សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បេីកបររថយន្តស៊េរីទំនើប ពាក់ស្លាកលេខខេមរភូមិន្ទ ក្នុងល្បឿនលឿន ជ្រុលឡើងសួនច្បារពុះចែកទ្រូងផ្លូវ ទៅបុករះដើមឈើនិងបង្គោលភ្លើង បណ្តាលឲ្យក្រឡាប់ ផ្ងារជេីងបង្កការភ្ញាក់ផ្អើល នៅវេលាម៉ោង១១និង១០នាទីយប់ ថ្ងៃទី១៦ ខែធ្នូ ឆ្នាំ២០២៤ ស្ថិតនៅតាមបណ្តោយផ្លូវបុរីអង្គរ ក្នុងសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថាមុនពេលកើតហេតុគេបានឃើញរថយន្ត ម៉ាក HYUNDAI GALLOPER ១គ្រឿង ពណ៌ខ្មៅ ពាក់ស្លាកលេខ ខេមរភូមិន្ទ02 2-1032 បើកបរក្នុងល្បឿនលឿនតាមបណ្តោយផ្លូវបុរីអង្គរ ទិសដៅពីត្បូងទៅជើង ចេញពីកាំកូស៊ីធី ទៅកាន់បុរីអង្គរ លុះមកដល់ចំណុចកើតហេតុ រថយន្តខាងលើ ស្រាប់តែរេចង្កូតជ្រុលទៅបុកខឿនឡើងសួនច្បារពុះចែកទ្រូងផ្លូវ រួចក៏បានបុកដើមស្លា១ដើម និងបង្គោលភ្លើងបាក់រលំអស់១ដើម ទើបបណ្តាលឲ្យរថយន្តខាងលើក្រឡាប់ កាត់ទទឹងផ្លូវតែម្តង ។
ប្រភពដដែលបានបន្តថា ក្រោយបង្កហេតុគេបានឃើញបុរសម្នាក់ចេញពីក្នុងរថយន្តដែលកំពុងក្រឡាប់នោះ រួចបន្ទាប់មកក៏បានគេចខ្លួនចេញពីទីតាំងកើតហេតុបាត់ទៅ។ ក្នុងករណីគ្រោះថ្នាក់ចរាចរណ៍នេះមិនបានបង្កគ្រោះថ្នាក់ដល់អ្នកដំណើរផ្សេងទៀតនោះទេ។
ក្រោយកើតហេតុសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់ នៅពេលក្រោយ៕
ដោយ ៖ សុខាសែនជ័យ
