សារព័ត៌មាន នគរវត្ត តែងតែនាំមុខគេជានិច្ច
ប្រទេសបារាំង៖ វាពិតជាអស្ចារ្យខ្លាំងណាស់សម្រាប់សិល្បករ សិល្បការិនីខ្មែរយើងជាច្រើនរូប ដែលបានបង្ហាញខ្លួនក្នុងព្រឹត្តិការណ៍លំដាប់ពិភពលោកដើរលើកម្រាលព្រំក្រហម Cannes Film Festival 2024 លើកទី៧៧ នៅទីក្រុងកាន ប្រទេសបារាំង ដែធ្វេីឱ្យទស្សនិកជន និងអ្នកគាំទ្របានបង្ហាញអារម្មណ៍រំភើបហើយមោទភាពជាខ្លាំង។
ជាក់ស្ដែងវត្តមានតារាសម្តែងកញ្ញា មាន សូនីតា រាជនីក្រមា បានដើរលើកម្រាលព្រំក្រហមក្នុងកម្មវិធី Cannes Film Festival 2024 លើកទី៧៧ កញ្ញា បានបញ្ជាក់ថា៖ ក្រមាខ្មែរអមព័ន្ធដោយអក្សរយ័ន្ត រំលេចឌិនដាម តាមរចនាបថបុរាណទំនើប និងមួកក្រមា កែខៃច្នៃតាមដាននៃមួកស្លឹកត្នោតដែលបងប្អូនប្រជាកសិករ និងបងប្អូនប្រជាជនខ្មែរនិយមប្រើប្រាស់នាបុរាណកាលរហូតដល់បច្ចុប្បន្ន ។
រាជនីក្រមា មាន សូនីតា បានបន្ថែមថា “រចនាបថនិង ការច្នៃម៉ូតទៅលើរ៉ូបនិងមួករបស់នាងខ្ញុំ គឺឈរលើគោលការណ៍ «អភិវឌ្ឍន៍ដើម្បីអភិរក្ស»”។ យ៉ាងណាក៏មានការលើកឡើងពីសំណាក់អ្នកគាំទ្រថា អស្ចារ្យណាស់មិនអួតមិនមោទនភាពជ្រុលទៅដោយកិត្តិយស និងមានតម្លៃបែបនេះទេីបសមជាអ្នកតំណាងឲ្យប្រទេសថ្លៃថ្នូរបំផុត។
ជាមួយគ្នានេះ កញ្ញា ស៊ីន យូប៊ីន នៅតែធ្វើបានឥតខ្ចោះក្នុងនាមតំណាងកម្ពុជាផ្សព្វផ្សាយសិល្បៈវប្បធម៌ទៅកាន់ពិភពលោក ដោយនៅថ្ងៃទី៣នៃការដើរលើកម្រាលព្រំ Cannes Film Festival 2024 លើកទី៧៧ នាងបានយកឈុតមួយរៀបរាប់ពីភាពរឹងមាំនៃស្ត្រីខ្មែរ។ នៅក្នុងឈុតនេះ យូប៊ីន គេមើលទៅកាន់តែក្មេង ប្រៀបដូចក្មេងស្រីម្នាក់ តែមានភាពអង់អាច និងរឹងមាំ។ តារាស្រីបានដាក់ឈ្មោះឈុតនេះថា “នារីចម្បាំងព្រះមហានគរឥន្រ្ទប្រត្ថព្រះពិស្ណុលោក”។
សិល្បការិនីខ្មែរដដែលបញ្ជាក់ថា និយមន័យនៃពាក្យចំបាំង គឺមិនមែនច្បាំងតែលើសឹកសង្គ្រាមនោះទេ តែច្បាំងនឹងចំណេះវិជ្ចា ព្រមទាំងច្បាំងនឹងងភាពទន់ខ្សោយរបស់ខ្លួនឯងថែមទៀតផង។ យូប៊ីន ថ្លែងថា “ឈុតនេះនាងខ្ញុំចង់បង្ហាញពីភាពរឹងមាំតែមិនរឹងរូស ទន់ភ្លន់តែមិនទន់ជ្រាយរបស់ស្រ្តីខ្មែរ!”។
ឈុត នារីចម្បាំងព្រះមហានគរឥន្រ្ទប្រត្ថព្រះពិស្ណុលោក ត្រូវបានសាងឡើងយ៉ាងពិសេស ដែលមានការបូកបញ្ចូល ល្ខោនស្រមោលស្បែកធំរបស់ខ្មែរ ដែលបានចុះបញ្ចីបេតិកភណ្ឌវប្បធម៌អរូបីនៃមនុស្សជាតិឆ្នាំ2005របស់អង្គការយូណេស្កូ។
