សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ ក្រសួងធនធានទឹក និងឧតុនិយម បានចេញសេចក្តីជូនដំណឹងជាបន្តបន្ទាប់ អំពី ធាតុអាកាស អាកាសធាតុ បញ្ជាក់ពីខ្យល់កន្ត្រាក់ ធ្លាក់ត្រជាក់ រលកសមុទ្រ ដើម្បីអោយប្រជាពលរដ្ឋ មានការប្រុងប្រយ័ត្ន ហើយអាជ្ញាធរ មានវិធានការ អន្តរាគមន៍ជួយប្រជាពលរដ្ឋជាដើម ។
បើមើលរូបក៏ញាក់សាច់ដែរ…អ្នកធ្វើដំណើរតាមម៉ូតូមិនអាចទៅមកបាននោះទេ ឯរថយន្តក៏ទាមទារឱ្យមានការប្រុងប្រយ័ត្នដែរ ដោយសារតែកម្លាំងខ្យល់កួចដីហុយរកមើលអ្វីមិនឃើញ ខណៈខ្យល់កន្ត្រាក់នារដូវរំហើយ ដែលបក់មកពីតំបន់ជួរភ្នំកំចាយរយៈពេលពីរថ្ងៃវាយប្រហារផ្ទះអ្នកស្រុកអស់ជាង៨០០ខ្នង លើឃុំចំនួន៤ ស្ថិតនៅស្រុកព្រៃនប់ នេះបើតាមរបាយការណ៍របស់រដ្ឋបាលស្រុកឱ្យដឹងកាលពីថ្ងៃ២២ ធ្នូ ឆ្នាំ២០២៣ កន្លងមក។ ក្នុងឃើញ សមត្ថកិច្ច អាជ្ញាធរ ចេញអន្តរាគមន៍ ជួយ និងសម្រួលចរាចរណ៍ ផ្តល់ការណែនាំ បើកបរក្នុងការប្រុងប្រយ័ត្ន។
របាយការណ៍បានបន្ថែមថា នៅក្នុងប្រតិបត្តិការនេះ គណៈបញ្ជាការឯកភាពរដ្ឋបាលស្រុក បានប្រើប្រាស់កម្លាំងសរុប១៦២នាក់ សម្រាប់ជួយសង្គ្រោះ និងជំលៀសប្រជាពលរដ្ឋចេញពីទីតាំងរងហានិភ័យ ប្រឈមនឹងគ្រោះថ្នាក់មកកាន់ទីកន្លែងដែលមានសុវត្ថិភាព និងបានជួយសម្រួលចរាចរណ៍តាមបណ្ដោយផ្លូវជាតិលេខ៣ផងដែរ ។ តាមព័ត៌មានថា ឃុំខ្លះខ្យល់មានស្ថានភាពខ្លាំងជាងថ្ងៃទី១ទៅទៀត ហើយក៏មានការខូចខាតបន្ត តែមិនទាន់ទទួលព័ត៌មានបន្ថែមនៅឡើយទេ ។
សូមបញ្ជាក់ថា៖ ក្រសួងធនធានទឹក និងឧតុនិយម សូមគោរពជម្រាបជូនអំពីស្ថានភាពធាតុអាកាសនៅព្រះរាជាណាចក្រកម្ពុជាសម្រាប់ថ្ងៃទី២៤ ខែធ្នូ ឆ្នាំ២០២៣ បានបញ្ជាក់អោយដឹងថា ៖
ប្រព័ន្ធសម្ពាធខ្ពស់នៅលើប្រទេសចិននៅតែបន្តបង្កើនឥទ្ធិពលគ្របដណ្តប់លើប្រទេសកម្ពុជា ជាមួយនឹងខ្យល់មូសុងឦសានបក់ពីបង្គួរទៅខ្លាំង។
ស្ថានភាពបែបនេះនឹងធ្វើឱ្យ៖ ចាប់ពីថ្ងៃទី២៤ ដល់ថ្ងៃទី២៦ ខែធ្នូ ឆ្នាំ២០២៣ ធាតុអាកាសបន្តចុះត្រជាក់នៅពេលព្រឹក៖
១-តំបន់វាលទំនាប ៖
⁃ សីតុណ្ហភាពអប្បបរមាពី១៦-២២°C និងសីតុណ្ហភាពអតិបរមាពី២៦-២៨°C ហើយខ្យល់បក់មកពីទិសឦសាន ក្នុងល្បឿនពី៥-៧ម៉ែត្រ/វិនាទី
⁃ខេត្តប៉ៃលិន បន្ទាយមានជ័យ បាត់ដំបង និងខេត្តសៀមរាប សីតុណ្ហភាពអប្បបរមាពី១៦-១៨°C។
២-តំបន់ខ្ពង់រាប ៖
⁃ សីតុណ្ហភាពអប្បបរមាពី១៦-២២°C និងសីតុណ្ហភាពអតិបរមាពី២៦-២៨°C ហើយខ្យល់បក់មកពីទិសឦសាន ក្នុងល្បឿនពី៥-៧ម៉ែត្រ/វិនាទី
⁃ ខេត្តឧត្តរមានជ័យ មណ្ឌលគិរី ព្រះវិហារ និងខេត្តរតនគិរី សីតុណ្ហភាពអប្បបរមាពី១៦-១៨°C។
៣-តំបន់មាត់សមុទ្រ ៖
⁃ សីតុណ្ហភាពអប្បបរមាពី២១-២៣°C និងសីតុណ្ហភាពអតិបរមាពី២៧-២៩°C ហើយខ្យល់បក់មកពីទិសឦសានក្នុងល្បឿនពី៦-៨ម៉ែត្រ/វិនាទី
⁃ រលកសមុទ្រមានកម្ពស់ពី១,២៥-២,០០ម៉ែត្រ។
អាស្រ័យពីស្ថានភាពធាតុអាកាសដូចបានជម្រាបជូនខាងលើ សូមសាធារណជនជ្រាបជាព័ត៌មាន និងប្រុងប្រយ័ត្ន ថែរក្សាសុខភាព ស្លៀកសម្លៀកបំពាក់ឱ្យបានគត់មត់ ដើម្បីបង្ការពីជំងឺដង្កាត់នានា ដែលអាចកើតមានឡើងជាយថាហេតុ៕
ដោយ ៖ សហការី
