សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ថ្នាក់ដឹកនាំក្រសួងអប់រំ យុវជន និងកីឡា បានជួបសំណេះសំណាល ព្រមទាំងប្រគល់ពានរង្វាន់គ្រូបង្រៀនល្អ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់លោកគ្រូ-អ្នកគ្រូចំនួន០៥នាក់ ដែលបានខិតខំប្រឹងប្រែងយ៉ាងអស់ពីកម្លាំងកាយចិត្តក្នុងការបំពេញការងារ ជាចំណែកក្នុងការលើកកម្ពស់ការអប់រំនៅកម្ពុជា។
គ្រូបង្រៀនល្អម្នាក់ៗ ទទួលបានពាន១ ប្រកាសណីយបត្រ ព្រមទាំងថវិកា ទៅតាមចំណាត់ថ្នាក់ដូចខាងក្រោម៖
– ចំណាត់ថ្នាក់លេខ១ ទឹកប្រាក់ចំនួន៥លានរៀល
– ចំណាត់ថ្នាក់លេខ២ ទឹកប្រាក់ចំនួន ៤លានរៀល
– ចំណាត់ថ្នាក់លេខ៣ ទឹកប្រាក់ចំនួន ៣លានរៀល
– ចំណាត់ថ្នាក់លេខ៤ ទឹកប្រាក់ចំនួន ៣លានរៀល
– ចំណាត់ថ្នាក់លេខ៥ ទឹកប្រាក់ចំនួន ៣លានរៀល។
ដោយឡែកម្ចាស់ជ័យលាភីនាយកសាលាល្អ គ្រូបង្រៀនល្អ គ្រូបង្រៀនថ្នាក់ទី១ ទី២ ទី៣ ភាសាខ្មែរ និងគណិតវិទ្យា និងសាលារៀនស្អាតចំនួន ១៨ រូប/អង្គភាពទៀត នឹងត្រូវប្រគល់ពានរង្វាន់ជូនពេលក្រោយទៀត។
ពិធីនេះបានប្រព្រឹត្តទៅក្រោមអធិបតីភាពលោក បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ សូមបញ្ជាក់ថា នេះជាលើកទី១ផងដែរ ដែលលោកគ្រូអ្នកគ្រូ បានចូលរួមថតវីដេអូមេរៀន បម្រើដល់កម្មវិធីសិក្សាពីចម្ងាយ និងតាមអេឡិចត្រូនិក ខណៈសាលារៀនត្រូវបានបិទទ្វារមួយរយៈ ដោយសារជំងឺកូវីដ-១៩៕ សហការី
