សារព័ត៌មាន នគរវត្ត តែងតែនាំមុខគេជានិច្ច
ប៉ូលិស Greater Manchester បានចាប់ខ្លួនមនុស្សម្នាក់ បន្ទាប់ពីមានការចោទប្រកាន់ថា បានស្រែកជេរប្រមាថក្នុងអំឡុងពេលការប្រកួត FA Cup វគ្គ១/៤ផ្តាច់ព្រ័ត្ររវាងក្រុមបិសាចក្រហម Manchester United នឹងក្រុមហង្សក្រហម Liverpool។
បទចម្រៀងប្រមាថពីការរើសអើងត្រូវបានគេចោទថា បានឮអំឡុងពេល Man Utd ឈ្នះក្នុងម៉ោងបន្ថែម ៤–៣ លើគូប្រជែងរបស់ពួកគេនៅ Old Trafford កាលពីថ្ងៃអាទិត្យ។
ប៉ូលិសបាននិយាយថា “យើងទាំងអស់គ្នាធ្លាប់ស្គាល់អ្នកគាំទ្រដែលតិះដៀលគូប្រជែងរបស់ពួកគេ ប៉ុន្តែជាទូទៅនេះត្រូវបានធ្វើដោយស្មើភាព និងគ្មានការប្រមាថ។ ឧប្បត្តិហេតុថ្ងៃនេះបានឆ្លងកាត់នូវបន្ទាត់នៃអ្វីដែលមិនអាចទទួលយកបាន” ។
សេចក្តីថ្លែងការណ៍មួយបានឲ្យដឹងថា “ឧប្បត្តិហេតុនៃការស្រែកប្រមាថនឹងមិនត្រូវបានអត់ឱនទេ ហើយនឹងត្រូវបានដោះស្រាយយ៉ាងតម្លាភាព។ យើងនឹងធ្វើការយ៉ាងជិតស្និទ្ធជាមួយក្លិបទាំងពីរដើម្បីកំណត់អត្តសញ្ញាណនរណាម្នាក់ដែលទទួលខុសត្រូវចំពោះការប្រព្រឹត្តបទល្មើសក្នុងអំឡុងពេលព្រឹត្តិការណ៍” ។
ជាមួយគ្នានេះស្ថាប័នបាល់ទាត់អង់គ្លេស FA ក៏បានថ្កោលទោសយ៉ាងខ្លាំងនូវការស្រែកជេរប្រមាថ បំពាន និងការរើសអើងណាមួយនៅក្នុងកីឡដ្ឋានបាល់ទាត់ ហើយអះអាងថា ខ្លួននឹងទាក់ទងជាមួយប៉ូលិស Greater Manchester។ ស្ថាប័នមួយនេះបានបន្ថែមថា “យើងប្តេជ្ញាចិត្តដើម្បីលុបបំបាត់អាកប្បកិរិយានេះ។ វាមិនអាចទទួលយកបានទាំងស្រុង ហើយអាចមានផលប៉ះពាល់យូរអង្វែង និងខូចខាតដល់មនុស្ស និងសហគមន៍នៅក្នុងហ្គេមរបស់យើង។ យើងត្រូវតែបញ្ឈប់ ហើយយើងគាំទ្រក្លិបណាមួយ និងអ្នកគាំទ្ររបស់ពួកគេដែលព្យាយាមលុបបំបាត់ចេញពីវិស័យបាល់ទាត់ទាំងមូល“ ៕
ដោយ៖ ភារៈ(រូបភាព ៖ BBC Sport)
