ធនាគារពិភពលោកផ្តល់ជំនួយឥតសំណងជាង ៦លានដុល្លារអាមេរិក ទៅឲ្យវៀតណាមទប់ទល់នឹងវីរុសកូវីដ-១៩ ក្រោយផ្ទុះឡើងសារជាថ្មី

អន្តរជាតិ៖ ដើម្បីពង្រឹងសមត្ថភាពតាមដាន និងតេស្តវីរុស Covid-19 ក្នុងសមត្ថភាពស្រាវជ្រាវសម្រាប់វ៉ាក់សាំងការពារ និងឧបករណ៍ធ្វើតេស្តិ៍ ក្នុងការទំនាក់ទំនងអំពីការរាតត្បាតក្រោយផ្ទុះឡើងខ្លាំងក្នុងទីក្រុងដាណាង ។ ភ្លាមៗនោះធនាគារពិភពលោក និងធនាគាររដ្ឋវៀតណាមកាលពីថ្ងៃទី ៣០ខែកក្កដាម្សិលមិញនេះ បានចុះហត្ថលេខាលើកិច្ចព្រមព្រៀងជំនួយឥតសំណងដែលមានទឹកប្រាក់ចំនួន ៦.២ លានដុល្លារ ។

លោក Stefanie Stallmeister នាយកស្តីទីប្រចាំធនាគារពិភពលោកប្រចាំនៅប្រទេសវៀតណាមមានប្រសាសន៍ថា ស្ថានភាពនៃការរាតត្បាតនៃវីរុស Covid-19 នៅក្នុងប្រទេសវៀតណាមកំពុងវិវឌ្ឍន៍យ៉ាងឆាប់រហ័ស។ប្រតិបត្តិការបន្ទាន់នេះនឹងមិនត្រឹមតែគាំទ្រដល់រដ្ឋាភិបាលក្នុងការឃ្លាំមើលនិងឆ្លើយតបភ្លាមៗទៅនឹងវីរុសប៉ុណ្ណោះទេ ប៉ុន្តែថែមទាំងបានចូលរួមចំណែកក្នុងការកសាងប្រព័ន្ធសុខភាពដែលអាចទ្រទ្រង់បាននាពេលអនាគតផងដែរ។

ជំនួយនេះក៏នឹងផ្តល់ថវិកាដល់ការផ្គត់ផ្គង់ឧបករណ៍ដើម្បីពង្រឹងសមត្ថភាពមជ្ឈមណ្ឌលស្រាវជ្រាវ និងផលិតវ៉ាក់សាំង និងជីវសាស្រ្ត(POLYVAC) សម្រាប់ការស្រាវជ្រាវនិងអភិវឌ្ឍវ៉ាក់សាំងថ្មី និងការធ្វើរោគវិនិច្ឆ័យរហ័ស។លើសពីនេះទៅទៀតគម្រោងនេះនឹងពង្រឹងសមត្ថភាពនៃប្រព័ន្ធមន្ទីរពិសោធន៍នៅវិទ្យាស្ថានជាតិអនាម័យ និងរោគរាតត្បាត (NIHE) និងប្រព័ន្ធមន្ទីរពិសោធន៍ផ្សេងៗទៀតនៅទូទាំងប្រទេស ដោយជួយបង្កើនសមត្ថភាព វាយតម្លៃភាពស៊ាំរបស់សហគមន៍ទៅនឹងវីរុស Covid-19។

គួរបញ្ជាក់ថា គម្រោងនេះត្រូវបានគេរំពឹងថានឹងគាំទ្រមន្ទីរពិសោធន៍ចំនួន២០០ ដែលពាក់ព័ន្ធនឹងការឃ្លាំមើល និងការធ្វើតេស្ត៍ពិនិត្យតាមដាន និងពិនិត្យសុខភាពនៅក្នុងមន្ទីរពេទ្យ រួទាំងមជ្ឈមណ្ឌលត្រួតពិនិត្យជំងឺនៅទូទាំងប្រទេស និងខេត្ត។ គាំទ្រដល់ក្រុមហ៊ុន NIHE និងPOLYVAC ដែលជាស្ថាប័នស្រាវជ្រាវ និងផលិតសុខភាពសាធារណៈនិងវ៉ាក់សាំងឈានមុខគេរបស់ប្រទេសវៀតណាម ដោយនឹងចូលរួមចំណែកដោយផ្ទាល់ក្នុងការលើកកម្ពស់សមត្ថភាពរបស់ប្រទេសក្នុងការស្វែងរក និងឆ្លើយតបទៅនឹងវីរុសនេះ៕ដោយ៖ស តារា