សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បន្ទាប់ពីបានចាប់ផ្តើមដំណើរការបើកការដ្ឋានសាងសង់កាលពីឆ្នាំ២០១៧ និងដាក់ឲ្យដំណើរការសាកល្បងកាលពីថ្ងៃទី១៨ ខែតុលា ឆ្នាំ២០១៩ រួចមក ។ នៅថ្ងៃទី១៥ ខែកក្កដា ឆ្នាំ២០២០ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្កន៌ អមដំណើរដោយលោក លោកស្រី ជាថ្នាក់ដឹកនាំ និងមន្ត្រីជំនាញក្រោមឱវាទក្រសួង រួម និងតំណាងរដ្ឋាករទឹកស្វយ័តក្រុងភ្នំពេញ ដឹកនាំដោយលោក ស៊ឹម ស៊ីថា ជាអគ្គនាយក និងលោកស្រី Ophélie Bourhis ប្រធានទីភ្នាក់ងារបារាំង សម្រាប់ការអភិវឌ្ឍន៌ (AFD) ប្រចាំកម្ពុជា បានអញ្ជើញចុះពិនិត្យជាក់ស្តែងការដាក់ឲ្យដំណើរការសាកល្បង នៃគម្រោងពង្រីកសមត្ថភាពរោងចក្រប្រព្រឹត្តិកម្មទឹកស្អាតចំការមន ដែលមានទីតាំងស្ថិតនៅ សង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ ។
សូមបញ្ជាក់ថា៖ គម្រោងសាងសង់ពង្រីកសមត្ថភាពរោងចក្រប្រព្រឹត្តិកម្មទឹកស្អាតចំការមន គឺជាគម្រោងដែលបានកំណត់ក្នុងផែនការមេទី៣ របស់អង្គភាពរដ្ឋាករទឹកស្វយ័តក្រុងភ្នំពេញ ក្រោមគម្រោងហិរញ្ញប្បទានរួមគ្នា ជាមួយទីភ្នាក់ងារបារាំងសម្រាប់ការអភិវឌ្ឍន៌ (AFD) និងថវិកាបដិភាគ ដោយអង្គភាពរដ្ឋាករទឹកស្វយ័តក្រុងភ្នំពេញ មានទំហំទឹកប្រាក់ចំនួន ជាង១៥ លានដុល្លារសហរដ្ឋអាមេរិក និង ជិត ០៨ លានអឺរ៉ូ ។ គម្រោងនេះ បានចុះហត្ថលេខាជាផ្លូវការ នៅថ្ងៃទី០៨ ខែ សីហា ឆ្នាំ២០១៨ ដោយក្រុមហ៊ុន វ៉ាំង ស៊ី ជាអ្នកទទួលខុសត្រូវក្នុងការសាងសង់ និងស្ថិតក្រោមការត្រួតពិនិត្យដោយទីប្រឹក្សាបច្ចេកទេសក្រុមហ៊ុន សាហ្វេរ ។ គម្រោងនេះ បានចាប់ផ្តើមបើកការដ្ឋានពង្រីកសមត្ថភាព អាងប្រព្រឹត្តិកម្មរបស់ខ្លួននាថ្ងៃទី១៨ ខែ តុលា ឆ្នាំ២០១៧ និងបានដាក់ឲ្យដំណើរការសាកល្បងកាលពីថ្ងៃទី១៨ ខែតុលា ឆ្នាំ២០១៩ កន្លងមក។
គម្រោងនេះរួមបញ្ចូលក្នុងការសាងសង់នូវហេដ្ឋារចនាសម្ព័ន្ធទាំងមូល រួមទាំងបណ្តាញមេនាំទឹកល្អក់ ដែលមានសមត្ថភាពបូមទឹកល្អក់ពីទន្លេបាសាក់បានចំនួន៥៧.០០០ ម៉ែត្រត្រីគុណ ក្នុងមួយថ្ងៃ និងនាំទឹកស្អាតនៃរោងចក្រប្រព្រឹត្តិកម្មទឹកស្អាតចំការមននេះ ក្នុងសមត្ថភាពផលិតចំនួន៥២.០០០ ម៉ែត្រត្រីគុណ ក្នុងមួយថ្ងៃ ។
