សុំអង្វរប៉ូលិសចរាចរណ៍លើកលែងមិនបានសម្រេច លោតទឹកសម្លាប់ខ្លួន

ចែករំលែក៖

សូមបងប្អូនកុំធ្វើតាម បើខុសហើយទទួលការពិន័យទៅទើបថ្ងៃក្រោយយើងលែងខុសទៀត ហើយប៉ូលិសចរាចរណ៍ក៏លែងចាប់យើងដែរ។
កងកម្លាំងជួយសង្គ្រោះទីក្រុងហូជីមិញ ត្រូវជួយសង្គ្រោះជាបន្ទាន់ បុរសម្នាក់ដែលបានលោតចូលប្រឡាយ Tan Hoa – Lo Gom ធ្វើអត្តឃាត បន្ទាប់ពីគាត់បានអង្វរ សុំឱ្យប៉ូលិសចរាចរណ៍លើកលែងកំហុសវិលត្រឡប់ទៅផ្ទះវិញ ដោយប៉ូលិសមិនអើពើនឹងការបំពាននេះ។
នៅល្ងាចថ្ងៃទី ២ ខែវិច្ឆិកា ប្រភពពីអ្នកយកព័ត៌មានចរាចរណ៍បាននិយាយថា ប៉ូលិសខណ្ឌ ១១ បានរាយការណ៍ទៅប៉ូលិសទីក្រុងហូជីមិញអំពីអ្នកល្មើសច្បាប់ចរាចរណ៍ម្នាក់បានលោតចូលទៅក្នុងប្រឡាយ Tan Hoa – Lo Gom សម្លាប់ខ្លួន។ ទាក់ទិននឹងហេតុការណ៍នេះ មនុស្សជាច្រើនដែលមិនដឹងមូលហេតុជាក់លាក់ បានថតឃ្លីបតាមអំពើចិត្ត ហើយបង្ហោះតាមប្រព័ន្ធអុីនធឺណេត បញ្ចេញមតិបំភ្លៃការណ៍ពិត។
មុននេះ វីដេអូឃ្លីប ជិត៤នាទី ត្រូវបានបង្ហោះលើបណ្តាញអុីនធឺណេត ជាមួយនឹងខ្លឹមសារ បុរសម្នាក់បើករថយន្តសណ្តោង ត្រូវនគរបាលចរាចរណ៍ចាប់ បានអង្វរ ព្រោះគ្មានលុយ ទើបលោតចូលទឹកតែម្តង។
នៅក្នុងវីដេអូឃ្លីបនោះ មានរូបភាពអ្នកជួយសង្គ្រោះ ព្យាយាមនាំបុរសម្នាក់ទៅច្រាំង នៅពេលដែលបុរសម្នាក់នេះស្រែកយំ ហើយមិនសហការ។
នៅមាត់ច្រាំង មនុស្សចង់ដឹងចង់ឃើញជាច្រើនបានឈប់ថតរូបជាមួយទូរស័ព្ទរបស់ពួកគេ។ ឧប្បត្តិហេតុនេះត្រូវបានបង្ខូចទ្រង់ទ្រាយនៅពេលដែលគណនីជាច្រើនបានបញ្ចេញមតិនៅខាងក្រោមឃ្លីបដោយនិយាយថា “ដោយសារតែវាក្រីក្រពេក” “ពិន័យធ្វើអ្វី»។
យោងតាមការបញ្ជាក់ពីប៉ូលិសខណ្ឌ១១ ហេតុការណ៍ក្នុងឃ្លីបនេះបានកើតឡើងនៅវេលាថ្ងៃត្រង់ថ្ងៃទី២៨ តុលា នៅលើផ្លូវ Tan Hoa Kenh ។ នៅពេលនេះកម្លាំងល្បាតនៃក្រុមនគរបាលចរាចរណ៍ និងព័ត៌មាននៃអធិការដ្ឋាននគរបាលខណ្ឌទាំង១១ បានរកឃើញថា រថយន្តកង់៣ របស់លោក វី (អាយុ៥៧ឆ្នាំ) ផ្ទុកទំនិញសំពីងសំពោង ទើបសមត្ថកិច្ចត្រួតពិនិត្យឯកសារ។
លោក វី មិនអាចបង្ហាញការចុះបញ្ជីយានយន្តរបស់គាត់ និងមិនមានប័ណ្ណបើកបរ។ ពេលរៀបចំធ្វើកំណត់ត្រា បុគ្គលនេះបានអង្វរសុំលើកលែងការបំពាននេះ តែប៉ូលិសមិនអើពើ។ ដោយទ្រាំមិនបាន លោក វី បានរត់ទៅលោតទឹកប្រឡាយ Tan Hoa – Lo Gom ធ្វើអត្តឃាត។
នគរបាលចរាចរណ៍ខណ្ឌ១១ ត្រូវហៅក្រុមនគរបាលបង្ការ និងពន្លត់អគ្គិភ័យ មកជួយនាំលោក វី ទៅដល់ច្រាំង។ បន្ទាប់មក លោក វី ត្រូវបានកត់ត្រាពីបទល្មើសចំនួន ៣ គឺ ដឹកទំនិញហួសកំណត់ ពុំមានចុះបញ្ជីយានយន្ត និងមិនមានប័ណ្ណបើកបរ៕ ដោយ៖ ធីរីណា