នេះជាការខិតខំថ្មីទៀតរបស់ ស្រីស្អាតកម្ពុជា បន្ទាប់ពីឆ្នាំមុននាងបានធ្វើម្ដងរួចមកហើយ ដោយកាលណោះនាងបានប្រើប្រាស់ឈុតរ៉ូបស្បៃពណ៌ស រចនារំលេចស្រមោលទង់ជាតិ អក្សរ និងនាគខ្មែរ។ ទាំងនេះ នាងធ្វើដើម្បីគោលដៅតែមួយគត់ គឺផ្សាយពីសិល្បៈវប្បធម៌ដ៏ល្អផូរផង់របស់ខ្មែរទៅកាន់ពិភពលោក។ យូប៊ីន ថ្លែងថា “នេះជាចំណែកតូចមួយក្នុងការជួយផ្សព្វផ្សាយវិប្បធម៌ដ៏ផូរផង់របស់កម្ពុជាទៅកាន់ពិភពលោកដែលនាងខ្ញុំអាចធ្វើបានបើមានខ្វះចន្លោះត្រង់ណាសូមមេត្តាខន្តីអភ័យទោសទុកជាមុននិងសូមគោរពអរគុណប្រជាជនកម្ពុជាទាំងអស់ដែលផ្តល់កម្លាំងចិត្តពីចម្ងាយ”។
ប៉ុន្តែអ្វីដែលកាន់តែគួរឱ្យភ្ញាក់ផ្អើលខ្លាំងមែនទែន កញ្ញា ស៊ីន យូប៊ីន ឆ្នាំនេះបានដឹកដៃប្អូនស្រីរបស់នាង គឺតារាសម្តែងស្រីវ័យក្មេង កញ្ញា ស៊ីន ជេននី ដែលនាងទើបអាយុ ២០ឆ្នាំប៉ុណ្ណោះ មកចូលរួមដើរលើកម្រាលព្រំក្រហម លើកទី៧៧នេះ ជាមួយបងស្រីបណ្តូលចិត្តរបស់ខ្លួន ពោលគឺក្មេងខ្ចីខ្លាំងមែនទែន សូម្បីតែសាម៉ីខ្លួននាងក៏ទទួលស្គាល់ចំនុចនេះដែរ។
តារាស្រីវ័យក្មេង ស៊ីន ជេននី បានរៀបរាប់ឱ្យដឹងលើទំព័រហ្វេសប៊ុកផ្លូវការថា៖ វាដូចជាក្តីស្រមៃ តែវាជាការពិតដែលពេលនេះជើងរបស់នាងបានជាន់លើកម្រាលព្រំក្រហមមួយនេះហើយ។ ជេននី ទទួលស្គាល់ថា នាងជាសិល្បកររលកក្រោយ បើតាមcredit គឺនៅមិនទាន់គ្រប់គ្រាន់អាចបំពេញក្តីស្រមៃឈរលើកម្រាលព្រំក្រហមនេះបានដោយខ្លួនឯងឡើយ ប៉ុន្តែដោយសារឥទ្ធិពលរបស់មនុស្សស្រីដ៏ពូកែ គឺបងស្រីបង្កើតរបស់នាង កញ្ញា ស៊ីន យូប៊ីន ទើបនាងទទួលបានសំណាងដ៏អស្ចារ្យនេះ។
ថ្វីដ្បិតតែលើកនេះ ជេននី មានការជ្រោមជ្រែងពីបងស្រីក្នុងការដើរកម្រាលព្រំក្រហមទីក្រុងកាន តែនាងសន្យាថា នឹងប្រើប្រាស់សំណាងនេះបង្កើតទៅជាឱកាសឱ្យខ្លួនឯង ដើម្បីត្រឡប់មកឈរនៅទីនេះម្តងទៀតនៅឆ្នាំណាមួយដោយខ្លួនឯង។
តារាស្រីកម្ពុជាវ័យ២០ឆ្នាំ ស៊ីន ជេននី បានលើកយក concept ធីតារំដួល ដើម្បីដើរកម្រាលព្រំក្រហម ហើយនាងពិតជាស្រស់ស្អាតខ្លាំងណាស់ក្នុងរ៉ូបពណ៌លឿងខ្លីរំលេចពីផ្ការំដួល ដែលជាផ្កាតំណាងជាតិរបស់ខ្មែរយើង។
បងប្អូនស្រីត្រកូល ស៊ីន ទាំងពីររូបបានដឹកដៃគ្នាដើរលើកម្រាលព្រំក្រហមដោយមោទនភាព បង្ហាញភាពស្រស់ស្អាតចែងចាំងរបស់សិល្បករកម្ពុជា។
