សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ រថយន្តកូរ៉ូឡាមួយគ្រឿងបោះពួយយ៉ាងលឿនដូចហោះស្ថិតក្នុងស្ថានភាពស្រវឹងជោកជាំស្រាប់តែរេចង្កូតធ្លាក់ប្រឡាយក្រឡាប់ផ្ងារជើងឡើងលើខ្ទៀតអ្នកបើកបរផ្លោងចេញមកក្រៅរងរបួសយ៉ាងធ្ងន់ធ្ងរ។
ហេតុការរថយន្តក្រឡាប់បង្ករឡេីងដោយខ្លួនឯងនោះបានកើតឡើងនៅវេលាម៉ោង ១៥.២៥ នាទីថ្ងៃទី៩ខែមេសាឆ្នាំ២០២០នៅលើកំណាត់ផ្លូវជាតិលេខ៧ ចន្លោះគីឡូម៉ែត្រលេខ៣៩៥.៣៩៦ ស្ថិតក្នុងភូមិអូគ្រៀង ឃុំអូរគ្រៀង ស្រុកសំបូរ ខេត្តក្រចេះ។
តាមប្រភពក្នុងហេតុការនោះគេឃើញរថយន្តម៉ាកកូរ៉ូឡា ពណ៏ខ្មៅ ពាក់ស្លាក់លេខ ភ្នំពេញ២l.២៥៣២ បោះពួយយ៉ាងលឿនរេចង្កូតធ្លាក់ចូលប្រឡាយពេញទំហឹងក្រឡាប់ផ្ងារជើងឡើងលើតែម្តង។
ឯអ្នកបើកបរខ្ទៀតផ្លោងចេញក្រៅហើយត្រូវបានអ្នកភូមិជួយលើករថយន្តឲ្យបញ្ឈរឡើងវិញនិងជួយហៅរថយន្តសង្រ្គោះបញ្ជូនជនរងគ្រោះទៅមន្ទីរពេទ្យបង្អែកភ្លាមៗផងដែរ។
អ្នកបេីកបរឈ្មោះចាន់ សុវណ្ណរ៉ា ភេទប្រុស អាយុ ២៧ ឆ្នាំ ជនជាតិខ្មែរ មានទីលំនៅភូមិអូរគ្រៀង ឃុំអូរគ្រៀង ស្រុកសំបូរ ខេត្តក្រចេះ ហើយបើកបរដំណើរទឹសដៅពីត្បូងទៅជើង ក្នុងស្ថានភាពស្រវឹងស្រាជោកជាំស្រាប់តែមកដល់ចំណុចកើតហេតុរថយន្តរេចង្កូតធ្លាក់ប្រឡាយក្រឡាប់ដោយខ្លួនឯងតែម្តង។
ហើយអ្នកបើកបរខ្ទៀតចេញក្រៅរថយន្ត រងរបួសយ៉ាងធ្ងន់ធ្ងរត្រូវបានក្រុមគ្រួសារដឹកបញ្ជូនទៅមន្ទីរពេទ្យបង្អែកខេត្តក្រចេះកំពុងសម្រាកព្យាបាលផងដែរ ៕ ដោយ ជីវ័ន្ត
