ស្លាប់ម្នាក់របួសធ្ងន់ម្នាក់ទាំងព្រឹកដោយសារគ្រោះថ្នាក់ចរាចរណ៍នៅស្រុកស្វាយទាប

    ខេត្តស្វាយរៀង៖ មានករណីគ្រោះថ្នាក់ចរាចរណ៍គួរអោយរន្ឌត់មួយរវាងម៉ូតូ២គ្រឿងបុកគ្នាយ៉ាងពេញទំហឹងលាន់សូរដូចរន្ទះបណ្ដាលអោយបុរសម្នាក់ស្លាប់និងរងរបួសធ្ងន់ម្នាក់ ផ្អើលដល់អ្នកភូមិទាំងព្រឹកនៅស្រុកស្វាយទាប។

    ហេតុការណ៍នេះបានកើតឡើងនៅវេលាម៉ោង ៦និង២០នាទីព្រឹកថ្ងៃទី០៩ ខែវិច្ឆិកា ឆ្នាំ២០២៤ នៅលើផ្លូវលេខ៣១៧ ស្ថិតក្នុងភូមិអង្ក្រង  ឃុំស្វាយរំពារ ស្រុកស្វាយទាប ខេត្តស្វាយរៀង។

    យោងតាមសមត្ថកិច្ចនគរបាលស្រុកបានអោយដឹងថា អ្នកស្លាប់មានឈ្មោះ រ៉ង សុទី  អាយុ២១ឆ្នាំ មុខរបរកម្មកររោងចក្រ រស់នៅភូមិស្វាយធំ ឃុំស្វាយរំពារ ស្រុកស្វាយទាប បើកម៉ូតូម៉ាកHONDA BREAM ស៊េរីឆ្នាំ២០២៣ ពណ៌ខ្មៅ ពាក់ស្លាកលេខ ស្វាយរៀង ១U-៩៦៧៤ បានរងការខូចខាតយ៉ាងដំណំ។ ចំណែកអ្នករងរបួសធ្ងន់មានឈ្មោះ ឃៀម ដារ៉ា ភេទប្រុស អាយុ១៩ឆ្នាំ មុខរបរកម្មកររោងចក្រ រស់នៅភូមិកំពោតទូក ឃុំគគីរសោម ស្រុកស្វាយទាប បើកម៉ូតូម៉ាក HONDA DREAM ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ ១IN-១១៨១ ។

    តាមសាក្សីបានអោយដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកHONDA DREAM ឆ្នាំ ២០២០ ពណ៌ខ្មៅ ពាក់ស្លាកលេខ ភ្នំពេញ ១IN-១១៨១ ដោយបានធ្វើដំណើរក្នុងទិសដៅពីត្បូងទៅជើង មិនពាក់មួកសុវត្ថិភាព។ លុះបើកមកដល់កន្លែងកើតហេតុខាងលើបានបុកជាមួយម៉ូតូ មួយគ្រឿងម៉ាកHONDA BREAM ស៊េរីឆ្នាំ២០២៣ ពណ៌ខ្មៅ ពាក់ស្លាកលេខ ស្វាយរៀង ១U-៩៦៧៤ ដែលបើកក្នុងទិសដៅពីជើងទៅត្បូងបញ្ច្រាសទិសគ្នាយ៉ាងពេញទំហឹងលាន់សូរដូចរន្ទះបណ្ដាលអោយបុរសម្នាក់ស្លាប់និងរងរបួសធ្ងន់ម្នាក់ ផ្អើលដល់អ្នកភូមិតែម្ដង។

    ក្រោយមកអ្នករបួសត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកស្វាយទាប ចំណែកសពត្រូវបានសមត្ថកិច្ចធ្ចើកំណត់ហេតុប្រគល់ជូនក្រុមគ្រួសារយកទៅធ្វើបុណ្យតាមប្រពៃណី រីឯមធ្យោបាយធ្វើដំណើរទាំងពីរគ្រឿងយកមករក្សាទុកនៅប៉ុស្តិ៍នគរបាលរដ្ឋបាលឃុំស្វាយរំពារ។

   សមត្ថកិច្ចបានបញ្ជាក់ថា មូលហេតុ ដោយសារតែ:ម៉ូតូ HONDA DREAM  ឆ្នាំ២០២៣ ពាក់ផ្លាកលេខស្វាយរៀង ១U-៩៦៧៤ មិនប្រកាន់ស្តាំទើបជួបគ្រោះថ្នាក់ចរាចរណ៍ខាងលើកើតឡើងបែបនេះ៕

ដោយ៖ សុថាន