ខ្សែប្រយុទ្ធនីហ្ស៊េរីយ៉ាទាំងបុរសនិងស្រ្តីឈ្នះពានរង្វាន់កីឡាករឆ្នើមរបស់អាហ្រ្វិក

កីឡាករ Victor Osimhenខ្សែប្រយុទ្ធសញ្ជាតិនីហ្ស៊េរីយ៉ារបស់ក្លិបអ៊ីតាលី Napoliបានជាប់ជាកីឡាករលេងល្អបំផុតបស់ទ្វីបអាហ្រ្វិក (African Footballer of the Year ) ចំណែកីឡាការិនីសញ្ជាតិនីហ្ស៊េរីយ៉ាដូចគ្នា នាង Asisat Oshoala របស់ក្លិបបាល់ទាត់អេស្ប៉ាញBarcelona ក៏បានឈ្នះពានរង្វាន់ឆ្នើមប្រចាំឆ្នាំ២០២៣សម្រាប់បាល់ទាត់ផ្នែកស្ត្រី។

បេក្ខជន៣រូបចុងក្រោយដែលត្រូវបានជ្រើសរើសនោះរួមមានខ្សែប្រយុទ្ធអេហ្ស៊ីប Mohamed Salah របស់ក្លិបហង្សក្រហម Liverpool និងកីឡាករសញ្ជាតិម៉ារ៉ុក Achraf Hakimi របស់ក្លិប Paris St Germain ហើយកីឡាករ Victor Osimhenបានក្លាយទៅជាតារាបាល់ទាត់នីហ្ស៊េរីយ៉ាដំបូងបង្អស់ដែលបានឈ្នះពានរង្វាន់នេះបើគិតចាប់តាំងការឈ្នះពានរង្វាន់របស់កីឡាករ Nwankwo Kanu  នៅក្នុងឆ្នាំ១៩៩៩។

កីឡាករវ័យ២៤ឆ្នាំ Osimhenរកបាន២៦គ្រាប់ក្នុងចំណោម៣២ប្រកួតជួយក្រុមNapoliឈ្នះជើងឯកអ៊ីតាលី SerieAកាលពីរដូវកាលមុន ដែលជាជ័យជម្នះដំបូងក្នុងប្រវត្តិសាស្រ្ត៣៣ឆ្នាំរបស់ក្លិប។

ចំណែកកីឡាការីនីវ័យ២៩ឆ្នាំ​ Asisat Oshoala ឈ្នះជើងឯកកីឡាការីនីឆ្នើមប្រចាំទ្វីបអាហ្រ្វិកនេះជាលើកទី៦ហើយរួមទាំងពានរង្វាន់ក្នុងឆ្នាំ២០២៣។

ខាងក្រោមនេះគឺជាពានរង្វាន់ដែលត្រូវផ្តល់ដោយសហព័ន្ធបាល់ទាត់អាហ្រ្វិកឆ្នាំ 2023៖

កីឡាករឆ្នើមប្រចាំឆ្នាំ (បុរស): Victor Osimhen (Napoli)

កីឡាករឆ្នើមប្រចាំឆ្នាំ (ស្ត្រី)៖ Asisat Oshoala (Barcelona)

គ្រូបង្វឹកឆ្នើមប្រចាំឆ្នាំ (បុរស): Walid Regragui (ម៉ារ៉ុក)

គ្រូបង្វឹកឆ្នើមប្រចាំឆ្នាំ (ស្ត្រី): Desiree Ellis (អាហ្វ្រិកខាងត្បូង)

ជម្រើសជាតិប្រចាំឆ្នាំ (បុរស): ម៉ារ៉ុក

ជម្រើសជាតិប្រចាំឆ្នាំ (ស្ត្រី)៖ នីហ្សេរីយ៉ា

អ្នកចាំទីឆ្នើមប្រចាំឆ្នាំ (បុរស)៖ Yassine Bounou (Al Hilal)

អ្នកចាំទីឆ្នើមប្រចាំឆ្នាំ (ស្ត្រី)៖ Chiamaka Nnadozie (Paris FC)៕

ដោយ៖ ភារៈ