គួរឲ្យអាណិតណាស់ស្ត្រីម្នាក់ជិះម៉ូតូទៅទិញត្រីយកមកលក់ ស៊យអីត្រូវឆក់កាបូបលុយទៅបាត់ ខំជិះដេញតាមតែដេញមិនទាន់

    ភ្នំពេញ៖ ជនសង្ស័យ២នាក់បានជិះម៉ូតូស៊ុយសូគីនិច មួយគ្រឿងឌុបគ្នាមកធ្វើសកម្មភាពឆក់កាបូបលុយពីស្រ្តីម្នាក់​បានសម្រេច​ កាលពីវេលាម៉ោង០៦ និង០០នាទីព្រឹក ថ្ងៃទី២៤ ខែឧសភា ឆ្នាំ២០២០ នៅចំណុច ស្ថានីយ៍បូបទឹកបឹងទំពន់ តាមផ្លូវ៣៧១ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។

​ស្រ្តី រងគ្រោះមានឈ្មោះថា សេង សុភ័ណ្ឌ អាយុ៣២ឆ្នាំ មុខរបរលក់ត្រី ស្នាក់នៅសង្កាត់ដង្កោ ។

​    ស្រ្តីរងគ្រោះបានឲ្យដឹងថា មុនកើតហេតុ រូបគាត់បានជិះម៉ូតូចេញពីផ្ទះ ក្នុងគោលបំណងទៅផ្សារនៅម្តុំវត្តពោធិញាណ ដើម្បីទៅទិញត្រីយកមកលក់ ស្រាប់តែមកដល់កន្លែងកើតហេតុ លេចមុខជនសង្ស័យ២នាក់ជិះម៉ូតូ១គ្រឿងមកឆក់កាបូបក្រវ៉ាត់នៅចង្កេះគាត់បានសម្រេច ហើយគាត់បានព្យាយាមជិះម៉ូតូ វីវ៉ាពណ៌ខ្មៅ ពាក់ស្លាកលេខ ភ្នំពេញ1P-7022 ដេញតាមជនសង្ស័យ ពីកន្លែងកើតហេតុផ្លូវ៣៧១ រហូតមកដល់ច្រមុះក្បាលថ្នល់ ស្រាប់បាត់ជនសង្ស័យមិនដឹងទៅផ្លូវណា​ ដោយក្នុងកាបូប​ មានលុយខ្មែរ ៨០ម៉ឺនរៀល ទូរសព្ទ័OPPO ១គ្រឿង ខ្សែ«ក» ផ្លាកទីន ១ខ្សែ និងអត្តសញ្ញាណប័ណ្ណ ១សន្លឹកផងដែរ។

​   ភ្លាមនោះ សមត្ថកិច្ចបានធ្វើការសួរនាំទៅកាន់ ជនរងគ្រោះទើបដឹងពីមូលហេតុ ទើបជូនជនរងគ្រោះ ទៅដាក់ពាក្យបណ្តឹងនៅប៉ុស្តិ៍ ដើម្បីឲ្យសមត្ថកិច្ចធ្វើការស្រាវជ្រាវបន្ត៕​ ដោយ៖​ ភារ៉ា​ ដង្កោ