យុវជនពីរនាក់ជិះម៉ូតូឌុកគ្នាវ៉ាជែងជ្រុលទៅបុករថយន្ត ពីក្រោយបណ្ដាលឱ្យដួលរងរបួសធ្ងន់ម្នាក់ស្រាលម្នាក់

ភ្នំពេញ៖ របួសធ្ងន់ម្នាក់ស្រាលម្នាក់ត្រូវបានរថយន្តសាមុយដឹកទៅសង្គ្រោះបន្ទាន់បន្ទាប់ពីយុវជន២នាក់បើកម៉ូតូឌុបគ្នាក្នុងល្បឿនវ៉ាជែងជ្រុលទៅបុករថយន្ត ពីក្រោយចតស្ងៀមលើចិញ្ចើមផ្លូវ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង ៨:៣០នាទីយប់ថ្ងៃទី ២៥ខែវិច្ឆិកាឆ្នាំ ២០២៤ចំណុចទល់មុខសាលាបឋមសិក្សាអនុវត្ត ស្ថិតនៅលើផ្លូវលេខ២៧១ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាក toyota priusពណ៌ក្រហម ពាក់ស្លាកលេខ ភ្នំពេញ 2BV-4184បើកបរដោយបុរសម្នាក់ធ្វើដំណើរតាមបណ្តោយផ្លូវ២៧១ ក្នុងទិសដៅពីជើងមកត្បូង ខណៈពេលបើកមកដល់ចំណុចកើតហេតុក៏បានបើករថយន្តមកឈប់អែបគៀននៅលើចិញ្ចើមផ្លូវ ភ្លាមនោះដែរស្រាប់តែគេឃើញមានម៉ូតូមួយគ្រឿងម៉ាកហុងដាឌ្រីមសង់សេ១២៥ពណ៌ខ្មៅពាក់ស្លាកលេខ  ភ្នំពេញ 1KQ-3059 បើកបរដោយយុវជនម្នាក់នឹងអ្នករួមដំណើរម្នាក់ បើកតាមបណ្តោយផ្លូវ២៧១ក្នុងទិសដៅស្របគ្នាពីជើងមកត្បូងក្នុងល្បឿនយ៉ាងលឿនខណៈពេលជិះមកដល់ចំណុចកើតហេតុក៏បានវ៉ាជែងជ្រុលទៅបុកពីក្រោយរថយន្តtoyota prius ពេញទំហឹងបណ្ដាលឲ្យដួលរងរបួសធ្ងន់ម្នាក់ត្រូវបានរថយន្តសាមុយដឹកយកទៅសង្គ្រោះភ្លាមៗ។ចំណែកឯយុវជនម្នាក់ទៀតរួមដំណើរជាមួយគ្រាន់តែរងរបួសស្រាលតែប៉ុណ្ណោះ។ហើយភ្លាមនោះដែរម្ចាស់រថយន្តក៏មិនបានរត់ទៅណានោះទេគាត់នៅកន្លែងកើតហេតុរង់ចាំការដោះស្រាយជាមួយនឹងភាគីរងគ្រោះ។

បន្ទាប់ពីកើតហេតុដោយភាគីទាំងសងខាងបានសម្របសម្រួលគ្នាយកសម្ភារៈម៉ូតូនិងរថយន្តយកទៅជួសជុលរៀងៗខ្លួនបញ្ចប់រឿងនៅនឹងកន្លែងកើតហេតុតែម្ដង៕

ដោយ៖ជ្រោយពេជ្រ