សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានអញ្ចឹងដែរ លែងសង្សារ៤នាក់ ..! ហើយយកអ្នកថ្មី នាងស្រឡាញ់គេណាស់ បាត់មុខមិនបាន ចុងក្រោយបែរជាគេមានថ្មី…នាងចង់ស្លាប់ ! ឱជីវិតក្មេងសម័យបច្ចេកវិទ្យា ស្នេហាទំនើបៗម្លេះ ?
សូមបញ្ជាក់ថា ៖ នារីវ័យក្មេងម្នាក់ បានធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វាដើម្បីបញ្ជាក់ពីចិត្តស្មោះ និងមិនចង់ឈឺចាប់ព្រោះតែឃើញបុរសដែលខ្លួនស្រឡាញ់ស្ទើរលេប ទៅមានស្រីថ្មីនៅនឹងមុខនោះ ។
ការប៉ងសម្លាប់ខ្លួន គឺកើតឡើងកាលពីវេលាម៉ោងប្រមាណ៣រំលងអធ្រាត្រឈានចូលថ្ងៃទី៣ ខែកុម្ភៈ ឆ្នាំ២០២៤កន្លងទៅ តែពុំបានសម្រេចទេដោយសារអ្នកដំណើរនាំគ្នាឃាត់ទាន់ ។
នារីរូបនេះត្រូវបានគេស្គាល់ថាឈ្មោះ យ៉ា អាយុ១៨ឆ្នាំ ជាអ្នករត់តុក្នុងហាងមួយ មានស្រុកកំណើតនៅខេត្តពោធិ៍សាត់ ។ នៅពេលសាកសួរ នាងបាននិយាយទាំងយំយែកថា មូលហេតុ ដែលធ្វើឱ្យនាងមកប៉ងលោតទឹកសម្លាប់ខ្លួន គឺដើម្បីបញ្ជាក់ពីចិត្តស្មោះនិងក្តីស្រឡាញ់ ដែលនាងស្រឡាញ់បុរសម្នាក់ខ្លាំងណាស់ តែបុរសនោះបែរជាបែកចិត្តពីនាងទៅមានស្រីថ្មី ។
នាងបានរៀបរាប់ទាំងទឹកភ្នែកថា នាងស្រឡាញ់បុរសម្នាក់ឈ្មោះ ឆេង ហ័ង រយៈពេល១ឆ្នាំមកហើយ និងបានរស់នៅជាមួយគ្នាដូចប្តី-ប្រពន្ធ តែបុរសរូបនេះបែរជាមានស្រីថ្មី ។ នៅមុនពេលមកលោតទឹក នាងបានឮសង្សារនិយាយប្រាប់មិត្តភ័ក្តិគេថា ខ្លួនបានអស់ចិត្តពីនាងបន្តិចម្តងៗហើយ ។ នៅពេលឮបែបនេះភ្លាម នាងក៏បានចេញពីផ្ទះមកលោតទឹកប៉ងសម្លាប់ខ្លួនតែម្តងព្រោះតែបុរសដែលនាងស្រឡាញ់ស្ទើរលេប គេលែងស្រឡាញ់នាងទៀតហើយ ។
នាង យ៉ា និយាយទៀតថា ៖ នាងស្រឡាញ់បុរសម្នាក់នោះខ្លាំងណាស់ ស្រឡាញ់ជាងឪពុកម្តាយនាងទៅទៀត ។ កាលពីមិនទាន់ស្គាល់មនុស្សប្រុសម្នាក់ហ្នឹង នាងមានសង្សារ៤នាក់ក្នុងពេលតែមួយ តែដល់បានស្គាល់បុរសចុងក្រោយនេះ នាងក៏សុំបែកសង្សារមុនទាំងអស់ ដោយគ្មានអាឡោះអាល័យ រឿងអីចុងក្រោយ ស្រឡាញ់តែប្រុសបងម្នាក់សោះ បែជាបងមានអ្នកថ្មី អូនលែងចង់រស់ទៀតហើយចឹង ។
នាងនិយាយថា ៖ «ខ្ញុំចង់ស្លាប់ទៅស្រួលជាងមិនចង់ឈឺចាប់ មើលឃើញមនុស្សដែលខ្លួនស្រឡាញ់មានស្រីថ្មីនៅនឹងមុខនោះទេ» ។ បន្ទាប់ពីឃាត់សាកសួរនិងធ្វើការអប់រំមក នាងក៏លែងចង់ស្លាប់ទៀត ហើយធ្វើដំណើរត្រឡប់ទៅវិញបាត់ទៅ ។
កាយវិការនារីបរាជ័យស្នេហារូបនេះ ត្រូវបានអ្នកបញ្ចេញមតិតាមបណ្តាញសង្គមថ្កោលទោស ខណៈដែលនាងថា ស្រឡាញ់បុរសរូបនេះខ្លាំងណាស់ខ្លាំងជាងឪពុកម្តាយទៅទៀត ។ ពុទ្ធោអើយ ហេតុអ្វីបានជានាងនិយាយភាសាលាមកបែបនេះ ?
សូមរម្លឹកថា ៖ មេត្តាសុភាពបុរស នារី បង្កើតស្នេហា ដោយបញ្ញា មិនមែនជាឆាកល្ខោនទេ ស្រឡាញ់ហើយ ស្មោះហើយ ដាក់ទុករស់នៅជាមួយគ្នាហើយ គឺកាន់ដៃគ្នា១ជីវិត។ កុំអោយសង្គមស្តីបន្ទោស កុំបំពាន ប្រពៃណីជាតិ ត្រូវដើរតាមគន្លងធម៌ ឪពុកម្តាយ ដើម្បី ឱ្យជីវិតយើងជួបសេចក្តីផូផង់ ជាគូគាប់ពេញមួយជីវិត ៕
ដោយ ៖ សិលា
