សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ មន្រ្តីកងរាជអាវុធហត្ថក្រចេះម្នាក់បានរងរបួសយ៉ាងធ្ងន់ធ្ងរបញ្ជូនទៅសង្រ្គោះបន្ទាន់នៅមន្ទីរពេទ្យបង្អែកដោយសារបើកបររថយន្តបត់ត្រឡប់ក្រោយត្រូវរថយន្តវ៉េអងបើកបរស្របទិសគ្នាបុកពេញទំហឹងបណ្ដាលឲ្យធ្លាក់ផ្លូវទាំង២។
ហេតុការណ៍គ្រោះថ្នាក់ចរាចរណ៍នេះបានកើតឡើង នៅល្ងាចថ្ងៃទី១៣ ខែធ្នូ ឆ្នាំ២០២៣ លើផ្លូវជាតិលេខ៧ (ក្រចេះ-ស្ទឹងត្រែង) ចន្លោះបង្គោលគីឡូម៉ែត្រលេខ ៤១៣-៤១៤ត្រង់ចំណុចភូមិអូរព្រះ ឃុំអូរកណ្ដៀរសែនជ័យ ស្រុកអូរគ្រៀងសែនជ័យ ខេត្តក្រចេះ។
យោងតាមរបាយការណ៍អាវុធហត្ថស្រុកអូរគ្រៀងសែនជ័យ បញ្ជាក់ឲ្យដឹងថា ករណីគ្រោះថ្នាក់ចរាចរណ៍នេះអ្នកបើកបររថយន្ដកាមរីហើមឈ្មោះ លឹម ធី ភេទប្រុស អាយុ ៤១ឆ្នាំ ជាមន្រ្តីកងរាជអាវុធហត្ថខេត្តក្រចេះទិសដៅពីត្បួងទៅជើង លុះដល់ចំណុចកើតហេតុក៏បានបត់ឆ្វេងត្រឡប់ក្រោយតែក៏ត្រូវរថយន្តម៉ាកវ៉េអងពណ៌ស ពាក់ស្លាកលេខត្បូងឃ្មុំ 3A-1672 សណ្តោងរុឺម៉កពាក់ស្លាកលេខត្បូងឃ្មុំ4A-2969 បើកបរទិសដៅស្របគ្នាបុកចំពីចំហៀងខាងឆ្វេងពេញទំហឹងតែម្ដង ។
ក្រោយកើតហេតុអ្នកបើកបររថយន្តវ៉េអងនោះបានចុះរត់គេចខ្លួនបាត់ភ្លាមៗដែរ។
មន្រ្តីកងរាជអាវុធហត្ថឈ្មោះ លឹម ធី រងរបួសយ៉ាងធ្ងន់ធ្ងរត្រូវបញ្ជូនភ្លាមៗទៅសម្រាកព្យាបាលនៅមន្ទីរពេទ្យបង្អែកខេត្តក្រចេះ។
បច្ចុប្បន្នវត្ថុតាងទាំងពីរសមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកអូរគ្រៀងសែនជ័យបណ្ដោះអាសន្នរង់ចាំដោះស្រាយតាមក្រោយ ៕
ដោយ ៖ ជីវ័ន្ត
