សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់ត្រូវបានជនសង្ស័យសុំជិះម៉ូតូជាមួយ ហើយពេលដល់ពាក់កណ្តាលផ្លូវក៏ទាញកាំបិតភ្ជង់គំរាមឱ្យឈប់រួចធាក់ជនរងគ្រោះចេញពីម៉ូតូ ហេីយជនសង្ស័យក៏ជិះគេចខ្លួនទៅបាត់ដោយសុវត្តិភាព។
ហេតុការណ៍នេះបានកេីតឡេីងកាលពីវេលាម៉ោង១១និង៣០នាទីព្រឹកថ្ងៃទី២៣ ខែតុលា ឆ្នាំ២០២៤ នៅលេីកំណាត់ផ្លូវលំភូមិអក្ស សង្កាត់ត្រពាំងក្រសាំង ខណ្ឌពោធិ៍សែនជ័យ។
ជនរងគ្រោះឈ្មោះរាត្រី ភេទប្រុស អាយុ១៧ឆ្នាំ ជាសិស្ស ស្នាក់នៅភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ។ ម៉ូតូរបស់ជនរងគ្រោះដែលត្រូវជនសង្ស័យប្លន់យកទៅនោះ ម៉ាកហុងដាឌ្រីម ស៊េរីឆ្នាំ២០២២ ពណ៌ខ្មៅ មិនចាំស្លាកលេខ។
តាមសម្តីជនរងគ្រោះបានឱ្យដឹងថា មុនពេលកេីតហេតុរូបគេបានជិះម៉ូតូម្នាក់ឯងចេញពីផ្ទះ បានបន្តិចស្រាប់តែជួបជនសង្ស័យកំពុងដេីរម្នាក់ឯង ពេលនោះជនសង្ស័យបានពឹងរូបគេជួយសង្គ្រោះដឹកទៅត្រពាំងក្រសាំង រូបគេក៏ព្រមឌុបទៅដោយជិះតាមផ្លូវលំ លុះមកដល់ចំណុចកេីតហេតុជនសង្ស័យក៏យកកាំបិតភ្ជង់កជនរូបគេគំរាមឱ្យឈប់ ។
ជនរងគ្រោះបន្តថា ខណៈរូបគេឈប់ម៉ូតូស្រាប់តែជនសង្ស័យរុញធាក់រូបគេទម្លាក់ចេញពីម៉ូតូរួចជិះគេចខ្លួនទៅបាត់។ បន្ទាប់មកជនរងគ្រោះក៏ស្រែកថាចោរៗនិងរត់ដេញតាម តែគ្មានអ្នកណាជួយឡេីយ។
ក្រោយកេីតហេតុជនរងគ្រោះបានត្រឹមទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលត្រពាំងក្រសាំងដេីម្បីសុំអន្តរាគមន៍៕
ដោយ៖សុខាសែនជ័យ
