សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រឿងរ៉ាវចោទប្រកាន់ហែកហួរគ្នាធ្ងន់ៗរវាង តារាសម្តែងព្រីម មន្ថា និងតារាចម្រៀងជើងចាស់ សំប៉ូលីដា បានផ្ទុះឡើងក្រោយ អ្នកនាងសំប៉ូលីដា កើតទុក្ខមិនសុខចិត្តព្រោះតែរងការចោទថាបានលួចកាបូបម៉ាកល្បីមួយរបស់អ្នកនាង ព្រីមមន្ថា។ ករណីហែកកេរគ្នាបែកអូហូរស្ទឹងនេះគឺជាករណីដំបូងហើយបន្ទាប់ពីការស្នើរបស់សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជាស្នើឲ្យសិល្បករជេរគ្នាតាមហ្វេសប៊ុក។
សម្តេចនាយករដ្ឋមន្រ្ដី ហ៊ុន សែន កាលពីថ្ងៃទី៣ ខែមីនាឆ្នាំ២០២០ ក្នុងកម្មវិធីអបអរសាទរទិវាវប្បធម៌ជាតិ លើកទី២២ និងពិធីសំណេះសំណាលពិសាអាហារសាមគ្គី រវាងប្រមុខរាជរដ្ឋាភិបាល និងសិល្បករ សិល្បការិនី ក្រោបប្រធានបទ ”យុវវជនដើម្បីវប្បធម៌ជាតិ”ដែលរៀបចំនៅកោះពេជ្រ។សម្តេច មានប្រសាសន៍ស្នើសុំឲ្យសិល្បករសិល្បៈការិនី ២ចំណុច គឺទី១. កុំបង្ហាញភាពស៊ិចស៊ីហួសហេតុពេក និងទី២. កុំឈ្លោះគ្នាជេរគ្នាតាមហ្វេសប៊ុក។ សម្តេចហ៊ុន សែន បញ្ជាក់ថាការបង្ហាញភាពសិចស៊ីជ្រុលពេក នាំឲ្យប៉ះពាល់ដល់ដល់តម្លៃវប្បធម៌និងបង្ហាញពីកេរ្ដិ៍ខ្មាស ពិសេសគឺតារាស្រីៗតែម្ដង។ ចំណែកការឈ្លោះគ្នាតាមហ្វេសប៊ុក សម្តេចថា គឺមិនសមទាល់តែសោះសម្រាប់សិល្បករសិល្បៈការិនី ព្រោះពួកគេជាមនុស្សរបស់មហាជន ជាបុគ្គលសាធារណៈ ហេតុនេះហើយ សម្តេចសុំអង្វករសូមកុំឲ្យសិល្បករទាំងអស់ឈ្លោះគ្នាតាមហ្វេសប៊ុកទៀត ហើយបើមានរឿងអី គួររកដំណោះស្រាយនិយាយគ្នាតាមទូរស័ព្ទ ឬជួបគ្នាផ្ទាល់តែម្ដងទៅ។
កាលពីរសៀលថ្ងៃទី១ ខែមេសា តារាកំប្លែងមាត់ឆៅ អ្នកនាង សំប៉ូលីដា បានព្រលះអតីតមិត្តរួមអាជីពម្នាក់ដែលនាងមិនបានបញ្ចេញឈ្មោះចំៗនោះទេ។ នៅក្នុងវីដេអូឡាយរយៈពេលជិត១ម៉ោងរបស់អ្នកនាង សំប៉ូ លីដា បានបង្ហាញថា រូបនាងត្រូវបាននារីម្នាក់ ចោទថានាងលួចកាបូបដៃដែលមានតម្លៃ៦០០ដុល្លារ។ ប៉ុន្តែអ្នកនាង សំប៉ូ លីដាបានបដិសេធទាំងស្រុង ហើយបានបន្តជេរប្រមាថចំៗទៅគូជម្លោះ។
ទោះជាយ៉ាងណាអ្នកដែលបានឃើញការបញ្ចេញកំហឹងរបស់នាងស្នើឲ្យអ្នកនាងសំប៉ូ លីដា បន្ថយកំហឹងដោយងាកមករកដំណោះស្រាយដោយសន្តិវិធី ឬផ្លូវច្បាប់។
អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ ស្នើឲ្យតារាកំប្លែង អ្នកនាង សំ ប៉ូលីដា និងដៃគូរជម្លោះ បញ្ឈប់សកម្មភាពជេរបញ្ចោរ និងហែកហួរគ្នាតាមបណ្ដាញសង្គមហ្វេសប៊ុក ធ្វើឲ្យប៉ះពាល់ដល់តម្លៃអ្នកសិល្បៈ។
ប្រធានសមាគម រូបនេះលើកឡើងថា“កន្លងមកគេមិនសូវឲ្យតម្លៃអ្នកសិល្បៈដែលមើលងាយអ្នកសិល្បៈដូចគ្នា ហើយបើយើងបង្ហាញពីទង្វើហ្នឹងទៀត រឹតតែធ្វើឲ្យគេមើលងាយ។ អីចឹងវានឹងប៉ះពាល់ដល់អ្នកសិល្បៈដ៏ទៃទៀតដែលគេពុំដែលមានទង្វើបែបនេះ“៕ ដោយ វឌ្ឍនា
