហើយកិច្ចការនេះត្រូវបានរៀបចំធ្វើឡើងដោយផ្ទាល់ឬតាមរយៈការប្រជុំ លោក ខៀវ កូឡា ផ្សព្វផ្សាយ ការបណ្តុះបណ្តាលជាដើម។ ដូច្នេះករណីឈ្មោះ មូល រតនៈ អាចចាត់ទុកថា ជាលើកទី១ ដែលសមាជិក ក.អ.ក. ត្រូវបានសមត្ថកិច្ចឃាត់ខ្លួនពីបទព្រហ្មទណ្ឌ ដែលល្មើសនឹងវិជ្ជាជីវៈធ្ងន់ធ្ងរ។ ក.អ.ក សូមគាំទ្រនូវរាល់ចំណាត់ការរបស់សមត្ថកិច្ចចំពោះអ្នកសារព័ត៌មាន ជាពិសេសសមាជិក ក.អ.ក ដែលត្រូវបានរកឃើញថា ប្រព្រឹត្តល្មើសនឹងវិជ្ជាជីវៈ និងច្បាប់ ។
ក.អ.ក សូមបញ្ជាក់ថា សមាជិកភាពរបស់ឈ្មោះ មូល រតនៈ ត្រូវបានព្យួររួចហើយ ហើយយោង តាមលក្ខន្តិកៈរបស់ ក.អ.ក ប្រសិនបើតុលាការរកឃើញភស្តុតាងបទល្មើសពិតប្រាកដមែន ក.អ.ក នឹង លុបឈ្មោះ មូល រតនៈ ចេញពីសមាជិកភ្លាម។
ក.អ.ក ក៏សូមអំពាវនាវជាថ្មីម្តងទៀតដល់សមាជិក សមាជិកាទាំងអស់ត្រូវបន្តអនុវត្តឲ្យបាន ខ្ជាប់ខ្ជួននូវក្រមសីលធម៌វិជ្ជាជីវៈ ដើម្បីលើកតម្កើងភាពថ្លៃថ្នូរ និងធានាដល់សេរីភាពសារព័ត៌មាន ។
ក.អ.ក សង្ឃឹមថា សមាជិក សមាជិកាទាំងអស់នឹងបន្តដំណើរជាមួយ ក.អ.ក ដើម្បីលើកកម្ពស់ ការអនុវត្តនូវក្រមសីលធម៌ និងវិជ្ជាជីវៈសារព័ត៌មាន សំដៅធ្វើយ៉ាងណាឲ្យស្ថាប័ន ក.អ.ក នៅតែរក្សាបាន នូវកិត្តិយសសេចក្ដីថ្លៃថ្នូរសមជាសមាគមសារព័ត៌មាន ដែលឈានមុខគេនៅកម្ពុជា ៕
ដោយ ៖ សិលា
