សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីអាមេរិកដូណាល់ ត្រាំ បានស្នើពិភាក្សាជាមួយ មេដឹកនាំកូរ៉េខាងជើង នោក្នុងឆ្នាំនេះតែម្តង ក្រោយពេលអាមេរិកដកទីប្រឹក្សាសន្តិសុខមាន ទស្សនៈប្រឆាំងអាមេរិកចេញពីតំណែង ។ នៅពេលជាមួយគ្នានេះ អាមេរិកក៏បានដាក់ទណ្ឌកម្មទៅលើក្រុមហ៊ុន អ៊ីនធើណេត កូរ៉េខាងជើងចំនួន៣ ។
ប្រធានបទនៅក្នុងកិច្ចពិភាក្សា រវាងអាមេរិក និងកូរ៉េខាងត្បូង គឺជារឿងសំខាន់បំផុត ពាក់ព័ន្ធដល់ជោគវាសនា ឧបទ្វីបកូរ៉េទាំងមូល ។ទាំងនោះហើយបានជា ប្រធានាធិបតីកូរ៉េខាងត្បូង ចង់ជួបជាមុន ជាមួយប្រថានាធិបតីដូណាលត្រាំ ស្តីពីបញ្ហា ពាក់ព័ន្ធ។ តាមគម្រោង មេដឹកនាំកូរ៉េខាងត្បូងនិងអាម៉េរិក នឹងជួបពិភាក្សាគ្នា នៅចុងខែនេះ នៅឯអង្គការសហប្រជាជាតិ មុនពេលអាម៉េរិក បន្តចាប់ផ្តើមពិភាក្សាឡើងវិញ ជាមួយកូរ៉េខាងជើង ស្តីអំពីបញ្ហារំសាយកម្មវិធីអាវុធនុយក្លេអ៊ែរ នៅលើឧបទ្វីកូរ៉េ។
ខុទ្ទកាល័យប្រធានាធិបតីកូរ៉េខាងត្បូង នៅថ្ងៃទី១៣ ខែកញ្ញា ឆ្នាំ២០១៩ បានបញ្ជាក់ថា លោក មូន ចេអីន (Moon Jae-in) និងលោក ដូណាល់ ត្រាំ នឹងជួបពិភាក្សាគ្នា នៅឯអង្គការសហប្រជាជាតិ ក្នុងដំណាច់ខែកញ្ញា ឆ្នាំ២០១៩ នេះ។
លោកស្រី កូ មីនជុង ( Ko Min-jung) អ្នកនាំពាក្យខុទ្ទកាល័យប្រធានាធិបតីកូរ៉េខាងត្បូង បានថ្លែងថា រដ្ឋាភិបាល នៃប្រទេសទាំងពីរ កំពុងតែស្វែងរកពេលវេលាណាមួយសមស្រប ដើម្បីធ្វើឲ្យមេដឹកនាំទាំងពីរជួបពិភាក្សាគ្នា នៅ អំឡុងពេលលោកប្រធានាធិបតី មូន ទៅកាន់ទីក្រុងញូវយ៉ក ដើម្បីចូលរួមប្រជុំពេញអង្គរបស់អង្គការសហប្រជាជាតិ ។
សូមបញ្ជាក់ថា ការប្រកាសផ្សាយខាងលើនេះ បានកើតឡើងប៉ុន្មានថ្ងៃប៉ុណ្ណោះ ក្រោយពីកូរ៉េខាងជើង បានអះអាងអំពីចេតនា បន្តកិច្ចពិភាក្សារំសាយអាវុធនុយក្លេអ៊ែរជាមួយសហរដ្ឋអាម៉េរិកនៅក្នុងខែនេះ ។
កិច្ចពិភាក្សារំសាយអាវុធនុយក្លេអ៊ែរបានជាប់គាំង ក្រោយជំនួបបរាជ័យកាលពីខែកុម្ភៈ ឆ្នាំ២០១៩ រវាងលោក ត្រាំ និងលោក គីម ជុងអ៊ុន។ ប៉ុន្តែភាគីទាំងពីរ បានយល់ព្រមសង្គ្រោះកិច្ចចរចានេះឡើងវិញ ខណៈមេដឹកនាំទាំងពីរ បានជួបគ្នា កាលពីខែមិថុនា ឆ្នាំ២០១៩ នៅឯព្រំដែនអន្តរកូរ៉េ ។
លោក ត្រាំ បានថ្លែង កាលពីថ្ងៃទី១២ ខែកញ្ញា ឆ្នាំ២០១៩ថា លោកអាចមានជំនួបពិភាក្សាគ្នាទៀតជាមួយមេដឹកនាំកូរ៉េខាងជើងនៅក្នុងដំណាច់ឆ្នាំនេះ។ ជំនួបលើកទីបួននេះ អាចនឹងកើតឡើង បន្ទាប់ពីជំនួប កាលពីថ្ងៃទី១២ ខែមិថុនា ឆ្នាំ២០១៨ នៅប្រទេសសិង្ហបុរី ហើយជំនួបទី២ នៅថ្ងៃទី២៨ ខែកុម្ភៈ ឆ្នាំ២០១៩ នៅទីក្រុងហាណូយ ប្រទេសវៀតណាម និងលើកទី៣ នៅថ្ងៃទី៣០ មិថុនា ឆ្នាំ២០១៩ នៅព្រំដែនរវាងកូរ៉េទាំង២ មិនបានសម្រេចកិច្ចព្រមព្រៀងណាមួយ ស្ដីអំពីការរំសាយអាវុធបរមាណូ។
