អាណូ លេចចេញស្នេហាថ្មី

ភ្នំពេញ៖ តារាសម្តែងនាងសួន ភក្កី ហៅ VJ អាណូបានបង្ហាញខ្លួនជាថ្មីជាមួយការងារសិល្បៈស្របពេលដំណឹងស្នេហានាង និងអតីតស្វាមីដើរដល់ផ្លូវទាល់។ ថ្មីៗនេះនាងបានពន្លេចចេញនូវដំណឹងស្នេហ៍ជាថ្មីយ៉ាងផ្អែមល្ហែមជាមួយបុរសម្នាក់ ។

១០ឆ្នាំដែលអាណូ បានបាត់ខ្លួននោះមានព័ត៌មានថា នាងមានគូស្នេហ៍ជាមន្ត្រីធំ និងមានកូន២នាក់ទៀត ប៉ុន្តែនាងមិនដែលហ៊ានចេញមុខបកស្រាយនៅឡើយ ។ ក្រោយបែកស្នេហ៍នាងប្រកាសចូលសិល្បៈជាថ្មីជាមួយនឹងជំនួញបើកហាងលក់បាយវិញ ។ ទន្ទឹមនឹងមុខជំនួញផ្ទាល់ខ្លួនថ្មីនាងក៏បានធ្វើឲ្យគេចាប់អារម្មណ៍ជាមួយនឹងភាពល្អូកល្អឺនប្លែកជាមួយបុរសម្នាក់ហើយជាញឹកញាប់នាងតែព្រលយនូវពាក្យស្នេហាផ្អែមល្ហែមជាមួយបុរសនោះផងដែរ ។ អ្នកសិល្បៈដែលស្និទ្ធិនឹងនាងបានស្ងប់ស្ងែងនឹងស្នេហាថ្មីនេះ ប៉ុន្តែមិនមានអ្នកដឹងលម្អិតអំពីអត្តសញ្ណាណគូស្នេហ៍ថ្មីនេះនៅឡើយ ។

ជុំវិញបញ្ហានេះអាណូហាក់លាក់លៀម និងទទួលស្គាល់ខ្លះៗអំពីការលេចចេញដំណឹងខាងលើ។ នាងថា បុរសម្នាក់នោះគឺនាងកំពុងស្វែងយល់ចិត្តនៅមិនទាន់ចាត់ទុកជាសង្សាបណ្តូលចិត្តនៅឡើយ។ នាងមិនបញ្ជាក់លម្អិតអំពីសាវតារបស់បុរសនោះទេ ប៉ុន្តែនាងសសើរថាបុរសម្នាក់នោះយល់ចិត្ត និងផ្តល់តម្លៃខ្លាំងសម្រាប់នាង ហើយក៏ជាបុរសដែលមិនជាប់ពាក់ព័ន្ធនឹងស្ត្រីណានោះដែរ។ នាងថារឿងពីមុនសុំមិននិយាយហើយពេលនេះសុំស្វែងយល់ចិត្តបុរសម្នាក់នេះសង្ឃឹមថាអាចនឹងដើរផ្លូវរួមគ្នាបាននៅពេលអនាគត។ ទោះជាយ៉ាងណានាងមិនទាន់នឹកនាដល់ការចូលរោងការនោះទេ ព្រោះតែពេលនេះនាងត្រូវការការពង្រីកមុខរបរ និងគ្រប់គ្រងឲ្យកាន់តែមានដំណើរការល្អទៅមុខ រឿងរៀបការគឺនៅពេលក្រោយ ៕ វឌ្ឍនា