សារព័ត៌មាន នគរវត្ត តែងតែនាំមុខគេជានិច្ច
ក្លិបអធិរាជស Real Madrid បានវ៉ាដាច់ Manchester City ក្លាយជាក្លិបបាល់ទាត់ដែលរកចំណូលបានច្រើនជាងគេ។ នេះបើយោងតាមការវិភាគដោយ Deloitte Money League។ Real រកចំណូលបានច្រើនបំផុត៨៣១លានអឺរ៉ូ ដើម្បីឈរលើកំពូលតារាងនៃការសិក្សា Money League ពីរដូវកាល២០២២–២០២៣។
Man City ធ្លាក់មកលេខ២បើទោះបីជាមានកំណត់ត្រាប្រាក់ចំណូល៨២៦លានអឺរ៉ូ ដែលក្លិបបានឈ្នះពាន FA Cup, Premier League និង Champions League Treble។ ប្រាក់ចំណូលសម្រាប់ក្លិបកំពូលទាំង២០បានកើនឡើង១៤% ដល់កំណត់ត្រា១០.៥ពាន់លានអឺរ៉ូដែលរាប់បញ្ចូលទាំងប្រាក់ចំណូលពាណិជ្ជកម្ម និងថ្ងៃប្រកួតចំនួន៤.៤ពាន់លានអឺរ៉ូ និង១.៩ពាន់លានអឺរ៉ូរៀងគ្នា។
ប្រាក់ចំណូលពាណិជ្ជកម្មបានវ៉ាដាច់ប្រាក់ចំណូលផ្សេងៗជាលើកដំបូងចាប់តាំងពីឆ្នាំ២០១៥–២០១៦ ដោយមិនរាប់បញ្ចូលការប៉ះពាល់ដោយសារCovid-19 ដល់រដូវកាល២០១៩–២០២០ ដោយមានក្លិបចំនួន១៧ក្នុងចំណោមក្លិបកំពូលទាំង២០បានរាយការណ៍ពីការកើនឡើងពីមួយឆ្នាំទៅមួយឆ្នាំ។
នោះភាគច្រើនធ្លាក់ទៅលើការលក់រាយ ព្រឹត្តិការណ៍ដែលមិនមែនជាថ្ងៃប្រកួត ដូចជាការប្រគុំតន្ត្រី និងការស្ដារឡើងវិញនៃប្រាក់ចំណូលឧបត្ថម្ភដែលត្រូវបានរងផលប៉ះពាល់ដោយជំងឺរាតត្បាត ដែលបង្ហាញថា ក្លិបកំពុងស្វែងរកប្រភពចំណូលជំនួស ដើម្បីក្លាយជាមិនសូវពឹងផ្អែកលើកិច្ចព្រមព្រៀងផ្សាយ។
ប្រាក់ចំណូលនៃការផ្សាយបានកើនឡើងត្រឹមតែ៥% ដល់៤.២ពាន់លានអឺរ៉ូ ដែលភាគច្រើនដោយសារតែរដូវកាល២០២២–២០២៣ ធ្លាក់ចុះនៅក្នុងវដ្តនៃការផ្សាយក្នុងស្រុកដែលមានស្រាប់។ ជាមធ្យមក្លិបទាំង២០ទទួលបានប្រាក់ចំណូលជាមធ្យមលើសពី៥០០លានអឺរ៉ូ។
Real Madrid ឈរនៅលើកំពូលតារាងជាលើកដំបូងចាប់តាំងពីឆ្នាំ២០១៧–២០១៨ ទោះបីជាចាញ់ Manchester City ក្នុងវគ្គពាក់កណ្តាលផ្តាច់ព្រ័ត្រ Champions League និងបញ្ចប់ទី២តាមពីក្រោយ Barcelona ក្នុង La Liga ទោះបីជាពួកគេបានឈ្នះ Copa del Rey, Uefa Super Cup និង FIFA Club World ពែង។ Paris Saint-Germain (៨០២លានអឺរ៉ូ), Barcelona (៨០០លានអឺរ៉ូ) និង Manchester United (៧៤៦ លានអឺរ៉ូ) បញ្ចប់កំពូលទាំង៥។
Liverpool គឺជាក្រុមដែលធ្លាក់ពីលេខ៣មកលេខ៧ជាមួយនឹងប្រាក់ចំណូល៦៨៣លានអឺរ៉ូ បន្ទាប់ពីពួកគេអាចបញ្ចប់ត្រឹមលេខ៥ក្នុង Premier League ហើយត្រូវបានធ្លាក់ចេញពី Champions League នៅវគ្គ១៦ក្រុមចុងក្រោយ។ Tottenham, Chelsea និង Arsenal ក៏ជាប់ចំណាត់ថ្នាក់កំពូលទាំង១០ដោយ Newcastle និង West Ham លេខ១៧និង១៨រៀងគ្នា។
Leicester City, Leeds United និង Everton បានធ្លាក់ចេញពីក្រុមកំពូលទាំង២០ដែលមានន័យថាចំនួនក្លិបនៅ Premier League ធ្លាក់ចុះមកត្រឹម៨បន្ទាប់ពីយ៉ាងហោចណាស់មានក្លិបចំនួន១០ក្នុងរយៈពេលពីរឆ្នាំចុងក្រោយនេះ។ ក្រុម West Ham, Liverpool និង Atletico Madrid គឺជាក្រុមតែមួយគត់នៅក្នុងក្រុមកំពូលទាំង២០ដែលរាយការណ៍ពីការធ្លាក់ចុះនៃប្រាក់ចំណូល៕
ដោយ៖ ភារៈ(រូបភាព ៖ BBC Sport)
