ទីតាំងលក់ថ្នាំពេទ្យក្លែងក្លាយនៅសង្កាត់បឹងទំពុន ត្រូវសមត្ថកិច្ច គណៈកម្មាធិការប្រយុទ្ធប្រឆាំងផលិតផលក្លែងក្លាយ ចុះបង្ក្រាប

ភ្នំពេញ៖ ក្រោមការសម្របសម្រួលពីលោក គុជ គីមឡុង ព្រះរាជអាជ្ញារងអមសាលាដំបូងរាជធានីភ្នំពេញ នៅរសៀលថ្ងៃទី១៧ ខែមេសា ឆ្នាំ២០២០នេះ សមត្ថកិច្ចក្រុមការងារលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលមានហានិភ័យខ្ពស់ ហៅកាត់ថា៖ (គ.ប.ផ.ក) បានសហការជាមួយ មន្ដ្រី សុខាភិបាល និងអាជ្ញាធរដែនដី បានចុះបង្ក្រាបទីតាំងលក់ថ្នាំពេទ្យមួយកន្លែង នៅសង្កាត់បឹងទំពុន ខណ្ឌមានជ័យ រាជធានីភ្នំពេញ។
មន្ដ្រីលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលមានហានិភ័យខ្ពស់ (គ.ប.ផ.ក) ឲ្យដឹងថា ៖ ការចុះបង្ក្រាបនេះ ដោយសារតែទីតាំងនេះលក់ថ្នាំខូចសុពលភាព, ខុសស្ដង់ដារ, ជិតខូចសុពលភាព និងថ្នាំដឹកក្រោមកម្ដៅ៣០ដឺក្រេ ធ្វើឲ្យខូចគុណភាពថ្នាំ។
តាមរបាយការណ៍៖ ជាលទ្ធផលក្នុងប្រតិបត្ដិការបង្ក្រាប ក្រុមការងារលេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលមានហានិភ័យខ្ពស់ បានធ្វើការដកហូតថ្នាំចំនួន ១៨មុខខូចគុណភាព និងចំនួន១២មុខទៀត មិនទាន់មានកញ្ចប់វេបខ្ចប់ត្រឹមត្រូវ។
ជាមួយគ្នានោះមន្រ្តីជំនាញ បានឲ្យដឹងថា រាល់ឱសថស្ដុក និងចែកចាយ នៅក្នុងទីតាំងនេះ ពុំបានអនុវត្ដតាមបច្ចេកទេស របស់ក្រសួងសុខាភិបាលទេ និងធ្វើឲ្យឱសថនោះ រក្សាក្នុងទីតាំងដូចជា៖
-ឱសថក្នុងឃ្លាំងមានសីតុណ្ណភាព២៩អស្សារសេ និងមានសត្វកណ្ដៀវធ្វើសំបុកកេះឱសថជាង១០០ប្រអប់។
-ឱសថដឹកតាមរថយន្ដមានសីតុណ្ណភាព៣៧អង្សារសេចំនួន១០កេស និង១៦ប្រអប់
-នៅក្នុងប្រអប់មិនមានការណែនាំរបៀបប្រើជាភាសាខ្មែរ រក្សាទុកថ្នាំហួសសុពលភាព និងជិតហួសសុពលភាព
-បញ្ជីការ៨២មុខ ក្នុងនោះ ហួសសុពលភាពចំនួន១៤មុខ។
-ក្រៅពីសម្ភារវត្ថុតាងខាងលើនេះ ពុំមានការដកហូតអ្វីទៀតឡើយ។
សូមបញ្ជាក់ថា៖ ទីតាំងលក់ថ្នាំពេទ្យ ខាងលើនេះ មានសហគ្រាសឈ្មោះ វ៉ាយ មេដ (ខេមបូឌា) អាស័យដ្ឋាន #២៧ ផ្លូវ ៥BT ភូមិសន្សំកុសល១ សង្កាត់បឹងទំពុនខណ្ឌមានជ័យ រាជធានីភ្នំពេញ។
នេះជាភាពគ្រោះថ្នាក់បំផុតដល់ប្រជាពលរដ្ឋ ដែលជាអ្នកប្រើប្រាស់ ខណៈឈ្មួញមានចេតនាទុច្ចរិត ធ្វើជំនួញគ្មានការ អនុលោម ទៅតាមបច្ចេកទេស ស្តង់ដារអនុញ្ញាតពីក្រសួងសុខាភិបាល ហើយទីតាំងនេះមានអត្តសញ្ញាណច្បាស់លាស់ គួរសមត្ថកិច្ចបន្តនីតិវិធីទៅលើម្ចាស់ទីតាំង នៃ ក្រុមហ៊ុនទៅតាមផ្លូវច្បាប់៕ ដោយ៖សហការី