សារព័ត៌មាន នគរវត្ត តែងតែនាំមុខគេជានិច្ច
អ្នកចាំទី Thibaut Courtois របស់ក្លិបអធិរាជស Real Madrid បានរងរបួសដាច់សរសៃពួរផ្នែកខាងមុខនៅជង្គង់ខាងឆ្វេងរបស់គាត់ ហើយទំនងជាត្រូវខកខានការបង្ហាញខ្លួនភាគច្រើននៃដើមរដូវកាលនេះ។
កីឡាករអន្តរជាតិបែលហ្សិកវ័យ៣១ឆ្នាំនឹងត្រូវវះកាត់នៅប៉ុន្មានថ្ងៃខាងមុខ។ Courtois ដែលជាប់ឈ្មោះជាអ្នកចាំទីល្អបំផុតក្នុងពិភពលោកក្នុងពានរង្វាន់ Ballon d’Or កាលពីឆ្នាំមុនបានជួយក្រុមឈ្នះ La Liga របស់អេស្ប៉ាញ២ដងចាប់តាំងពីចូលរួមជាមួយ Real Madrid កាលពីឆ្នាំ២០១៨។
គាត់បានបង្ហាញខ្លួនចំនួន២៣០ប្រកួតសម្រាប់ក្រុម Real Madridដែលនឹងលេងជាមួយក្រុម Athletic Bilbao ក្នុងការប្រកួត La Liga ដំបូងនៃរដូវកាលរបស់ក្រុមនៅរាត្រីពីថ្ងៃសៅរ៍ខាងមុខនេះ។
Courtois បានជួយក្រុមឈ្នះ Premier League ២ដងជាមួយ Chelsea មុនពេលផ្លាស់ទៅ Real Madrid ក្នុងឆ្នាំ២០១៨ និង La Liga ម្ដងជាមួយ Atletico Madrid ក្នុងឆ្នាំ២០១៤។ គាត់ក៏បានជួយក្រុមឈ្នះ Champions League នៅឆ្នាំ២០២២ ដោយបានបង្ហាញពីទម្រង់លេងដ៏អស្ចារ្យក្នុងការប្រកួតចុងក្រោយពេលប៉ះជាមួយ Liverpool ៕
ដោយ៖ ភារៈ(រូបភាព ៖ BBC Sport)
