សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ខណៈចុកសន្លាក់ជេីងខ្លាំងពេកក៏ហៅគ្រូពេទ្យឯកជនមកពិនិត្យ រួចក៏ដាក់សេរ៉ូមអស់២ផ្លោកស្រាប់តែធ្វេីទុក្ខកាន់តែខ្លាំង ហើយភ្លាមៗនោះក្រុមគ្រួសារដឹកយកទៅមន្ទីរពេទ្យ ខណៈទៅដល់មន្ទីរពេទ្យក្រុមគ្រូពេទ្យបញ្ជាក់ប្រាប់ថា ជនរងគ្រោះបានស្លាប់បាត់ទៅហេីយ បង្កការភ្ញាក់ផ្អេីលកាលពីវេលាម៉ោង២រសៀលថ្ងៃទី២២ ខែកញ្ញា ឆ្នាំ២០២៣នៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។
សពជនរងគ្រោះឈ្មោះវ៉ា ចាន់ណា ភេទប្រុស អាយុ៣៧ឆ្នាំ ប្រពន្ធឈ្មោះកែវ សុផល អាយុ៣៧ឆ្នាំ មុខរបរលក់ចង្រឹត ស្នាក់នៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណេីតនៅភូមិតាសិត ឃុំពពេល ស្រុកទ្រាំង ខេត្តតាកែវ។ ចំណែកគ្រូពេទ្យដែលសមត្ថកិច្ចឃាត់ខ្លួនឈ្មោះជា សុវណ្ណដា ភេទប្រុស អាយុ៣៥ឆ្នាំ ស្នាក់នៅភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។
តាមប្រភពព័ត៌មានពីប្រពន្ធជនរងគ្រោះបានឱ្យដឹងថា មុនពេលកេីតហេតុប្តីរបស់គាត់ឈឺសន្លាក់ជេីង ពេលនោះក៏បានហៅគ្រូពេទ្យឯកជនម្នាក់មកពិនិត្យ រួចក៏បានដាក់សេរ៉ូមមួយផ្លោក ពេលអស់មួយផ្លោកហេីយក៏ដាក់បញ្ចូលមួយផ្លោកទៀត បានមួយស្ទុះស្រាប់តែធ្វេីទុក្ខមិនស្រួលខ្លួន ហើយភ្លាមៗនោះក្រុមគ្រួសារក៏ដឹកតាមរថយន្តទៅមន្ទីរពេទ្យសម្ភពនិងព្យាបាលមាតាអូដឹម។ ពេលទៅដល់មន្ទីរពេទ្យក្រុមគ្រូពេទ្យបានបញ្ជាក់ថា ជនរងគ្រោះបានស្លាប់បាត់ទៅហេីយ។
ក្រោយមកក្រុមគ្រួសារក៏ដឹកសពមកតម្កល់ទុកនៅវត្តជម្ពូវ័ននិងរាយការណ៍ទៅសមត្ថកិច្ចដេីម្បីពិនិត្យនិងធ្វើកោសល្យវិច័យ។
បន្ទាប់ពីទទួលបានព័ត៌មាននេះភ្លាមសមត្ថកិច្ចបានឃាត់ខ្លួនគ្រូពេទ្យខាងលេីដេីម្បីសួរនាំ៕
ដោយ៖សុខាសែនជ័យ
