ឃាត់ខ្លួនជនសង្ស័យ២នាក់រួមជាមួយថ្នាំញៀន៦៧កញ្ចប់

កណ្ដាល៖  ជនសង្ស័យ២នាក់ជាមុខសញ្ញាជួញដូរគ្រឿងញៀនយ៉ាងសកម្ម ត្រូវបានសមត្ថកិច្ចនគរបាលស្រុកពញាឮធ្វើការឃាត់ខ្លួន និងដកហូតថ្នាំញៀនចំនួន៦៧កញ្ចប់ ។ ករណីនេះ ធ្វើឡើងកាលពីវេលាម៉ោង១០និង៣០នាទី ថ្ងៃទី១១ ខែមិនា ឆ្នាំ២០២០ លើផ្លូវលំ ស្ថិតក្នុងភូមិតាអោក ឃុំឈ្វាំង  ស្រុកពញាឮ ខេត្តកណ្តាល ។
មន្រ្ដីនគរបាលស្រុកពញាឮបានឲ្យដឹងថា ជនសង្ស័យចាប់ខ្លួនបានឈ្មោះ នួន សុភក្រ័ ភេទប្រុស អាយុ១៩ឆ្នាំ ជនជាតិខ្មែរ  មុខរបរកម្មករ មានទីលំនៅភូមិព្រៃផ្ចឹក ឃុំឈ្វាំង ស្រុកពញាឮ ខេត្តកណ្តាល និងម្នាក់ទៀតឈ្មោះ ឌុច ដាឡន ភេទប្រុស អាយុ២០ឆ្នាំ ជនជាតិខ្មែរ មុខរបរកម្មករ មានទីលំនៅភូមិក្តី ឃុំសង្គរ ស្រុកកងមាស ខេត្តកំពង់ចាម ។ ចំណែកវត្ថុតាងដកហូតបានមាន៖ថ្នាំញៀនចំនួន៦៧កញ្ចប់តូច ,ទូរស័ព្ទដៃ១គ្រឿង ,ម៉ូតូចំនួន១គ្រឿង និងឧបករណ៏សម្រាប់វេចខ្ចប់សារធាតុញៀនមួយចំនួនផងដែរ ។
ប្រភពដដែលបន្ដថា នៅមុនពេលកើតហេតុ កម្លាំងនគរបាលជំនាញស្រុក បានទទួលព័ត៌មានច្បាស់ការថា ជនសង្ស័យទាំង២នាក់ខាងលើកំពុងធ្វើសកម្មភាពជួញដូរគ្រឿងញៀននៅចំណុចភូមិ/ឃុំកើតហេតុខាងលើ ភ្លាមនោះក៏សហការជាមួយនគរបាលប៉ុស្ដិ៍រដ្ឋបាលឈ្វាំង ចុះធ្វើការឃាត់ខ្លួនជនសង្ស័យ២នាក់ និងឆែកឆេរបានរកឃើញថ្នាំញៀន៦៧កញ្ចប់ រួមទាំងវត្ថុតាងពាក់ព័ន្ធយកមកអធិការដ្ឋាននគរបាលស្រុក ដើម្បីចាត់ការតាមច្បាប់ ។
នៅចំពោះមុខសមត្ថកិច្ច ជនសង្សយ័បានសារភាពថា    ថ្នាំញៀនទាំង៦៧កញ្ចប់តូចនេះ គឺពិតជារបស់ខ្លួនមែន ដោយទិញពីម្តុំប្រឡាយខាងលិចគល់ស្ពានព្រែកព្នៅ  ដោយឡើងទៅទិញម្តងៗអស់ប្រាក់ចំនួន១៥០ដុល្លារ ដើម្បីយកមកវេចខ្ចប់លក់១កញ្ចប់តូចតម្លៃ២ម៉ឺនរៀល ៕ ដោយ៖ស្អាងជ័យ