សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានរថយន្តកាមរីបាឡែនមួយគ្រឿង ដែលបេីកបរដោយបុរសម្នាក់ធ្វេីដំណេីរក្នុងល្បឿនលឿននិងខ្វះការប្រុងប្រយ័ត្នបានរេចង្កូតទៅបុករបាំងថ្មពុះចែកទ្រូងផ្លូវបាក់មួយកង់និងធ្វេីឱ្យរថយន្តបង្កក្រឡាប់ផ្ងារជើងរងការខូចខាតយ៉ាងដំណំ បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង១០និង៤០នាទីយប់ថ្ងៃទី២៥ ខែមីនា ឆ្នាំ២០២៤ នៅចំណុចក្បែរស្ពានកោះនរា ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តបង្កម៉ាកកាមរីបាឡែន ពណ៌ទឹកប្រាក់មួយគ្រឿង ពាក់ផ្លាកលេខ កោះកុង 2A-1888 ដែលបេីកបរដោយបុរសម្នាក់ធ្វើដំណើរចុះពីលើស្ពានកោះនរាក្នុងទិសដៅពីលិចមកកើតដោយល្បឿនយ៉ាងលឿន ។ លុះមកដល់ចំណុចកើតហេតុស្រាប់តែរេចង្កូតទៅខាងឆ្វេងដៃជ្រុលទៅបុករបាំងថ្មពុះចែកទ្រូងផ្លូវចំពាក់កណ្តាលពេញទំហឹងបណ្តាលឲ្យរបាំងថ្មបាក់អស់ចំនួន០១កង់ រីឯរថយន្តបង្កបានក្រឡាប់ផ្ងារជើងរងការខូចខាតយ៉ាងដំណំតែម្ដង និងភ្លាមៗនោះត្រូវបានបងប្អូនប្រជាពលរដ្ឋជួយលើកឱ្យផ្កាប់ដូចដើមវិញ ដោយមិនបង្កឲ្យមានមនុស្សរងគ្រោះថ្នាក់ឡេីយ ។
ក្រោយកើតហេតុ សមត្ថកិច្ចមូលដ្ឋានសហការជាមួយនឹងជំនាញចរាចរណ៍ចុះមកដល់វាស់វែងស្ទូចយករថយន្តបង្កទៅរក្សាទុកនៅអធិការដ្ឋាននគរបាលខណ្ឌច្បារអំពៅរង់ចាំការដោះស្រាយគ្នាតាមនីតិវិធី ៕
ដោយ ៖ ភារ៉ា ដង្កោ
