សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះម៉ូតូបញ្ច្រាសទិសដៅចរាចរណ៍បត់ឆ្លងផ្លូវមិនប្រយ័ត្នត្រូវបានរថយន្តកូរ៉េបេីកលឿនជ្រុលបុកអូសជាង១០ម៉ែត្របណ្តាលឱ្យស្លាប់ភ្លាមៗនៅកន្លែងកេីតហេតុ។
ហេតុការណ៍នេះបានកេីតឡេីងកាលពីវេលាម៉ោង៥ល្ងាចថ្ងៃទី១៥ ខែតុលា ឆ្នាំ២០២៤ នៅផ្លូវជាតិលេខ៣ ភូមិព្រៃព្រីងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះ កុង ស៊ុន ភេទប្រុស អាយុ៣០ឆ្នាំ មុខរបរជាងជួសជុលទូរស័ព្ទ នៅផ្សារចោមចៅ ស្នាក់នៅភូមិព្រៃកីខ សង្កាត់ពងទឹក ខណ្ឌដង្កោ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញជនរងគ្រោះជិះម៉ូតូម៉ាកហុងដា ពណ៌ខ្មៅ ពាក់ស្លាកលេខកំពង់ស្ពឺ1M 9818 ធ្វេីដំណេីរចេញពីផ្សារចោមចៅទីកន្លែងលក់និងជួសជុលទូរស័ព្ទ ធ្វេីដំណេីរតាមបណ្តោយផ្លូវជាតិលេខ៣ ក្នុងទិសដៅពីជេីងទៅត្បូងបំណងទៅផ្ទះនៅសង្កាត់ពងទឹក ដោយបញ្ច្រាសទិសដៅចរាចរណ៍ខណៈមកដល់ចំណុចកេីតហេតុ ក៏ឆ្លងផ្លូវពីកេីតទៅលិចចូលគន្លងខាងស្តាំវិញភ្លាមនោះ ស្រាប់តែមានរថយន្តកូរ៉េ ពណ៌ខៀវ ពាក់ស្លាកលេខភ្នំពេញ2BJ 0248 ធ្វេីដំណេីរពីត្បូងទៅជេីងជ្រុលបុកពេញទំហឹងអូសជាង១០ម៉ែត្រ បណ្តាលឱ្យជនរងគ្រោះបាក់កស្លាប់ភ្លាមៗ។
ក្រោយកេីតហេតុសមត្ថកិច្ចមូលដ្ឋានបានចុះមកដល់ចំណុចកេីតហេតុនិងទាក់ទងជំនាញមកធ្វេីការវាស់វែងយករថយន្តនិងម៉ូតូ ទៅរក្សាទុកនៅស្នងការដ្ឋានគរបាលរាជធានីភ្នំពេញដេីម្បីរង់ចាំដោះស្រាយពេលក្រោយ។ចំណែកសពជនរងគ្រោះត្រូវបានប្រគល់ទៅក្រុមគ្រួសារមកទទួលយកទៅធ្វេីបុណ្យតាមប្រពៃណីនៅស្រុកកំណើត៕
ដោយ៖សុខាសែនជ័យ
