សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រដ្ឋលេខាធិការក្រសួងពាណិជ្ជកម្មលោក សុខ សុភ័ក្ដ្រ បានគូសបញ្ជាក់ថា ប្រសិនបើកិច្ចព្រមព្រៀងពាណិជ្ជកម្មសេរីកម្ពុជា–ចិន បានចូលជាធរមាននោះ ការនាំទំនិញចេញរបស់កម្ពុជា ទៅកាន់ប្រទេសចិន នឹងកើនឡើងប្រមាណ២៥ភាគរយបន្ថែមទៀត ខណៈឆ្នាំ២០១៩កន្លងទៅកម្ពុជានាំទំនិញទៅប្រទេសចិន បានឡើងរហូតដល់១ពាន់លានដុល្លារហើយទំនិញនាំចូលពីប្រទេសចិនមកវិញ ប្រមាណជិត៧ពាន់លានដុល្លារ។
ក្នុងសន្និសីទសារព័ត៌មាន ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី២៨ ខែកក្កដា ឆ្នាំ២០២០នេះ ស្ដីពី «លទ្ធផលបញ្ចប់ នៃកិច្ចចរចាបង្កើតកិច្ចព្រមព្រៀងពាណិជ្ជកម្មសេរីកម្ពុជា–ចិន» នាទីស្តីការគណៈរដ្ឋមន្រ្តី ឯកឧត្តម សុខ សុភ័ក្ដ្រ បានលើកឡើងថា កិច្ចព្រមព្រៀងនេះមិនមែនទើបសិក្សា និងរៀបចំក្រោយមានការប្រកាសដកEBA របស់សហគមន៍អឺរ៉ុបនោះទេ គឺកម្ពុជាបានសិក្សារាប់សិបឆ្នាំមកហើយជាមួយភាគីចិន ដើម្បីផ្ដល់ផលប្រយោជន៍ជូនប្រទេសទាំងពីរ។ ឯកឧត្តមរដ្ឋលេខាធិការ បន្តថា ទំនិញដែលកម្ពុជានាំចូលពីប្រទេសចិន ភាគច្រើនសុទ្ធតែជាប្រភេទគ្រឿងចក្រ និងទំនិញផ្សេងទៀត ដែលបម្រើឱ្យវិស័យសំណង់ជាដើម។
គួរបញ្ជាក់ថា កិច្ចព្រមព្រៀងពាណិជ្ជកម្មសេរីកម្ពុជា–ចិន បានបញ្ចប់ការសិក្សា រួចរាល់ហើយ ដែលត្រៀមនឹងចុះហត្ថលេខាជាផ្លូវការនៅអំឡុងខែសីហា ឆ្នាំ២០២០នេះ។ ទន្ទឹមនេះ បន្ទាប់ពីចុះហត្ថលេខារួច ភាគីទាំងពីរមានគម្រោងដាក់ឱ្យអនុវត្តន៍ចាប់ពីខែមករា ឆ្នាំ២០២១តទៅ។កិច្ចព្រមព្រៀងពាណិជ្ជកម្មសេរី ហៅថា(FTA) គឺជាការកិច្ចព្រមព្រៀងលើកលែងរបាំងពន្ធអាករទៅវិញទៅមករវាងប្រទេស និងប្រទេសដែលចុះហត្ថលេខាលើកិច្ចព្រមព្រៀង។ កិច្ចព្រមព្រៀងនេះ នឹងសម្រួលជាមួយរបាំងពន្ធអាករការកំណត់ចំនួនទំនិញ ដែលគេអាចយល់បានថា ជាការធ្វើសេដ្ឋកិច្ចបែបផែនទីផ្សារសេរី ឬក្នុងអត្ថន័យរួម បញ្ចូលសេដ្ឋកិច្ចតែមួយ៕ដោយ៖ស តារា
