សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តនិងម៉ូតូបានពន្លះគ្នាបណ្ដាលឲ្យបុរសម្នាក់ស្លាប់ភ្លាមៗនៅនឹងកន្លែង រីឯនារីអ្នករួមដំណើររងរបួសធ្ងន់ហើយបានស្លាប់ពេលបញ្ជូនទៅសង្គ្រោះនៅមន្ទីរពេទ្យ។
ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង១១៖២៥នាទីយប់ ថ្ងៃទី៦ ខែកក្កដា ឆ្នាំ២០២០ ស្ថិតនៅតាមបណ្តោយផ្លូវជាតិលេខ១ ក្នុងភូមិស្វាយតាអុក ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
សមត្ថកិច្ចបានឲ្យដឹងថា បុរសដែលស្លាប់មានឈ្មោះ ថន ពិសី អាយុ ២៦ឆ្នាំរស់ នៅភូមិស្វាយតាអុក សង្កាត់វាលស្បូវ ខណ្ឌច្បារអំពៅ រាជធានីភ្នពេញ មុខរបរ នៅផ្ទះ។ រីឯស្ត្រីគេមិនទាន់ស្គាល់ឈ្មោះ និងអត្តសញ្ញាណនៅឡើយ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើកម៉ូតូម៉ាកហុងដាឌ្រីម សេ១២៥ ពាក់ស្លាកលេខ ភ្នំពេញ 1BV-1370 ឌុបនារីម្នាក់ធ្វើដំណើរតាមបណ្តោយផ្លូវជាតិលេខ១ក្នុងទិសដៅពីកើតទៅលិចយ៉ាងលឿន លុះជិះមកជិតដល់ចំណុចកើតហេតុ ក៏មានរថយន្តមួយគ្រឿងម៉ាក Ford Ranger ពណ៌ស ពាក់ស្លាកលេខភ្នំពេញ 2 BA-9816 ធ្វើដំណើរក្នុងទិសដៅពីលិចទៅកើតពេលមកដល់ចំណុចកើតហេតុស្រាប់តែម៉ូតូជ្រុលចូលទៅបុកចំពីមុខរថយន្តពេញទំហឹងបណ្តាលឲ្យស្លាប់បុរសម្នាក់ភ្លាមៗ រីឯស្ត្រីអ្នករួមដំណើរបានស្លាប់ពេលបញ្ជូនដល់មន្ទីរពេទ្យ។
ចំណែកម្ចាស់រថយន្តបានរត់គេចខ្លួនបាត់ស្រមោល បន្សល់ទុកតែ
រថយន្តនៅកន្លែងកើតហេតុ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ហើយបានទំនាក់ទំនងទៅខាងជំនាញចរាចរណ៍ផ្លូវគោកចុះមកវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ផ្លូវគោករង់ចាំការដោះស្រាយគ្នានៅពេលក្រោយ។
ចំណែកសពប្រគល់ជូនសាច់ញាតិយកទៅធ្វើបុណ្យតាមប្រពៃណី៕ ជ្រោយពេជ្រ
