សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បន្ទាប់ពីមានខ្យល់បក់បោកខ្លាំងមួយប្រាវ បានធ្វើឲ្យស្លាកប៉ាណូ ក្រុមហ៊ុន Pepsi បាក់សង្កត់រថយន្តម៉ាកកូរ៉ូឡា ១គ្រឿងចតនៅចិញ្ជើមផ្លូវក្បែររងការខូចខាតរថយន្តស្ទើទាំងស្រុង និងបាក់បង្គោលភ្លើង១ដើមថែមទៀត ប៉ុន្តែសំណាងល្អមិនបណ្ដាលឲ្យមានអ្នករងរបួសនោះទេ ។
ករណីខាងលើនេះ បានកើតឡើងកាលពីវេលាម៉ោង៤ល្ងាចថ្ងៃទី០៦ ខែ មិថុនា ឆ្នាំ២០១៧ នៅចំណុចផ្លូវ២៨៩ កែងផ្លូវ៥៦៦ មុខសាលាបឋមសិក្សាទួលគោក ស្ថិតក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។
ប្រភពព័ត៌មានពីកន្លែងកើតបានឲ្យដឹងថា នៅមុនពេល ផ្លាកប៉ាណូ ក្រុមហ៊ុន Pepsi បាក់ ឃើញមានខ្យល់បក់ខ្លាំង ហើយផ្គួបផ្សំ និងផ្លាកប៉ាណូ មានការចាប់ប៉ូឡុង ខ្លីផងនោះ ក៏បណ្ដាលឲ្យបាក់ សង្កត់រថយន្ត១គ្រេឿងម៉ាក កូរ៉ូឡា ពណ៌ស្ករ ពាក់ស្លាកលេខ ភ្នំពេញ ២J-៧២៩៣ បណ្ដាលឲ្យខូចខាតដំបូលខាងលើស្ទើទាំងស្រុង និងបណ្ដាលឲ្យបាក់បង្គោលភ្លើង១ដើមថែមទាំងទៀត។
ចុងក្រោយសមត្ថកិច្ចមូលដ្ឋាន បានចុះមកដល់កន្លែងកើតហេតុ ហើយក៏បានសួរនាំម្ចាស់រថយន្ត រួចបានណែនាំឲ្យម្ចាស់រថយន្ត ដាក់ពាក្យបណ្ដឹងនៅសាលាសង្កាត់ ដើម្បី ដោះស្រាយគ្នា រវាងម្ចាស់រថយន្តនិងក្រុមហ៊ុន៕ ស តារា
