សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកមែរសឺដេសមួយគ្រឿងអ្នកបេីកបរបេីកលឿនខ្វះការប្រុងប្រយ័ត្នបានជ្រុលចង្កូតទៅបុករះស្ថានីយប្រេងសាំងបណ្តាលឱ្យរងការខូចខាតយ៉ាងធ្ងន់ធ្ងរនិងមានអ្នករងរបួសធ្ងន់និងស្រាល៥នាក់ ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី១៧ ខែធ្នូ ឆ្នាំ២០២៤នៅចំណុចការាសសាំងយីហោ ប៊ុនលី ដែលស្ថិតនៅតាមបណ្ដោយផ្លូវ ២០១១ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកេីតហេតុគេឃើញរថយន្តម៉ាកមែរសឺដែសពណ៌ខ្មៅ ពាក់ស្លាកលេខភ្នំពេញ2BA-8899 បេីកបរដោយបុរសវ័យចំណាស់ម្នាក់ និងអ្នករួមដំណើរមានគ្នា៤នាក់ទៀតហើយនិងកូនស្រីតូចម្នាក់ក្នុងនោះរងរបួសធ្ងន់ស្រ្តី២នាក់ ។
ប្រភពព័ត៌មានពីកន្លែងកើតហេតុបានបន្តឱ្យដឹងទៀតថា ខណៈពេលធ្វើដំណើរតាមបណ្ដោយផ្លូវ២០១១ក្នុងទិសដៅពីជេីងទៅត្បូងក្នុងល្បឿនយ៉ាងលឿន លុះបេីកមកដល់ចំណុចកេីតហេតុក៏ស្រាប់តែឃេីញអ្នកអូសរទេះអេតចាយអូសឆ្លងកាត់ពីមុខរថយន្ត ភ្លាមៗនោះស្រាប់តែឃេីញរថយន្ដបង្កខាងលើបានរេចង្កូតទៅផ្នែកខាងឆ្វេងក៏ជ្រុលទៅបុករះរបងដែកដែលឃាំងជំវិញការាសសាំងហេីយជ្រុលទៅបុកបង្គោលសសរការាសសាំងព្រមទាំងទូសំរាប់ចាក់សាំងខ្ទាតជាច្រេីនម៉ែត្រ តែសំណាងល្អមិនផ្ទុះឆាបឆេះនោះទេ គ្រាន់តែរងការខូចខាតបង្គោលសសរការាសសាំងនិងរថយន្តរងការខូចខាតយ៉ាងធ្ងន់ធ្ងរផ្នែកខាងមុខ។
ប្រភពបានបន្តទៀតថា ជនរងគ្រោះស្រ្តី២នាក់ដែលជិះក្នុងរថយន្ត ត្រូវបានរថយន្តសង្គ្រោះរបស់មន្ទីរពេទ្យបង្អែកខណ្ឌសែនសុខ ដឹកយកទៅសង្រ្គោះបន្ទាន់នៅមន្ទីរពេទ្យកម្ពុជាចិនព្រះកុសុមៈ រីឯបុរសជាអ្នកបេីកបរត្រូវបានសមត្ថកិច្ចនគរបាលមូលដ្ឋានឃាត់យកទៅប៉ុស្តិ៍ដើម្បីសួរនាំ។
ក្រោយពេលកេីតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញចរាចរណ៍ខណ្ឌសែនសុខភ្លាមៗហេីយបានទាក់ទងទៅសមត្ថកិច្ចជំនាញនៃការរិយាល័យចរាចរណ៍ផ្លូវគោករាជធានីភ្នំពេញដេីម្បីធ្វើការវាស់វែងនិងស្ទូចរថយន្តបង្កខាងលើយកទៅរក្សាទុកដេីម្បីរង់ចាំការដោះស្រាយថ្ងៃក្រោយ ៕
ដោយ ៖ សុខាសែនជ័យ
