សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានចាប់ផ្ដើមថ្ងៃទី១ នៃការបញ្ចេញរថយន្តក្រុងសាធារណៈដើម្បីដឹកប្រជាពលរដ្ឋចេញពីចំណតគោលដៅវត្តភ្នំតាមតម្រាយផ្លូវឆ្ពោះទៅកាន់ចំណត សកលវិទ្យាល័យជាតិគ្រប់គ្រងសាខាវាលស្បូវដែលមានទីតាំងនៅក្នុងមូលដ្ឋានសង្កាត់វាលស្បូវ ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី ១៦ ខែកុម្ភៈ ឆ្នាំ ២០២៤នេះ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញបានបញ្ជាក់ថា ដោយអនុវត្តន៍តាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងមានការដឹកនាំផ្ទាល់ដោយលោកឃួង ស្រេង អភិបាលនៃគណៈអភិបាលរាជធានីភ្នំពេញអោយរថយន្តក្រុងសាធារណៈរាជធានីភ្នំពេញរៀបចំនៅតម្រាយខ្សែរត់ដើម្បីសម្រួលដល់និស្សិតដែលកំពុងសិក្សានៅសកលវិទ្យាល័យជាតិគ្រប់គ្រងសាខាវាលស្បូវក៏ដូចជាបងប្អូនប្រជាពលរដ្ឋដែលកំពុងរស់នៅក្នុងតំបន់ទីតាំងបុរី ប៉េង ហួត បឹងស្នោអាចទទួលបាននូវសេវារថយន្តក្រុងសាធារណៈរាជធានីភ្នំពេញនេះធ្វើដំណើរបាន ហើយក្នុងនោះដែលអាជ្ញាធរបានប្រើប្រាសតម្រាយផ្លូវចំនួន២ខ្សែសំខាន់ៗ ដោយខ្សែទី១តភ្ជាប់ពីតំបន់ផ្លូវជាតិលេខ១ចូលតំបន់បុរីប៉េងហួត ឆ្លងកាត់ចូលទៅសកលវិទ្យាល័យជាតិគ្រប់គ្រងសាខាវាលស្បូវ រួចត្រឡប់ទៅវិញ ប្រើប្រាស់ផ្លូវតំណភ្ជាប់នៅក្នុងតំបន់អភិវឌ្ឍន៍កោះនរានិងកោះពេជ្រ ឆ្ពោះទៅកាន់ផ្លូវព្រះមុនីវង្សរហូតឈានទៅចំណតចុងក្រោយម្តុំសកលវិទ្យាល័យជាតិគ្រប់គ្រងសាខាវត្តភ្នំ។ ចំណែកខ្សែទី២ តភ្ជាប់ពីចំណតរថយន្តក្រុងកួចកាណុង តាមបណ្តោយផ្លូវព្រះមុនីរ៉េតរហូតដល់តំបន់អភិវឌ្ឍន៍កោះពេជ្រនិងកោះនរា ឆ្លងចូលតាមផ្លូវក្នុងបុរីប៉េង ហួត បឹងស្នោឈានទៅកាន់សកលវិទ្យាល័យជាតិគ្រប់គ្រងសាខាវាលស្បូវវិញ ហើយសម្រាប់ការប្រើប្រាស់រថយន្តក្រុងមានពីរវេន ដោយវេនទី១ចាប់ផ្តើមម៉ោង៥កន្លះព្រឹកក្នុងរយះ១៥នាទីចេញរថយន្ត១គ្រឿង និងវេនទី២ពីថ្ងៃរសៀលរហូតដល់៨កន្លះយប់។លោកបានបញ្ជាក់បន្ថែមតម្រាយផ្លូវ២ខ្សែខាងលើនេះគឺអាចសម្រួលច្រើនដល់បងប្អូនប្រជាពលរដ្ឋធ្វើដំណើរជាពិសេសសិស្សនិស្សិតដែលសិក្សានៅក្នុងសកលវិទ្យាល័យជាតិគ្រប់គ្រងអាចប្រើរថយន្តក្រុងសាធារណៈ។
លោក សាស្ត្រាចារ្យ ហោ ប៉េង សាកលវិទ្យាធិការ នៃសាកលវិទ្យាល័យជាតិគ្រប់គ្រងបានសម្តែងនូវក្តីរីករាយសប្បាយចិត្តនិងសូមថ្លែងអំណរគុណយ៉ាងជ្រាលជ្រៅដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានប្រកាសបើកនូវតម្រាយផ្លូវរថយន្តក្រុងសម្រាប់ជាផលប្រយោជន៍ដល់ប្រជាជននៅក្នុងរាជធានីភ្នំពេញក៏ដូចជាសកលវិទ្យាល័យជាតិគ្រប់គ្រងសាខាវាលស្បូវដែលមានសាស្ត្រចារ្យ សិស្សនិស្សិត មករៀនមានសេវាពេញលេញនិងអរគុណដល់សម្តេចធិបតីដែលបានយកទុកដាក់ដល់យុវជន និស្សិត សាស្ត្រាចារ្យលោកគ្រូ អ្នកគ្រូបុគ្គលិក ក៏ដូចប្រជាពលរដ្ឋអាចធ្វើដំណើរតាមតម្រាយផ្លូវទាំងនេះបាន។
និស្សិតដែលសិក្សានៅសកលវិទ្យាល័យជាតិគ្រប់គ្រងបានសម្តែងក្តីរីករាយជាខ្លាំងហេីយបានលេីកឡើងថា កន្លងមកពេលធ្វេីដំណេីរទៅសាលាម្តងៗពួកគេមានការលំបាកខ្លាចតែជួបគ្រោះថ្នាក់ជាយថាហេតុហេីយចំណាយថវិកានិងពេលវេលាច្រេីន ពេលនេះក្រោយសម្តេចមហាធិបតីផ្តល់នូវសេវារថយន្តក្រុងសាធារណះធ្វេីដំណេីរមកដល់សកលវិទ្យាល័យជាតិគ្រប់គ្រងសាខាវាលស្បូវ ពិតជួយសម្រួលច្រេីនណាស់ដល់ពួកគាត់ ដោយសារជិះរថយន្តក្រុងមិនអស់ប្រាក់ ហេីយមានសុវត្ថិភាពនិងអាចមានពេលអានសៀវភៅរំលឹកមេរៀននៅក្នុងរថយន្តពេលកំពុងធ្វេីដំណេីរតាមផ្លូវបាន ពួកគេពិតជាមានចិត្តសោមនស្សរីករាយយ៉ាងខ្លាំងនិងសូមគោរពថ្លែងអំណរគុណយ៉ាងជ្រាលជ្រៅដល់សម្តេចមហាបវរធិបតី និងអាជ្ញាធរពាក់ព័ន្ធទាំងអស់៕
ដោយ៖ សំរិត
