សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មិនដឹងមានវិបត្តិអ្វីនោះទេ បុរសម្នាក់បានមកលោតទឹកពីលើស្ពានច្បារអំពៅមិនលិច តែបានប៉ុន្មាននាទីក្រោយមកមនុស្សលិចទៅបាត់ស្រមោល ដោយគ្មានអ្នកណាជួយទាន់ឡើយ។
ហេតុការណ៍នេះបានកើតឡើងកាលពីវេលាម៉ោង៥និង១០នាទីល្អាចថ្ងៃទី២៤ ខែសីហា ឆ្នាំ២០២៣ ស្ថិតក្នុងសង្កាត់ច្បារអំពៅ១ ខណ្ឌច្បារអំពៅ រាជធានីភ្នំពេញ។
សូមបញ្ជាក់ថា យើងមិនបានទទួលព័ត៌មានច្បាស់ការណ៍ពីអត្តសញ្ញាណរបស់បុរសរងគ្រោះនោះទេ ។
តាមប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនពេលកើតហេតុគេបានឃើញបុរសរងគ្រោះបានដើនៅលើស្ពានច្បារអំពៅ ខណៈដើរដល់ពាក់កណ្តាលស្ពាន ស្រាប់តែជនរងគ្រោះ ធ្វើសកម្មភាពឡើងលើបង្កាន់ដៃស្ពានហើយលោតចុះទៅខាងក្រោមតែម្តង ស្របពេលលោតទៅដល់ផ្ទៃទឹក ជនរងគ្រោះមិនទាន់លិចខ្លួនប្រាណទៅក្នុងទឹកភ្លាមៗនោះទេ ជនរងគ្រោះព្យាយាមហែលទឹកឡើងមកលើគោកវិញ តែមិនបានប៉ុន្មាននាទីផងជនរងគ្រោះបានលិចទៅក្នុងទឹកបាត់ដោយពុំមាននរណាម្នាក់ជួយសង្គ្រោះគាត់បានទាន់ពេលវេលាឡើយ៕
ដោយ ៖ រ៉ារ៉ា
