និសិ្សត​ម្នាក់​ ត្រូវក្រុមចោរវាយប្លន់យកម៉ូតូមួយគ្រឿងបានសម្រេចនៅសង្កាត់បឹងទំពុន១​

ភ្នំពេញ៖ ជនសង្ស័យ២នាក់ជិះម៉ូតូមួយគ្រឿងប្រដាប់ដោយដែកគាស់១ដើម និងយកមួកសុវត្ថិភាពវាយទៅលើយុវជនជានិស្សិតម្នាក់ប្លន់យកម៉ូតូមួយគ្រឿងបានសម្រេចរួចជិះគេចខ្លួនបាត់ដោយសុវត្ថិភាព​ កាលពីវេលាម៉ោង១២​ និង៤០នាទីយប់រំលងអាធ្រាតឈានចូលថ្ងៃទី២៤​ ខែឧសភា​ ឆ្នាំ២០២០ នៅចំណុចមុខផ្ទះ៣៣ តាមបណ្តោយផ្លូវលេខបេតុងលេខ៧៧BT ដែលស្ថិតក្នុងភូមិចំរើនផល១ សង្កាត់បឹងទំពុន១ ខណ្ឌមានជ័យ។

​     ជនរងគ្រោះមានឈ្មោះ ចន សុខប្រណិត អាយុ ២២ឆ្នាំមានមុខរបរជានិស្សិតស្នាក់នៅបន្ទប់ជួលកន្លែងកើតហេតុ មានស្រុកកំណើតនៅស្រុកកំពង់ត្របែក ខេត្តព្រៃវែង ។

​     តាមសំដីរបស់ជនរងគ្រោះដែលត្រូវក្រុមជនសង្ស័យវាយប្លន់យកម៉ូតូប្រាប់ឲ្យដឹងថា នៅល្ងាច មុនពេលកើតហេតុរូបគេបានខ្ចីម៉ូតូរបស់មិត្តភក្កិ ម៉ាក់ស៊ុយស៊ូគីឡេតពណ៌សពាក់ស្លាកលេខភ្នំពេញ 1GB-0008 ទៅរកហូបអីរហូតដល់ម៉ោងកើតហេតុស្រាប់តែខ្លួនត្រឡប់មកផ្ទះវិញមកដល់មុខផ្ទះក៏ឈប់ម៉ូតូរួចក៏ចាក់សោទ្វាររបងដើម្បីយកម៉ូតូចូលទៅខាងក្នុងបន្ទប់ ស្របពេលនោះក៏មានជនសង្ស័យមួយក្រុមជិះម៉ូតូម៉ាកហុងដាឌ្រីមសង់មិនចាំស្លាកលេខចំនួន២ គ្រឿងមកពីក្រោយរួចក៏បានយកដែកគាស់និងមួកសុវត្ថិភាពមកវ៉ៃទៅលើជនរងគ្រោះធ្វើឱ្យជនរងគ្រោះរត់ស្រែកឲ្យគេជួយ ពេលនោះក្រុមជនសង្ស័យបានជិះម៉ូតូរបស់ជនរងគ្រោះគេចខ្លួនបាត់ស្រមោល​ ។

ពេលនោះជនរងគ្រោះបានរត់មកឡើងដល់ផ្លូវ២៧១ មុខមន្ទីពេទ្យមិត្តភាពខ្មែរសូវៀតហៅពេទ្យរុស្ស៊ីក៏បានប្រាប់ទៅអ្នកលក់ដូរនៅខាងមុខពេទ្យ និងរាយការណ៍ទៅសមត្ថកិច្ចភ្លាមៗនោះសមត្ថកិច្ចប៉ុស្តិ៍នគរបាលស្ទឹងមានជ័យទី២ ដែលនៅក្បែរកន្លែងហេតុការណ៍នេះបាននាំជនរងគ្រោះទៅដល់កន្លែងកើតហេតុរួចក៏បាននាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងទំពុន១ដើម្បីជួយចាប់ជនសង្ស័យមកផ្ដន្ទាទោសតាមច្បាប់៕ដោយ៖​ ភារ៉ា​ ដង្កោ