សារព័ត៌មាន នគរវត្ត តែងតែនាំមុខគេជានិច្ច
ចិនបានបន្ថែមរារាំងមិនឲ្យមានចរាចរណ៍ឆ្លងកាត់នៅទូទាំងទីក្រុងចំនួន១០ នៅក្នុងខេត្ត Hubei ទីកន្លែងដែលផ្ទុះឡើងនូវជំងឺរលាកសួតប្រភេទថ្មី ឬកូរ៉ូណាវីរុស (coronavirus) ដ៏ឆ្លងរាលដាលនោះ ខណៈជំងឺនេះ បានសម្លាប់មនុស្សកើនឡើង២៦នាក់ ។ ជំងឺនេះផ្ទុះឡើងដំបូងគេនៅខែកញ្ញា ឆ្នាំ២០១៩ រហូតមកដល់ពេលនេះ ផ្ទុះរាលដាលទ្រង់ទ្រាយធំ រហូតដល់ប្រទេសមួយចំនួន ។
ការប្រកាសឲ្យផ្អាកចរាចរណ៍របស់អាជ្ញាធរចិនបានបង្កឲ្យប៉ះពាល់ដល់ពលរដ្ឋប្រហែល២០លាននាក់ នៅទូទាំងទីក្រុងចំនួន១០ ក្នុងនោះមានទីក្រុងវូហាន ទីដែលផ្ទុះឡើងនូវជំងឺនេះដំបូងគេផងដែរ ។
កាលពីថ្ងៃទី២៣ ខែមករា អ្នកជំងឺម្នាក់ ស្ថិតនៅភាគខាងជើងខេត្ត Hubei បានបាត់បង់ជីវិតដោយសារជំងឺកូរ៉ូណាវីរុសនេះ ក្លាយជាអ្នកជំងឺដំបូងគេដែលបានបាត់បង់ជីវិតនៅខាងក្រៅខេត្តHubei ។
អ្នកជំងឺដទៃផ្សេងទៀតត្រូវបានរាយការណ៍ថាបានស្លាប់ស្ថិតនៅតំបន់ខាងជើងឆៀងខាងកើតខេត្ត Heilongjing ខេត្តមួយជាប់ព្រំដែនជាមួយប្រទេសរុស្ស៊ី និងមានចម្ងាយប្រហែល២ពាន់គីឡូម៉ែត្រពីទីក្រុងវូហាន (Wuhan) ។
នៅទូទាំងប្រទេសចិន នាពេលបច្ចុប្បន្នថ្ងៃទី២៣ ខែមករា ឆ្នាំ២០២០ បានរកឃើញអ្នកជំងឺផ្ទុកវីរុសរលាកសួតប្រភេទថ្មីនេះ ចំនួន៨៣០ករណី ។
ជំងឺនេះក៏ត្រូវបានរកឃើញនៅក្រៅប្រទេសចិនផងដែរ ក្នុងនោះមានប្រទេសថៃ, អាមេរិក, តៃវ៉ាន់ កូរ៉េខាងត្បូង, ជប៉ុន, វៀតណាម និងសិង្ហបុរី ។
អាជ្ញាធរចិនបានបញ្ឈប់ការចរាចរណ៍នៅពេលនេះ ចំពេលពិធីបុណ្យចូលឆ្នាំថ្មី ដែលជាពិធីដ៏សំខាន់សម្រាប់ប្រជាជនចិនរាបលិបលាននាក់ធ្វើដំណើរវិលត្រឡប់ទៅស្រុកកំណើតដើម្បីជួបជុំក្រុមគ្រួសារសាទរឆ្នាំថ្មី ។
រិតបន្តឹងការធ្វើចរាចរបែបនេះគឺមានលក្ខណៈខុសគ្នាពីទីក្រុងមួយទៅកាន់ទីក្រុងមួយ ។
ទីក្រុងវូហាន ត្រូវបានបិទចរាចរទាំងស្រុង គឺរាល់ការធ្វើដំណើរតាមរថយន្តក្រុង, តាមរថភ្លើងក្រោមដី, តាមស្រឡាងផងដែរ ក៏ត្រូវបានប្រកាសឲ្យផ្អាក ទាំងចេញដំណើរ និងត្រឡប់មកវិញ ។ ជើងហោះចេញពីទីក្រុងនេះ ក៏ដូចជាតាមផ្លូវរថភ្លើងត្រូវលុបចោលទាំងស្រុង ។
ពលរដ្ឋរស់នៅក្នុងតំបន់ត្រូវបានផ្តល់ដំបូន្មានឲ្យស្ថិតនៅតែក្នុងផ្ទះ ហើយការបិទផ្លូវក៏បានកើតឡើងផងដែរ ។
តំបន់ប្រជុំ Ezshou ដែលជារដ្ឋធានីតូចមួយនៅក្នុងខេត្ត Hubei បានប្រកាសបិទស្ថានីយរថភ្លើង ។ ទីក្រុង Enshi បានផ្អាករាលការដឹកជញ្ជូនតាមរថយន្តក្រុងទាំងអស់ ។
អាជ្ញាធរនៅទីក្រុងប៉េកាំង និងសៀងហៃ បានស្នើឲ្យប្រជាជនដែលបានវិលត្រឡប់មកពីតំបន់ដែលផ្ទុះជំងឺឆ្លងនោះឲ្យស្ថិតនៅតែក្នុងផ្ទះរយៈពេល១៤ថ្ងៃ ដើម្បីបង្ការការឆ្លងវីរុស ។ នេះបើតាមការផ្សាយរបស់ប្រព័ន្ធផ្សព្វផ្សាយនៅក្នុងតំបន់ ៕