ចំណែកកូរ៉េខាងជើង វិញ រដ្ឋាភិបាលកូរ៉េខាងជើង បានប្រកាស ថា ខ្លួនត្រៀមបន្តកិច្ចពិភាក្សា ជាមួយសហរដ្ឋអាម៉េរិក នៅដំណាច់ខែកញ្ញានេះ ។ មេដឹកនាំកូរ៉េខាងជើង លោកគឹម ជុងអ៊ុន បានអំពាវនាវរកការបត់បែនបន្ថែមពីទីក្រុងវ៉ាស៊ីនតោន ជាពិសេសទៅលើបញ្ហាទណ្ឌកម្មសេដ្ឋកិច្ច ក្នុងអំឡុងពេលកិច្ចពិភាក្សាបានជាប់គាំង រវាងទីក្រុងព្យុងយ៉ាង និងសហរដ្ឋអាម៉េរិកនោះ ។
ក្រសួងរតនាគាររបស់ សហរដ្ឋអាម៉េរិកបានចេញផ្សាយ ប្រកាសដាក់ទណ្ឌកម្មថ្មី ទាក់ទងទៅនឹងកូរ៉េខាងជើង ដោយគោលដៅមួយដងនេះគឺសំដៅទៅលើក្រុមហ៊ុ អ៊ីនធើណេតចំនួន៣ដែលគ្រប់គ្រង ឬឧបត្ថម្ភ គាំទ្រដោយរដ្ឋកូរ៉េខាងជើង ។ នេះបើតាម គេហទំព័រ របស់ក្រសួងរតនាគារសហរដ្ឋអាម៉េរិក ។
ការដាក់ទណ្ឌកម្មនោះ គឺបានដាក់ទៅលើ ក្រុមហ៊ុន ចំនួន៣ រួមមានៈ ទីមួយ ក្រុមហ៊ុនLazarus Group ទីពីរ ក្រុមហ៊ុន Bluenoroff និងទីបី ក្រុមហ៊ុនAndariel ដែលក្រសួងរតនាគារសហរដ្ឋអាម៉េរិក ចាត់ទុកថា ជាក្រុមហ៊ុនចោរលួចតាមប្រព័ន្ធអ៊ីនធើណេត ។
ក្រសួងរតនាគារសហរដ្ឋអាម៉េរិក បានអះអាងនៅក្នុងសេចក្តីថ្លែងការណ៍មួយថា ក្រុមហ៊ុន វាយប្រហារតាមបណ្ដាញអ៊ីនធើណេត ឧបត្ថម្ភដោយរដ្ឋកូរ៉េខាងជើង គឺជាអ្នកទទួលខុសត្រូវសកម្មភាព វាយប្រហារ តាមអ៊ីនធើណេតទៅលើហេដ្ឋារចនាសម្ព័ន្ធសំខាន់ៗ ។ ក្រសួងរតនាគារសហរដ្ឋអាម៉េរិក បានបន្ថែមថា ក្រុមហ៊ុនទាំងបីនេះ បានគ្រប់គ្រងទាំងមូលលើរដ្ឋាភិបាលកូរ៉េខាងជើង ។
សូមបញ្ជាក់ថា ក្រសួងរតនាគារសហរដ្ឋអាម៉េរិក ចេញប្រកាសដូច្នេះ បន្ទាប់ពីកូរ៉េខាងជើង បានបាញ់សាកល្បងមីស៊ីល ចំនួន២គ្រាប់ ឆ្ពោះទៅកាន់សមុទ្រជប៉ុន តែមួយថ្ងៃប៉ុណ្ណោះ បន្ទាប់ពីរដ្ឋាភិបាលប្រទេសនេះ បានប្រកាសថា ខ្លួនត្រៀមលក្ខណៈបន្តពិភាក្សា ជាមួយសហរដ្ឋអាម៉េរិក នៅចុងខែកញ្ញានេះ ។
ស្ថានការណ៍នៅឧបទ្វីបកូរ៉េ មានការរីកចម្រើនគួរឲ្យកត់សម្គាល់ កាលពីឆ្នាំមុន បន្ទាប់ពីមេដឹកនាំកូរ៉េខាងជើង លោកគឹម ជុងអ៊ុន បាន ជួបពិភាក្សា ជាមួយលោកម៉ូន ជេអីន ប្រធានាធិបតីកូរ៉េខាងត្បូង ហើយនិងលោក ដូណាល់ ត្រាំ ប្រធានាធិបតីសហរដ្ឋអាម៉េរិក ។
កាលពីខែមិថុនា ឆ្នាំ២០១៨ លោកគីម និងលោកត្រាំ បានឈានដល់កិច្ចព្រមព្រៀងមួយ ដែលកំណត់ថា កូរ៉េខាងជើង នឹងខិតខំប្រឹងប្រែងឆ្ពោះទៅរក ការរំសាយកម្មវិធីអាវុធនុយក្លេអ៊ែរពីឧបទ្វីបកូរ៉េ ជាថ្នូរនឹងការបញ្ឈប់សមយុទ្ធយោធារវាងកូរ៉េខាងត្បូង និងសហរដ្ឋអាម៉េរិក ព្រមទាំងដកទណ្ឌកម្មសេដ្ឋកិច្ចខ្លះពីសហរដ្ឋអាម៉េរិក ។
ទោះបីយ៉ាងណាក៏ដោយ ដំណើរការពិភាក្សា បានជាប់គាំងនៅក្នុងឆ្នាំនេះ ដោយស្ថានការណ៍កំពុងតានតឹង ចំពោះកូរ៉េខាងជើង ដែលបានបន្តបាញ់សាកល្បងកាំជ្រួចមីស៊ីល មិនព្រមឆ្អែតឆ្អន់នោះ៕
