សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារសៀលថ្ងៃចន្ទទី៨ ខែមិថុនា ឆ្នាំ២០២០នេះ នៅទីស្តីការក្រសួងមហាផ្ទៃ បានបើកកិច្ចប្រជុំក្រុមការងាររៀបចំធ្វើសេចក្តីព្រាងច្បាប់វិសោធនកម្មច្បាប់ ស្តីពីអន្តោប្រវេសន៍នៃព្រះរាជាណាចក្រកម្ពុជា ក្រោមអធិបតីភាព លោក សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានក្រុមការងារ ដោយមានការចូលរួមពី រដ្ឋលេខាធិការ អនុរដ្ឋលេខាធិការ អគ្គលេខាធិការរង ប្រធាន អនុប្រធាន សមាជិក ក្រុមការងារ ព្រមទាំងមន្ត្រីពាក់ព័ន្ធផងដែរ។
លោកសន្តិបណ្ឌិត សុខ ផល បានមានប្រសាសន៍ថា៖ កិច្ចប្រជុំថ្ងៃនេះដើម្បីផ្លាស់ប្តូរគំនិតយោបល់ ព្រមទាំងប្រមូលផ្តុំគំនិត សម្រាប់រៀបចំរាយការណ៍ស្តីពីសេចក្តីព្រាងច្បាប់ វិសោធនកម្មច្បាប់លើការងារអន្តោសន៍ដែលក្រុមការងារបានព្រាង និងឆ្លងជាបន្តបន្ទាប់ជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីសុំគោលការណ៍ណែនាំ ដោយកិច្ចប្រជុំជាមួយសម្តេចក្រឡាហោម នឹងធ្វើឡើងនៅថ្ងៃទី១៦ ខែមិថុនា ឆ្នាំ២០២០ខាងមុខនេះ។
ក្នុងកិច្ចប្រជុំនេះផងដែរ លោក ប៊ុន ហុន ក៏បានមានប្រសាសន៍ឱ្យដឹងថា៖ បើយើងគិតអំពីការធ្វើច្បាប់យើងអាចរៀបចំធ្វើវិសោធនកម្ម ដើម្បីឱ្យវាមានប្រវត្តិថាច្បាប់នេះមិនមែនជាច្បាប់ដែលទើបធ្វើថ្មីនោះទេ គឺជាច្បាប់ធ្វើបន្តពីឆ្នាំ១៩៩៤។ ចំណុចដែលទាក់ទងទៅនឹងការធ្វើវិសោធនកម្មនេះផងដែរ លោកឯកភាពតាមលោក សន្តិបណ្ឌិត សុខ ផល រដ្ឋលេខាធិការ ក្រសួងមហាផ្ទៃ និងជាប្រធានក្រុមការងារថា យើងត្រូវសុំគោលការណ៍នូវចំណុចសំខាន់ៗពីសម្តេចក្រឡាហោមជាមុន។
ច្បាប់នេះបង្កើតឡើងក្នុងគោលបំណង ធានាការគ្រប់គ្រងជនបរទេសគ្រប់រូបនៅក្នុងព្រះរាជាណាចក្រកម្ពុជា និងដើម្បីកំណត់អំពីវិធាន និងលក្ខខណសម្រាប់អនុវត្តចំពោះជនបរទេសចេញចូល ឆ្លងកាត់ និងស្នាក់នៅក្នុងព្រះរាជាណាចក្រកម្ពុជា។ ជាមួយគ្នានេះ ច្បាប់នេះត្រូវអនុវត្តចំពោះជនបរទេសគ្រប់រូប លើកលែងតែក្នុងករណីដែលត្រូវអនុវត្តតាមវិធាននៃច្បាប់អន្តរជាតិ ដែលព្រះរាជាណាចក្រកម្ពុជា ជាភាគីហត្ថលេខី ទោះបីជាជននោះបានចូលមកតាំងលំនៅមុនពេលដែលច្បាប់នេះចូលជាធរមានហើយក៏ដោយ។ ច្បាប់នេះមានវិសាលភាពអនុវត្តចំពោះជនបរទេសគ្រប់រូបដែល ចូលចេញ ឆ្លងកាត់ និងស្នាក់នៅព្រះរាជាណាចក្រកម្ពុជា៕សហការី
