ជាលើកទីមួយដែលកូរ៉េខាងជើង បញ្ចេញរូបភាពរោងចក្រចម្រាញ់សារធាតុអ៊ុយរ៉ាញ៉ូម

ចែករំលែក៖

សារព័ត៌មាន Reuters បានផ្សាយថា កូរ៉េខាងជើង នៅថ្ងៃសុក្រទី១៣ ខែកញ្ញានេះ បានចេញផ្សាយរូបភាពរោងចក្រចម្រាញ់សារធាតុអ៊ុយរ៉ាញ៉ូមមួយកន្លែងជាលើកដំបូងបំផុត អំឡុងដំណើរទស្សនកិច្ចរបស់លោក គីម ជុងអ៊ុន ដែលបានអំពាវនាវឱ្យផលិតម៉ាស៊ីន centrifuges ថ្មីៗ ដើម្បីបង្កើនការចម្រាញ់សារធាតុអ៊ុយរ៉ាញ៉ូមសម្រាប់ផលិតគ្រាប់បែកនុយក្លេអ៊ែរ។
រូបភាពរោងចក្រចម្រាញ់សារធាតុអ៊ុយរ៉ាញ៉ូមខាងលើ ត្រូវបានចេញផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA ដែលបង្ហាញពីសកម្មភាពលោក គីម ជុងអ៊ុន ចុះត្រួតពិនិត្យម៉ាស៊ីន centrifuges ដែលជាម៉ាស៊ីនដើរតួនាទីយ៉ាងសំខាន់ក្នុងការចម្រាញ់សារធាតុអ៊ុយរ៉ាញ៉ូម។

KCNA មិនបានបញ្ជាក់ឱ្យដឹងថាដំណើរទស្សនកិច្ច របស់លោក គីម ធ្វើឡើងនៅពេលណា ហើយក៏មិនបានបង្ហើបពីទីតាំងរោងចក្រចម្រាញ់សារធាតុអ៊ុយរ៉ាញ៉ូមនោះដែរ។
ប៉ុន្តែ តាមប្រព័ន្ធផ្សព្វផ្សាយរដ្ឋកូរ៉េខាងជើងមួយនេះ លោក គីម ជុងអ៊ុន បានជំរុញឱ្យកម្មករប្រឹងប្រែងផលិតបន្ថែមនូវសម្ភារៈសម្រាប់ផលិតអាវុធនុយក្លេអ៊ែរ ដោយនិយាយថា ឃ្លាំងអាវុធនុយក្លេអ៊ែរគឺជាមធ្យោបាយដ៏សំខាន់បំផុត ដើម្បីប្រឈមមុខនឹងការគំរាមកំហែងពីសហរដ្ឋអាមេរិក និងសម្ព័ន្ធមិត្តរបស់អាមេរិក។
សេចក្ដីរាយការណ៍ពីដំណើរទស្សនកិច្ចរបស់លោក គីម ជុងអ៊ុន ទៅកាន់រោងចក្រចម្រាញ់សារធាតុអ៊ុយរ៉ាញ៉ូម អមជាមួយការចេញផ្សាយរូបភាពបែបនេះ គឺកម្រជាទីបំផុត ខណៈកម្មវិធីនុយក្លេអ៊ែររបស់ទីក្រុងព្យុងយ៉ាងត្រូវបានហាមឃាត់នៅក្រោមដំណោះស្រាយជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ៕