សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់ត្រូវបានសមត្ថកិច្ចឃាត់ខ្លួនក្នុងករណីហិង្សាធ្វើអោយមានរបួសស្នាមនៅការដ្ឋានសំណង់មួយកន្លែងជាប់ព្រំដែនកម្ពុជាវៀតណាម មានកម្មករឈ្លោះគ្នាបង្កជាហិង្សាធ្វើអោយមានរបួសស្នាម នៅស្រុកចន្ទ្រា។
ហេតុការណ៍នេះបានកើតឡើងនៅវេលាម៉ោង៧និង១០នាទីយប់ ថ្ងៃទី០៤ ខែឧសភា ឆ្នាំ២០២៤ ស្ថិតនៅភូមិចេក ឃុំទួលស្ដី ស្រុកចន្ទ្រា ខេត្តស្វាយរៀង។
យោងតាមសមត្ថកិច្ចនគរបាលស្រុកបានអោយដឹងថាជនសង្ស័យមានឈ្មោះ ចិន វាស្នា អាយុ៣៣ឆ្នាំ មុខរបរកម្មករសំណង់ មានទីលំនៅភូមិចេក ឃុំទួលស្ដី ស្រុកចន្ទ្រា ខេត្តស្វាយរៀង។
ចំណែកជនរងគ្រោះមានឈ្មោះ តុញ ផល អាយុ៣៤ឆ្នាំ មុខរបរកម្មករសំណង់ មានទីលំនៅភូមិត្រពាំងថ្ម ឃុំល្បេីក ស្រុកឈូក ខេត្តកំពត បណ្ដាលអោយរងរបួសធ្ងន់ ។
ប្រភពបន្តថា ក្រោយពីទទួលព័ត៌មានភ្លាម កម្លាំងសមត្ថកិច្ចបានចុះទៅដល់កន្លែងកើតហេតុ និងធ្វេីការស្រាវជ្រាវរកជនបង្ក និងឃាត់ខ្លួនមកសាកសួរ។
នៅចំពោះមុខសមត្ថកិច្ច ប្រពន្ធជនរងគ្រោះឈ្មោះ អឿង ណាច បានប្រាប់ថា ប្ដីរបស់ខ្លួនឈ្មោះ តុញ ផល និង ឈ្មោះ ចិន វាស្នា បានផឹកស្រាតាំងពីថ្ងៃ(តែមិនមែនផឹកជាមួយគ្នាទេ) ដល់វេលាម៉ោងប្រហែល១៦ នាថ្ងៃខែឆ្នាំដដែល ប្ដីរបស់ខ្លួន និង ឈ្មោះ ចិន វាស្នា ក៏បានជួបមុខគ្នា ហើយបានឈ្លោះប្រកែកពាក្យសម្ដីនិងគ្នាទៀត ឈ្មោះ ចិន វាស្នាក៏បានវាយប្ដីរបស់ខ្លួន ចំភ្នែកខាងស្ដាំ បណ្ដាលអោយហេីមភ្នែក ខ្លួនក៏បាននាំប្ដីទៅពេទ្យដេីម្បីព្យាបាល និង លាងរបួស ។
ពេលត្រឡប់មកដល់កន្លែងសម្រាកវិញ ពេលងូតទឹករួចប្ដីខ្លួនក៏បានដេកក្នុងបន្ទប់ ស្រាប់តែឈ្មោះ ចិន វាស្នា បានមករករឿងប្ដីខ្លួនទៀត ហើយយកដែកសម្រាប់បៀកថ្នាំ ហេីយមកសួរខ្លួនថា អាណាជេរអញ ចង់មិច ខ្ញុំក៏បានដេញអោយគាត់ទៅសម្រាកទៅ តែឈ្មោះ ចិន វាស្នា នៅតែសួរដដែលទៀត ប្ដីខ្លួនខឹងទ្រាំមិនបានក៏ចុះទៅសួរ ក៏ត្រូវបាន ឈ្មោះ ចិន វាស្នា យកដែកបៀកថ្នាំដែលវាកាន់មកនោះ វាយមកលេីប្ដីខ្លួនចំដៃខាងស្ដាំ បណ្ដាលអោយដាច់សាច់ជាច្រេីនកន្លែង ហូរឈាមយ៉ាងច្រេីនរងរបួសធ្ងន់ ប្ដីខ្លួនក៏បានលើកដៃរង ហេីយក្រវៀសដៃទៅ ដែកបៀកថ្នាំនោះក៏ត្រូវករដៃស្ដាំរបស់ឈ្មោះ ចិន វាស្នា បណ្ដាលអោយត្រូវប្រអប់ដៃវា ហូរឈាមដែរទៅ ។
បច្ចុប្បន្នជនសង្ស័យ ត្រូវបានសមត្ថកិច្ចនាំខ្លួនទៅកាន់ប៉ុស្តិ៍នគរបាលរដ្ឋបាលបាវិត ដើម្បីកសាងសំណុំរឿងចាត់ការតាមច្បាប់ ៕
ដោយ៖ សុថាន
