សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី៣០ ខែសីហា ឆ្នាំ២០១៦ ក្រសួងសុខាភិបាលសិង្ហបុរីបានចេញសេចក្តីថ្លែងការណ៍ថា វីរុស Zika បានឆ្លងរាលដាលថ្មីបន្ថែម២៦ករណីទៀតនៅក្នុងប្រទេសនេះ ធ្វើឲ្យចំនួនសរុបកើនឡើង៨២ករណី ។
ប្រភពបញ្ជាក់ថា មនុស្សដែលសង្ស័យផ្ទុកវីរុសចំនួន១១១នាក់ត្រូវបានធ្វើតេស្តិ៍រួចរាល់ក្នុងរយៈពេល២៤ម៉ោង ជាលទ្ធផល មិនមានករណីឆ្លងនោះទេ ។ មុននេះបន្តិចផងដែរ ក្រសួងសុខាភិបាលបានស្នើឲ្យស្ត្រីមានផ្ទៃពោះទាំងអស់ទៅពិនិត្យសុខភាព ស្វែងរកវីរុស Zika ចៀសវាងកុំឲ្យបញ្ហាកាន់តែធ្ងន់ឡើង ។
សូមបញ្ជាក់ថា វីរុស Zika ត្រូវបានប្រកាសដោយអង្គការសុខភាពពិភពលោក (WHO) កាលពីដើមខែកុម្ភៈ ឆ្នាំ២០១៦ ថា ជាបញ្ហាអាសន្នសុខភាពសាធារណៈដោយបង្កឲ្យមានការព្រួយបារម្ភជាអន្តរជាតិ ។ វីរុសដែលបង្កឡើងដោយមូសខ្លាខាំនេះ បានបណ្តាលឲ្យមានការប្រកាសអាសន្ននៅទ្វីបអាមេរិកកណ្តាល និងខាងត្បូង ដោយសារតែវីរុសនេះ បានធ្វើខួរក្បាលទារក មិនលូតលាស់ និងធ្វើឱ្យខួចខួរក្បាលតែម្តង។
វីរុសនេះបានរីករាលដាល់គ្រប់ទីកន្លែង តាំងពីទ្វីបអាមេរិក អឺរ៉ុប រហូតមកដល់ទ្វីបអាស៊ីតែម្តង ។ ប៉ុន្តែនៅកម្ពុជា មិនទាន់មានករណីវីរុសប្រភេទនេះនៅឡើយទេ ហើយក៏មិនចង់បាននោះដែរ ៕ ថាច់ យ៉ាត
