សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានរងរបួសរហូតដល់សន្លប់ស្ដូកស្ដឹងនៅនឹងកន្លែង និងត្រូវបានសាច់ញាតិដឹកទៅសង្គ្រោះនៅមន្ទីរពេទ្យ ខណៈពេលជិះម៉ូតូសុខៗក៏មានម៉ូតូសណ្ដោងរ៉ឺម៉កលក់ផ្លែឪឡឹកមួយគ្រឿងជិះបញ្ច្រាសទិសមកបុក ដែល ហេតុការណ៍នេះបង្កការភ្ញាក់ផ្អេីលកាលពីម៉ោង១០និង៤០នាទីព្រឹកថ្ងៃទី០៨ ខែតុលា ឆ្នាំ២០២៤ នៅតាមបណ្តោយផ្លូវ៥០ម៉ែត្រ ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ ។
បើតាមប្រភពព័ត៌មានបានឱ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម៉ាកហុងដាឌ្រីម C125 ពណ៌ខ្មៅពាក់ស្លាកលេខភ្នំពេញ 1CB-6409 ជិះតាមបណ្ដោយផ្លូវ៥0ម៉ែត្រ ក្នុងទិសដៅពីត្បូងទៅជើង ពេលមកដល់ចំណុចកើតហេតុ ក៏មានបុរសម្នាក់ទៀតបានជិះម៉ូតូសណ្ដោងរ៉ឺម៉កលក់ផ្លែឪឡឹកបញ្រ្ចាសទិសក៏បានរេចង្កូតទៅបុកចំពីមុខពេញទំហឹងបណ្តាលឱ្យដួលបោកទៅលើថ្នល់សន្លប់ស្ដូកស្ដឹង។ ភ្លាមៗនោះ ក្មួយប្រុសរបស់បុរសរងគ្រោះបានហៅឡំប្រឺតាដឹកបុរសរងគ្រោះទៅសង្គ្រោះនៅមន្ទីរពេទ្យភ្លាមៗ ចំណែកបុរសដែលជិះម៉ូតូសណ្ដោងរ៉ឺម៉កលក់ផ្លែឪឡឹកបានជិះបន្តទៅមុខគេចខ្លួនបាត់ស្រមោល។
ក្រោយពេលកើតហេតុសមត្ថកិច្ចមូលដ្ឋានបានចុះដល់កន្លែងកើតហេតុ បានពិនិត្យទីតាំងចំនុចកើតហេតុ រួចបានប្រភពបញ្ជាក់ពីប្រជាពលរដ្ឋថា នៅចំណុចកើតហេតុខាងលើ គេឃេីញមានគ្រោះថ្នាក់ចរាចរណ៍ញឹកញាប់ណាស់ ព្រោះតែមានម៉ូតូសណ្ដោងរ៉ឺម៉កលក់ផ្លែឈេី និងម៉ូតូលក់អ្វីផ្សេងៗទៀតជិះបញ្ច្រាស ដូច្នេះប្រជាពលរដ្ឋសូមស្នើដល់សមត្ថកិច្ចជួយចុះពិនិត្យមើលកន្លែងកើតហេតុនេះផង៕
ដោយ ៖ ភារ៉ា ដង្កោ