ក្នុងដំណើចុះពិនិត្យស្វែងយល់នោះ លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះសមិទ្ធិផលនៃការពង្រីកសមត្ថភាពរោងចក្រប្រព្រឹត្តិកម្មទឹកស្អាតចំការមនប្រកបដោយជោគជ័យ ដែលនេះជាផ្នែកមួយដ៏សំខាន់បន្ថែមទៀត ក្នុងការផ្គត់ផ្គង់ទឹកស្អាតបំរើទាំងនៅក្នុងរាជធានីភ្នំពេញ និងនៅតាមជាយក្រុងជាពិសេស ក្នុងខ័ណ្ឌចំការមនតែម្តង ដែលកំពុងមានការរីកដុះដាលយ៉ាងព្រោងព្រាតនូវសំណង់អគារ ធំៗ ខ្ពស់ៗ ហើយនៅពេលខាងមុខឆាប់ៗនេះរោងចក្រប្រព្រឹត្តិកម្មទឹកស្អាតចំការមននេះនឹងអាចត្រូវសម្ពោធ ដាក់ឲ្យប្រើប្រាស់ជាផ្លូវការតែម្តង។
គួរបញ្ជាក់ថា៖ សមត្ថភាពរោងចក្រប្រព្រឹត្តិកម្មផលិតទឹកស្អាតបច្ចុប្បន្នរបស់រដ្ឋាករទឹកស្វយ័តក្រុងភ្នំពេញ សរុបមានចំនួន៦៣២.០០០ ម៉ែត្រត្រីគុណ គឺ៖ស្ថានីយ៌ភូមិព្រែក មានសមត្ថភាពផលិតបាន១៧ ម៉ឺនម៉ែត្រត្រីគុណក្នុងមួយថ្ងៃ-ស្ថានីយ៌ជ្រោយចង្វារ មានសមត្ថភាពផលិត ១៥ម៉ឺនម៉ែត្រត្រីគុណក្នុងមួយថ្ងៃ-ស្ថានីយ៌និរោធមានសមត្ថភាពផលិតបាន ២៦ម៉ឺនម៉ែត្រត្រីគុណក្នុងមួយថ្ងៃ និងស្ថានីយ៌រោងចក្រចំការមននេះ មានសមត្ថភាពផលិតបាន ៥ម៉ឺន ២ពាន់ម៉ឺនម៉ែត្រត្រីគុណក្នុងមួយថ្ងៃ ។
ជាទស្សនៈវិស័យរបស់លោកកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ គឺរដ្ឋាករទឹកស្វយ័តក្រុងភ្នំពេញត្រូវខិតខំបន្ថែមទៀត ក្នុងការពង្រីកសមត្ថភាពផលិតរបស់ខ្លួន ដើម្បីបំពេញតម្រូវការ ស្របពេលដែលរាជធានីភ្នំពេញបច្ចុប្បន្នត្រូវបានពង្រីកផ្ទៃក្រឡារបស់ខ្លួនកាន់តែធំឡើងៗជាលំដាប់ អោយតម្រូវការប្រើប្រាស់ទឹកស្អាតរបស់បងប្អូនប្រពលរដ្ធក៏កាន់តែមានតម្រូវការប្រើប្រាស់ខ្ពស់ផងដែរ ។ ដោយឡែកការពង្រីកទុន និងការទាក់ទាញវិនិយោគ ការស្វែងរកប្រភពជំនួយ និងដៃគូអភិវឌ្ឍន៌គឺជាការងារចាំបាច់ ដើម្បីដោះស្រាយការផ្គត់ផ្គង់ទឹកស្អាតឲ្យដល់ទីប្រជុំជន និងឈានដល់តំបន់ជនបទ តាមចក្ខុវិស័យរបស់រាជរដ្ឋាភិបាល ដែលមាន សម្តេចតេជោនាយករដ្ឋមន្ត្រី ជាប្រមុខ ដែលចង់ឲ្យប្រជាពលរដ្ឋទទួលបានទឹកស្អាតប្រើប្រាស់ ជៀសផុតបាននូវជម្ងឺដង្កាត់ផ្សេងៗ ដោយសាការប្រើប្រាស់ទឹកមិនស្អាត ក្នុងន័យនេះ រាជរដ្ធាភិបាលក៏ដូចជាក្រសួងបានតាំងចិត្តយ៉ាងមុតមាំហើយថា និងខិតខំគៀងគរ រកអ្នកវិនិយោគទាំងក្នុងនិងក្រៅប្រទេស លើវិស័យទឹកស្អានេះ ដោយធ្វើយ៉ាងណាគិតត្រឹមឆ្នាំ២០២៥ទីប្រជុំជនទាំងអស់នឹងមានទឹកស្អាតប្រើប្រាស់គ្រប់គ្រាន់ ហើយគិតរហូតដល់ឆ្នាំ២០៣០_០៥០បងប្អូនប្រជាពលរដ្ធនៅទូទាំងប្រទេសនឹងមានទឹកស្អាតប្រើប្រាស់១០០%តែម្តង៕សហការី
