សារព័ត៌មាន នគរវត្ត តែងតែនាំមុខគេជានិច្ច
នៅពេលនេះ ក្រុមហ៊ុនអាកាសចរណ៍របស់អង់គ្លេស បានសម្រេចផ្អាកជើងហោះហើរ ទៅកាន់ប្រទេសអេហ្ស៊ីប ជាបណ្តោះអាសន្ន ដោយខ្លាចមានបញ្ហាកើតឡើងក្រោយ រដ្ឋាភិបាលអេហ្ស៊ីប បន្តដាក់ប្រទេសនៅក្នុងគ្រាអាសន្នបន្ថែម៣ខែទៀត ។
កាលពីថ្ងៃទី២១ ខែកក្កដា British Airways ប្រកាសតាមរយៈសំបុត្រជាច្រើន ផ្ញើជូនអតិថិជន និងអ្នកដំណើររបស់ខ្លួន ។ ប៉ុន្តែមិនបានបញ្ជាក់អ្វីលម្អិតឡើយ ហើយក៏មិនទាន់មានសេចក្ដីថ្លែង ការណ៍ផ្លូវការណ៍ណាមួយពីក្រុមហ៊ុនអាកាសចរណ៍មួយនេះដែរ ។
គួរជម្រាបថា ក្រុមហ៊ុនអាកាសចរណ៍អាល្លឺម៉ង់ Lufthansa កាលពីថ្ងៃសៅរ៍ ក៏បានសម្រេចចិត្ត ដូច British Airways ផងដែរ ។ តែបើតាមអ្នកនាំពាក្យម្នាក់របស់ក្រុមហ៊ុននេះ ជើងហោះហើរ ទៅកាន់ទីក្រុងគែរ នឹងដំណើរការឡើងវិញនៅថ្ងៃអាទិត្យនេះ ។
កន្លងមកថ្មីៗ ប្រធានាធិបតីអេហ្ស៊ីប លោកAbdel Fattah Sisi បានចុះហត្ថលេខាលើក្រឹត្យមួយ ដាក់ប្រទេសស្ថិតនៅក្នុងគ្រាអាសន្នចំនួន៣ខែបន្ថែមទៀត ។ នេះបើតាមប្រព័ន្ធផ្សព្វផ្សាយអេហ្ស៊ីបបានផ្សាយ ។ ការសម្រេចចិត្តរបស់លោកប្រធានាធិបតីបែបនេះ ត្រូវគេរាយការណ៍ថា ទទួលការយល់ព្រមពីសភាជាតិ ហើយនឹងចូលជាធរមានចាប់ពីថ្ងៃព្រហស្បតិ៍ ទី២៥ ខែកក្កដា ឆ្នាំ២០១៩ ខាងមុខនេះតទៅ ។
ក្រឹត្យនោះបានបញ្ជាក់ថា កងកម្លាំងប្រដាប់អាវុធ និងប៉ូលិស មានសិទ្ធិគ្រប់យ៉ាងប្រយុទ្ធប្រឆាំងក្រុមភេរវកម្ម និងបណ្តាញហិរញ្ញវត្ថុរបស់ក្រុមភេរវកម្ម ព្រមទាំងការពារអាយុជីវិត និងទ្រព្យសម្បត្តិផលប្រយោជន៍ជាតិ ។ សារព័ត៌មាន MENA ផ្សាយបែបនេះកាលពីព្រលប់ថ្ងៃអាទិត្យ ទី២១ ខែកក្កដា ឆ្នាំ២០១៩ ។
ការប្រកាសដាក់រដ្ឋស្ថិតនៅគ្រាអាសន្នរបស់អេហ្ស៊ីប បានចាប់ផ្តើមនៅក្នុងខែមេសា ឆ្នាំ២០១៧មកម្ល៉េះ ក្រោយការវាយប្រហារភេរវកម្មទៅលើព្រះវិហារគ្រឹស្ទ នៅតាមទីក្រុងទាំងឡាយដូចជានៅទីក្រុង Tanta ហើយនិងទីក្រុង Alexandria សម្លាប់មនុស្សជាង៥០នាក់ និងរបួស១០០នាក់ ។
ក្រុមឧទ្ទាមអិស្លាមជ្រុលនិយម បានគោលដៅយូរអង្វែងទៅលើកងកម្លាំងសន្តិសុខក្នុងប្រទេសអេហ្ស៊ីប ជាពិសេសនៅឧបទ្វីប Sinai តែម្តង ។ រដ្ឋាភិបាលអេហ្ស៊ីបបានធ្វើប្រតិបត្តិការទ្រង់ទ្រាយធំនៅតំបន់ North Sinai ប៉ុន្មានឆ្នាំមកហើយដើម្បីកម្ចាត់បោសសម្អាតពួកប្រដាប់អាវុធ ដោយសម្លាប់ និងចាប់ខ្លួនមនុស្សរាប់រយនាក់ ។
ថ្មីៗបំផុតនេះ ការវាយប្រហារគ្រាប់បែកអត្តឃាតមួយកាលពីថ្ងៃទី១៨ ខែកក្កដា ឆ្នាំ២០១៩ ហើយដែលគេរាយការណ៍ថា បណ្តាលឲ្យស្លាប់ទាហានម្នាក់ផងដែរ ក្នុងការវាយប្រហារមកលើកងកម្លាំងសន្តិសុខរដ្ឋាភិបាលស្ថិតនៅតំបន់ North Sinai ។ កាលណោះ បុរសម្នាក់ពាក់គ្រាប់បែក សម្រុកចូលកាន់ទីតាំងសន្តិសុខ នៅជិតទីក្រុង Sheikh Zuweid បង្ខំឲ្យប៉ូលិសបើកការបាញ់ប្រហារបានមុន ។ ក្រុមភេរវកម្ម Daesh បានប្រកាសទទួលស្គាល់ការវាយប្រហារគ្រាប់បែកនោះ ៕
