សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មន្ត្រីជំនាញ នៃមនី្ទរសុខាភិបាលរាជធានីភ្នំពេញ បានសហការជាមួយកងទ័ពអង្គភាព «ង៧០» ចុះបាញ់ថ្នាំសម្លាប់មូសរួចរាល់ សង្កាត់ចំនួន៩១ ក្នុងចំណោមសង្កាត់១០៥ នៃរដ្ឋបាលខណ្ឌទាំង១៤ នៅមូលដ្ឋានរាជធានីភ្នំពេញ។ នេះបេីយោងតាមការបញ្ជាក់ពីប្រធានមនី្ទរសុខាភិបាលរាជធានីភ្នំពេញ លោកវេជ្ជបណ្ឌិត ងី មានហេង បានថ្លែងឱ្យដឹងនៅថ្ងៃទី០៩ ខែមីនា ឆ្នាំ២០២៤។
ជាក់ស្ដែងលោកប្រធានមន្ទីរូបនេះ ថ្លែងបន្តថា សកម្មភាពខាងលើនេះ គឺឯកឧត្តម ឃួង ស្រេង អភិបាលរាជធានីភ្នំពេញបានណែនាំ មន្ទីរសុខាភិបាល និងការិយាល័យសុខាភិបាលស្រុកប្រតិបត្តិទាំង៧ សហការជាមួយកងទ័ពអង្គភាព «ង៧០» និងរដ្ឋបាលខណ្ឌទាំង១៤ បានចុះបាញ់ថ្នាំសម្លាប់មូស នៅតាមសង្កាត់ទាំង១០៥ ក្នុងភូមិសាស្ត្ររាជធានីភ្នំពេញ ចាប់ពីថ្ងៃទី២៣ ខែកុម្ភៈ ២០២៤ ដល់ថ្ងៃទី១៣ ខែមីនា ឆ្នាំ២០២៤។ ដោយឡែកនៅព្រលប់ថ្ងៃទី០៨ ខែមីនា ឆ្នាំ២០២៤ ក្រុមការងារបានចុះបាញ់ថ្នាំសម្លាប់មូស នៅសង្កាត់មនោរម្យ វាលវង់ អូរឬស្សីទី១ ទី២ និងទី៣ និងទួលទំពូងទី១។ គិតត្រឹមយប់ថ្ងៃទី០៨ ខែមីនា ឆ្នាំ២០២៤ដដែរនេះ ក្រុមការងារបានបាញ់ថ្នាំនៅតាមសង្តាត់ចំនួន៩១សង្កាត់ ដែលស្តិតនៅក្នុងខណ្ឌចំនួន១៣។ យើងបានបញ្ចប់ការបាញ់ថ្នាំសម្លាប់មូសនៅខណ្ឌចំនួន៩ រួមមានខណ្ឌសែនសុខ, ខណ្ឌពោធិ៍សែនជ័យ, ខណ្ឌមានជ័យ, ខណ្ឌដង្កោ, ខណ្ឌទួលគោក, ខណ្ឌព្រែកព្នៅ, ខណ្ឌបឹងកេងកង, ខណ្ឌដូនពេញ និងខណ្ឌជ្រោយចង្វារ។
ជាមួយគ្នានេះលោកវេជ្ជបណ្ឌិត ងី មានហេង ក៏សូមអំពាវនាវប្រជាពលរដ្ឋរស់នៅរាជធានីភ្នំពេញចូលរួមលុបបំបាត់ជម្រកមូសខ្លា។ ទឹកដក់ជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀង ជាជម្រកមូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៏របស់យើង ដើម្បីរួមចំណែកទប់ស្កាត់ការចម្លងជំងឺគ្រុនឈាម។ មូសខ្លាជាភ្នាក់ងារចំលងជំងឺគ្រុនឈាម រីឯមូសអង្កាមមិនមែនជាភ្នាក់ងារចម្លងជំងឺគ្រុនឈាមទេ។ គ្មានជម្រកមូសខ្លា គ្មានការចំលងជំងឺគ្រុនឈាម៕
ដោយ៖ តារា