បេីយោងតាមវីដេអូរបស់ កញ្ញា ស៊ីន យូប៊ីន និង ជេននី បានដឹកដៃគ្នាដើរលើកម្រាលព្រំក្រហមទីក្រុងកានលើកទី៧៧ ផ្ទុះការចាប់អារម្មណ៍យ៉ាងខ្លាំងក្លាពីអ្នកប្រើប្រាស់ social media ហើយពួកគេបានបង្ហាញមោទនភាពចំពោះទឹកចិត្តដ៏ធំធេងរបស់បងប្អូនស្រីទាំងពីរ ដែលបានលះបង់ពេលវេលា ប្រាក់កាក់ ដើម្បីមុខមាត់ប្រទេសកម្ពុជាលើឆាកអន្តរជាតិ។
ដោយឡែកលោក លោក ម៉ែន សីហា ហៅ អូលីវ៉ា គង់ គ្រូបង្ហាត់ដើរម៉ូត និងជាអ្នកច្នៃម៉ូត បន្ទាប់ពីបានទៅដល់ប្រទេសបារាំងតាំងពីប៉ុន្មានថ្ងៃមុន ទីបំផុត ក៏បានឈានឡើងលើកម្រាលព្រំក្រហម Cannes Film Festival ២០២៤ផងដែរ។ នេះជាលើកដំបូងបំផុតរបស់គង់ គ្រូបង្ហាត់ដើរម៉ូត អ្នកជាអ្នកច្នៃម៉ូតកម្ពុជា នៅលើកម្រាលព្រំក្រហមកម្មវិធីដ៏មានអាយុកាលជិត១សតវត្សរ៍របស់បារាំង។
នៅថ្ងៃទី១នេះ អូលីវ៉ា គង់ បាននាំឈុតដ៏ប្លែកភ្នែកមួយ រចនាពីរូបផ្ការាប់រយចម្រុះពណ៌គួរជាទីទាក់ទាញ។ សម្រាប់សាមីខ្លួនបានដាក់ឈ្មោះឈុតរបស់ខ្លួនថា “ឈុតសមរាត្រីបរមវិស្ណុលោក” និងជាឈុតរយលានអត្ថន័យ ឫ Millions Followers ។
លោក អូលីវ៉ា គង់ បានបញ្ជាក់ថា មុនអាចឡើងកម្រាលព្រំក្រហមបាន លោកបានជួបឧបសគ្គមួយធ្វើអោយលោកមានការយឺតយ៉ាវយ៉ាងខ្លាំង ដោយសារជាន់ម៉ោងអ្នកនយោបាយរបស់ប្រទេសគេធ្វើដំណើរ។ លោក បន្តថា “ទៅខកម៉ោងអ្នកនយោបាយប្រទេសគេចុះមក គេបិទផ្លូវជិត១ម៉ោង ខ្ញុំចុះរត់ជាមួយអាវផ្កាទង្ងន់៣០គីឡូ ជាមួយ Tien kimcheng ជិតដាច់ខ្យល់ ទោះជាយ៉ាងណាខ្ញុំអាចធ្វើបានហើយ មានតែត្រៀមកំលាំងសម្រាប់ឈុតថ្ងៃស្អែកឲ្យល្អ!”។
យ៉ាងណាដោយការប្រឹងប្រែងព្យាយាម លោក អូលីវ៉ា គង់ បានបំពេញបេកកម្មរបស់ខ្លួនបានសម្រេចនៅថ្ងៃទី១។ ថ្ងៃស្អែក លោកនឹងបង្ហាញជាថ្មីទៀតដែលជាថ្ងៃទី ២ នៅលើកម្រាលព្រំក្រហម Cannes Film Festival 2024។ មុនចាកចេញពីកម្ពុជា អូលីវ៉ា គង់ ប្រាប់ថា បានត្រៀមឈុតជាច្រើនដើម្បីបង្ហាញទៅពិភពលោកអំពីសិល្បៈវប្បធម៌របស់ខ្មែរ ក្នុងនោះមានឈុតដែលដកស្រង់ចេញពីរឿង “កូរសមុទ្រទឹកដោះ” ទៀតផង។
គួរបញ្ជាក់ថា កម្មវិធីកម្រាលព្រំក្រហម The 77 Cannes Film Festival 2024នេះ គឺជាកម្មពិធីលំដាប់ពិភពលោកដែលធ្វើឡើងនៅទីក្រុងកានប្រទេសបារាំង ដោយមានការចូលរួមពីសំណាក់បុគ្គលល្បីៗនៅជុំវិញពិភពលោក ខណៈដែលកម្ពុជាក៏មានសិល្បករ និងបុគ្គលល្បីៗមួយចំនួនចូលរួមផងដែរ៕
ដោយ៖ តារា
