សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលបានធ្វើការឃាត់ខ្លួនជនសង្ស័យម្នាក់ករណីលួចម៉ូតូរបស់អ្នកភូមិ។
សមត្ថកិច្ចនគរបាលក្រុងបានអោយដឹងនារសៀលថ្ងៃទី២២ខែធ្នូឆ្នាំ២០២៣នេះថា ជនសង្ស័យមានឈ្មោះ សំ ដា អាយុ២៣ឆ្នាំជនជាតិខ្មែរ មុខរបរមិនពិតប្រាកដ មានទីលំនៅភូមិអំពុក ឃុំក្រប៉ៅ ស្រុកកំចាយមា ខេត្តព្រៃវែង។
ចំណែកម្ចាស់ម៉ូតូមានឈ្មោះ សំអឿន អ៊ាត ភេទស្រី អាយុ៣៧ ឆ្នាំជនជាតិខ្មែរ មុខរបរលក់ដូរ មានទីលំនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀងដោយ ម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខស្វាយរៀង 1G-5004 ។
ប្រភពបន្តថា កាលពីថ្ងៃទី២០ ខែធ្នូ ឆ្នាំ២០២៣ វេលាម៉ោង ៦និង៣០នាទី ប៉ុស្ដិ៍នគរបាលរដ្ឋបាលបាវិត បានទទួលពាក្យបណ្តឹង០១ច្បាប់ពីឈ្មោះ សំអឿន អ៊ាត បានប្តឹងចោទប្រកាន់ទៅលើជនសង្ស័យ មិនស្គាល់អត្តសញ្ញាណ ពីបទលួចម៉ូតូ០១គ្រឿងម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខស្វាយរៀង 1G-5004 កាលពីវេលាម៉ោង១៧:២០នាទី នាថ្ងៃទី២០ ខែធ្នូ ឆ្នាំ២០២៣ នៅចំណុចផ្លូវលំខាងត្បូងបង្គោលព្រំដែនលេខ ១៧១ ស្ថិតក្នុងបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
ក្រោយពីទទួលបានពាក្យបណ្តឹងរួច សមត្ថកិច្ចបានចុះទៅដល់កន្លែងកើតហេតុធ្វើការស្រាវជ្រាវ លុះរហូតដល់វេលាម៉ោង៧និង១៥នាទីយប់ នាថ្ងៃខែឆ្នាំដដែល សមត្ថកិច្ចក៏ប្រទះឃើញជនសង្ស័យកំពុងជិះម៉ូតូ(ភិនភាគខាងលើ)លើផ្លូវជាតិលេខ១ ក៏បានឃាត់ និងនាំខ្លួនជនសង្ស័យ រួមនឹងវត្ថុតាង មកកាន់ប៉ុស្តិ៍នគរបាលរដ្ឋបាលបាវិត ដើម្បីធ្វើការសាកសួរ ។
ជនសង្ស័យឈ្មោះ សំ ដា បានឆ្លើយសារភាពថា : ខ្លួនពិតជាបានធ្វើសកម្មភាពលួចម៉ូតូ ប្រាកដមែន ។
បច្ចុប្បន្នជនសង្ស័យ សមត្ថកិច្ច នគរបាលក្រុងបាវិតបានកសាងសុំណុំរឿង ចាត់ការបន្ត តាមច្បាប់ ៕
ដោយ៖ សុថាន
