ភ្នំពេញ៖ បុរសម្នាក់បើករថយន្តលឿន ជ្រុលទៅបុកបង្កាន់ដៃស្ពានអាកាសផ្សារដីហុយពេញទំហឹង រួញមុខជាប់ទៅមុខលែងរួច។
ហេតុការណ៍នេះ បានកើតទ្បើងកាលពីម៉ោង ១០យប់ថ្ងៃទី៥ ខែមីនា ឆ្នាំ២០២០ នៅតាមបណ្ដោយផ្លូវសហព័ន្ធរុស្ស៊ី គល់ស្ពានអាកាសផ្សារដីប៉ែកខាងលិច ស្ថិតក្នុងសង្កាត់អូបែកក្អម ខណ្ឌសែនសុខ រាជធានីភ្នំពេញ។
ប្រភពពត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ បើករថយន្តម៉ាកតូយ៉ូតាហាយឡែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ 2AS-5509 ទើបចេញពីកម្មវិធីខួបកំណើត នៅកោះពេជ្រ បំណងបើកត្រលប់ទៅផ្ទះវិញ។ ដោយធ្វើដំណើរ តាមបណ្ដោយផ្លូវសហព័ន្ធរុស្ស៊ី ក្នុងទិសដៅពីកើតទៅលិចយ៉ាងលឿន មកដល់ចំណុចកើតហេតុ បានរេចង្កូតជ្រុលទៅបុកបង្កាន់ដៃស្ពានអាកាសផ្សារដីហុយពេញទំហឹង បណ្តាលឲ្យរថយន្តរួចជាប់បង្កាន់ដៃស្ពានទៅមុខលែងរួច តែសំណាងល្អ មិនបង្កឲ្យមានមនុស្សរងរបួសនោះទេ។
បន្ទាប់ពីកើតហេតុសមត្ថកិច្ចមូលដ្ឋាន បានចុះដល់កន្លែងកើតហេតុទាក់ទងទៅជំនាញចរាចរមកស្ទូចរថយន្តយកទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅ ពេលក្រោយ៕ជ្រោយពេជ្រ
សារព័ត៌មាន នគរវត្ត តែងតែនាំមុខគេជានិច្ច
