សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ បានបេីកម៉ូតូសណ្ដោងរុឺម៉កមួយគ្រឿងតាមដងផ្លូវ ស្រាប់តែត្រូវរថយន្ដមិនចាំម៉ាកមួយគ្រឿងបើកបុកពីក្រោយពេញទំហឹង និងរុញបន្ដទៅបុកបង្គោលស្លាកសញ្ញាផ្លូវបាក់អស់មួយដេីម ទៀត បណ្ដាលឲ្យរបួសធ្ងន់០២នាក់ ដោយបង្កការភ្ញាក់ផ្ញេីលដល់ប្រជាពលរដ្ឋ កាលពីវេលាម៉ោង៥និង៤០នាទីព្រឹក ថ្ងៃទី១៥ ខែតុលា ឆ្នាំ២០២៤ ស្ថិតនៅផ្លូវបំបែកជាបួន ១៩៨៦ កែង១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់ បានបេីកជិះម៉ូតូសណ្ដោងរុឺម៉កដឹកសាច់ជ្រូកមួយគ្រឿងគ្មានផ្លាកលេខ បានធ្វើដំណើរតាមបណ្តោយផ្លូវ១៩៨៦ ទិសដៅពីកើតទៅលិច ។ ខណៈមកដល់ចំណុចកេីតហេតុស្រាប់តែឃើញរថយន្តមិនចាំម៉ាកមួយគ្រឿងបើកបរក្នុងល្បឿនលឿនមកពីក្រោយបានបុកម៉ូតូសណ្ដោងរុឺម៉កដឹកសាច់ជ្រូនពីក្រោយពេញទំហឹង និងរុញបន្ដទៅបុកបង្គោលស្លាកសញ្ញាបង្ហាញផ្លូវបាក់មួយដេីមទៀតរងការខូចខាតយ៉ាងដំណំ និងខ្ទាតទៅបុកបុរសចំណាស់ម្នាក់កំពុងអង្គុយនៅក្រោមព្រះភូមិដែលនៅជាប់កែងផ្លូវបំបែក១៩៨៦ កែងនិងផ្លូវ១០០៧ រងរបួសធ្ងន់ងដែរ ខណៈរថយន្ដបង្កបានបើករត់គេចបាត់ស្រមោលភ្លាមៗ ។
ក្រោយកេីតហេតុ បុរសរងគ្រោះទាំង២នាក់ត្រូវបានក្រុមគ្រូពេទ្យបញ្ជូនទៅសង្គ្រោះនៅមន្ទីរពេទ្យព្រះកុសមៈដើម្បីសង្គ្រោះអាយុជីវិត ។ បន្ទាប់មកសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងអូសយកម៉ូតូសណ្ដោងរុឺម៉កទៅរក្សាទុកនៅអធិការខណ្ឌសែនសុខ ជាបណ្ដោះអាសន្ន និងធ្វេីការស្រាវជ្រាវរករថយន្តបង្កមកដោះស្រាយតាមច្បាប់៕
ដោយ ៖ ភារ៉ា ដង្កោ
