សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ប្រជាពលរដ្ឋម្នាក់បានប្រទះឃើញគ្រាប់បែកមិនទាន់ផ្ទុះមួយគ្រាប់នៅក្នុងដីចម្ការរបស់គាត់ខណៈដែលគាត់កំពុងជីករណ្តៅដីដាំបង្គោលរបងព័ទ្ធចម្ការ។
ភ្លាមៗនោះគាត់ក៏បានជូនដំណឹងទៅប៉ុស្តិ៍រដ្ឋបាលនគរបាលឃុំកោះពាក់ដើម្បីជួយធ្វើអន្តរាគមន៍។
ការប្រទះឃើញនោះគឺនៅថ្ងៃទី៩ ខែឧសភា ឆ្នាំ២០២០ស្ថិតក្នុងភូមិ ផាក់ណាម ឃុំកោះពាក់ ស្រុកវើនសៃខេត្តរតនគិរី។
ប្រជាពលរដ្ឋដែលប្រទះឃើញនោះឈ្មោះលុយ ជឺញ រស់នៅភូមិឃុំខាងលើបានរាយការណ៍ប្រាប់កម្លាំងនគរបាលប៉ុស្តិ៍រដ្ឋបាលឃុំកោះពាក់ហើយនគរបាលប៉ុស្តិ៍ក៏បានសហការជាមួយអង្គការ NPA ចុះត្រួតពិនិត្យដល់ទីកន្លែងភ្លាមៗតែម្តង។
ប្រភពពីសមត្ថកិច្ចនិងអង្គការ NPAដែល ចុះត្រួតពិនិត្យបានប្រាប់ថា គ្រាប់បែកនេះជាប្រភេទគ្រាប់MK-៨២ ឬហៅបែបសាមញ្ញថាគ្រាប់បែកB-៥២ ដែលបន្សល់ពីសម័យសង្គ្រាម។
ក្រោយពីធ្វើការពិនិតរួចរាល់មកក៏បានធ្វើការហ៊ុមព័ទ្ធ ដាក់បំរាមជុំវិញទីនោះដើម្បីរង់ចាំក្រុមជំនាញបច្ចេកទេសខាងប្រមូលគ្រាប់យុទ្ធភណ្ឌមិនទាន់ផ្ទុះរបស់អង្គការNPA ដែល នឹងមកដលក្នុងរយៈពេល៣ថ្ងៃខាងមុខដើម្បីចាត់ការបន្ត ៕ ដោយ៖ ជីវ័ន្ត
