សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ ព្រឹកថ្ងៃទី៣១ ខែតុលា ឆ្នាំ២០២៤នេះ លោកជា សុមេធី រដ្ឋមន្ត្រីក្រសួងសង្គមកិច្ច អតីត យុទ្ធជន និងយុវនីតិសម្បទា និងលោកស្រី ជា ផល្គុន បានដឹកនាំគណៈប្រតិភូមួយក្រុម អញ្ជើញធ្វើទស្សនកិច្ចនៅមជ្ឈមណ្ឌលស្តារលទ្ធភាពពលកម្មកាយសម្បទាខេត្តកំពង់ចាម ដែល បាន និងកំពុងអនុវត្តយ៉ាងសកម្មក្នុងការផ្តល់សេវាស្តារលទ្ធភាពពលកម្មកាយសម្បទាជូនជន ពិការនៅក្នុងខេត្តកំពង់ចាម និងខេត្តត្បូងឃ្មុំ ព្រម ទាំងខេត្តចំនួនទៀតដែលមានព្រំប្រទល់នៅ ជាប់ខេត្តទាំងពីរនេះ។
ក្នុងឱកាសនោះលោករដ្ឋមន្ត្រី ជា សុមេធី និងលោកស្រីបានសម្តែងនូវការកោតសរសើរ ចំពោះកិច្ចខិតខំប្រឹង ប្រែងរបស់ថ្នាក់ដឹកនាំ និងមន្ត្រី បុគ្គលិកមជ្ឈមណ្ឌលស្តារលទ្ធភាពពលកម្ម កាយសម្បទាខេត្តកំពង់ចាម ដែលស្ថិតនៅក្រោមការគ្រប់គ្រងរបស់សាខាមូលនិធិជនពិការខេត្ត និងទទួលបានការចូលរួមឧបត្ថម្ភគាំទ្រពីអង្គការជនពិការអន្តរជាតិ (HI) សរុបចំនួន ២៤នាក់ (ស្រី ៨នាក់ និងបុគ្គលិកជាជនមានពិការភាព ៦នាក់) ក្នុងនោះ មន្ត្រីក្របខណ្ឌ ៤នាក់ បុគ្គលិក អង្គការជនពិការអន្តរជាតិ (HI) ២០នាក់ ក្នុងការបំពេញការងារនាពេលកន្លងមកដើម្បីបម្រើ ផលប្រយោជន៍ដល់បងប្អូនជាជនពិការ ដែលរួមមាន ផ្នែកបច្ចេកទេសផលិតអវៈយវៈសិប្បនិម្មិត និងរណប និងផ្នែកព្យាបាលដោយចលនាផ្នែកសេវាសង្គមជាដើម។
គួរជម្រាបថា ក្នុងរយៈពេល៩ខែ ដើមឆ្នាំ២០២៤នេះ មជ្ឈមណ្ឌលស្តារលទ្ធភាពពលកម្ម កាយសម្បទាខេត្តកំពង់ចាម បានផ្តល់សេវាជូនជនមានពិការភាពសរុបចំនួន ១,៨៦៩នាក់ (ស្រី ៧១៧នាក់,កុមារ ៨១២នាក់) ក្នុងនោះ ជនមានពិការភាពថ្មីចំនួន ៤៧២នាក់ (ស្រី ១៨៤នាក់, កុមារ ១៤៧នាក់) ហើយជាមធ្យមជនមានពិការភាពមកទទួលសេវាមានចន្លោះពី១៥ ទៅ២០ នាក់ ក្នុង១ថ្ងៃ។ចំពោះការផ្តល់ឧបករណ៍ជំនួយស្តារផ្នែកកាយ សម្បទាជូនជនមានពិការភាព ក្នុង រយៈពេល៩ខែ ដើម ឆ្នាំ២០២៤នេះដែរ រួមមាន៖ ដៃជើងសិប្បនិម្មិតចំនួន ១៨២គ្រឿង,រណប២៧១គ្រឿង,រទេះរុញ ៨៤ គ្រឿង ឧបករណ៍ជំនួយការដើរផ្សេងៗចំនួន ៥៣២ គ្រឿង និងជួស ជុលឧបករណ៍ជំនួយគ្រប់ប្រភេទចំនួន ៤៧៧ គ្រឿង។ បានផ្តល់សេវាព្យាបាលចលនាចំនួន ១៧២៩ នាក់ ស្មើនឹង ៩,២៥៤ដង និងបានផ្តល់សេវាស្ដារពីចម្ងាយចំនួន ១,១៥១ដង។ បានចុះ ផ្តល់សេវាជួសជុលចល័តជូនជនមានពិការភាពនៅតាមសហគមន៍ក្នុងខេត្តកំពង់ចាម និងខេត្ត ត្បូងឃ្មុំ នូវឧបករណ៍សិប្បនិម្មិត និងរណប និងគ្រឿងជំនួយរាងកាយ ព្រមទាំងស្វែងរកអតិថិជន ថ្មីបានចំនួន ១២លើក មានជនមានពិការភាពដែលទទួលសេវាបានចំនួន ១០៣នាក់។ល៕
ដោយ៖ សូរិយា
