សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ យោងតាមរបាយការណ៍របស់មន្ត្រីនគរបាលចរាចរណ៍នៃស្នងការដ្ឋានខេត្តបានឱ្យដឹងថា÷ កាលពីវេលាម៉ោង២០ និង៤៧នាទីថ្ងៃទី១២ ខែកុម្ភៈ ឆ្នាំ២០២៤មានករណីគ្រោះថ្នាក់ចរាចរណ៍ ដោយម៉ូតូពីរគ្រឿងបុកគ្នានៅចំណុចផ្លូវបំបែកជាបួនជិតការាសសាំងមានមាន ស្ថិតនៅភូមិប៉ាហុីជើង សង្កាត់ប៉ៃលិន ក្រុង/ខេត្តប៉ៃលិន បណ្ដាលឱ្យមានមនុស្សរងរបួសចំនួន០២នាក់ ក្នុងនោះ របួសស្រាលម្នាក់ និងរបួសធ្ងន់ម្នាក់ ខូចខាតម៉ូតូចំនួន០២គ្រឿងកម្រិតធ្ងន់។
សមត្ថកិច្ចជំនាញបានបន្តថា ភាគីម៉ូតូបង្កឈ្មោះ ហ៊ុត វណ្ណនី ភេទប្រុស អាយុ៣៦ឆ្នាំ នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន មុខរបររត់ម៉ូតូឌុប របួសបាក់ស្មងជើងខាងស្ដាំ បើកបរម៉ូតូម៉ាកឌ្រីម ពណ៌ខ្មៅ ផលិតឆ្នាំ2015 ពាក់ផ្លាកលេខ ភ្នំពេញ 1FI-4357 ខូចខាតកម្រិតធ្ងន់ បើកក្នុងទិសដៅពីជើងទៅត្បូងហើយបត់ឆ្វេងត្រូវម៉ូតូសិស្សបើកលឿនពីទិសខាងត្បូង
ទៅទិសខាងជើងបុកតែម្ដង។
ភាគីម៉ូតូរងគ្រោះអ្នកបើកបរឈ្មោះ សំ ចន្ថា ភេទប្រុស អាយុ១៨ឆ្នាំ នៅភូមិសួនអំពៅកើត សង្កាត់ប៉ៃលិន ក្រុងប៉ៃលិន មុខរបរសិស្ស របួសស្រាល (រលាត់ក្បាលជង្គង់ខាងស្ដាំ) បើកបរម៉ូតូម៉ាកឌ្រីម ឆ្នាំ2019 ពណ៌ខ្មៅ ពាក់ផ្លាកលេខ ប៉ៃលិន 1C-7719 ខូចខាតកម្រិតធ្ងន់ (បើកបរល្បឿនលឿន)។
កត្តាបង្កឱ្យមានគ្រោះថ្នាក់បណ្ដាលមកពីបើកបរមិនប្រកាន់ស្តាំ ។
ក្រោយពីកើតហេតុម៉ូតូទាំងពីរគ្រឿងត្រូវបានមន្ត្រីនគរបាលជំនាញយកមករក្សាទុកនៅការិយាល័យនគរបាលចរាចរណ៍ រង់ចាំការដោះស្រាយតាមនីតិវិធី៕
ដោយ៖ ស សារ៉េត
