បាញ់ប្រហារជាប្រវត្តិសាស្ត្រនៅអាមេរិក ស្លាប់និងរបួសជិត៣០០នាក់ ជនដៃដល់មានយុ៦៤ឆ្នាំ

ខ្មាន់កាំភ្លើងបាញ់ប្រហារយ៉ាងចាស់ដៃ ដោយប្រើប្រាស់កាំភ្លើងយន្ត បាញ់ប្រហារ អស់៣បង់ទៅលើហ្វូងមនុស្សកំពុងតែសប្បាយនឹងការប្រគំតន្ត្រី កណ្តាលវាលក្នុងទីក្រុងឡាស វីហ្គាស អាមេរិក បណ្តាលឲ្យមនុស្ស ជាង ៥០នាក់ស្លាប់ និង ជាង២០០នាក់រងរបួស។ ជនដៃដល់ ត្រូវបានប៉ូលិស បញ្ជាក់អត្តសញ្ញាណ គឺមានឈ្មោះ Stephen Paddock អាយុ៦៤ឆ្នាំ។

ការបាញ់ប្រហារកើតឡើង នៅវេលាម៉ោង២២និង៣០នាទីថ្ងៃទី១ ខែតុលា ក្នុងពិធីប្រគំតន្ត្រីនៅទីក្រុងឡាសវីហ្គាស។ ក្រុមប៉ូលិសពិសេស បានសម្រុកចូល ក្នុងបន្ទប់ ជនដៃដល់នៅជាន់ទី៣២ នៃអគារសណ្ឋាគារ និងកាស៊ីណូ Mandala Bay ហើយបាញ់សម្លាប់តែម្តង។ ស្នងការប៉ូលិស លោក Lombardo បានបញ្ជាក់ថា ការបាញ់ប្រហារ ពីជាន់ទី៣២នៃអគារ ដោយប្រើកាំភ្លើងយន្ត ទៅលើហ្វូងមនុស្សកំពុងតែទស្សនាការប្រគំតន្ត្រី។ មកទល់ពេលនេះ មិនទាន់ដឹង ពីមូលហេតុ ដែលជនដៃដល់បើកការបាញ់ប្រហារយ៉ាងសាហាវព្រៃផ្សៃបែបនេះឡើយ។

ជនដៃដល់ Paddock បានប្រើប្រាស់កាំភ្លើងយន្តអាចសម្លាប់មនុស្សច្រើនជាងកាំភ្លើងធម្មតា ។ ស្នងការប៉ូលិស ឡាសវីហ្គាសបានបញ្ជាក់ថា ជនដៃដល់ជាមនុស្សមកពីរដ្ឋ Nevada ។ លោក Lombardo បានឲ្យដឹងថា «យើងជឿងជាក់ថា មានជនដៃដល់បាញ់ប្រហារនោះតែម្នាក់ប៉ុណ្ណោះ មិនមានបក្ខពួកណាមួយផ្សេងទៀតឡើយ»។

ប្រធានាធិបតីអាមេរិក ដូណាល់ ត្រាំបាន ចូលរួមរំលែកទុក្ខដល់គ្រួសារជនរងគ្រោះក្នុងការបាញ់ប្រហារយ៉ាងព្រៃផ្សៃខាងលើ និងជាប្រវត្តិសាស្ត្រ អាមេរិក មិនធ្លាប់មានចាប់តាំងពីឆ្នាំ១៩៤៩មកទល់ពេលនេះ។

នៅពេលនេះ ប៉ូលិសមិនទាន់កំណត់អត្តសញ្ញាណ ជនរងគ្រោះក្នុងការបាញ់ប្រហារនោះនៅឡើយ អាចនឹងមានជនជាតិផ្សេងៗជាច្រើន រងគ្រោះក្នុងហេតុការណ៍នោះ៕ ម៉ែវ សាធី