សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍របស់ក្រសួងទេសចរណ៍ នៅថ្ងៃទី១៧ខែសីហាម្សិលមិញនេះ បានបញ្ជាក់ថា សម្រាប់ថ្ងៃឈប់សម្រាកដំបូងជំនួសឲ្យពិធីចូលឆ្នាំថ្មីនោះ មានភ្ញៀវទេសចរនិងពលរដ្ឋខ្មែរ ជាង២៣ម៉ឺននាក់បានទៅលេងកម្សាន្តនៅតាមបណ្តាខេត្ត ។ ក្នុងនោះ ភ្ញៀវទេសចរជាង៣ម៉ឺនទៅកាន់ខេត្តកំពត , ជាង២៨ ០០០នាក់ទៅសៀមរាប ចំណែកខេត្តព្រះសីហនុ និងកែប ដែលមានជាង១៨ ០០០នាក់រៀងៗខ្លួន។
របាយការណ៍ក្រសួងទេសចរបន្តថា បន្ទាប់ពីខេត្តកំពត សៀមរាប ព្រះសីហនុនិងកែប ខេត្តដទៃទៀតដែលទទួលបានភ្ញៀវទេសចរ ទៅកម្សាន្តដ៏គួរឲ្យកត់សម្គាល់នោះ មានដូចជា ខេត្តបាត់ដំបង និងរាជធានីមានភ្ញៀវទេសចរជាង១ ៤០០០នាក់ដូចគ្នា,ខេត្តព្រះវិហារមានជាង១ម៉ឺននាក់ខេត្តមណ្ឌលគិរីមានជិត៩ពាន់នាក់ និងខេត្តរតនគិរីមានជាង៨ពាន់នាក់។
ក្រសួងទេសចរណ៍ បានគូសបញ្ជាក់ទៀតថា ជាក់ស្តែងយើងសង្កេតឃើញនៅតាមតំបន់នីមួយៗគឺមានការយកចិត្តទុកដាក់លើការស្កេនកម្តៅ បាញ់អាល់កុល កត់ឈ្មោះភ្ញៀវ និងការជំរុញឲ្យភ្ញៀវទេសចរពាក់ម៉ាស់ ឬក្រមាឲ្យបានជាប់ជាប្រចាំ ហើយរមណីយដ្ឋានខ្លះដែលជារមណីយដ្ឋានសំខាន់ក្នុងខេត្តបានដាក់រថយន្តពេទ្យប្រចាំការ ដើម្បីត្រៀមជួយសង្គ្រោះជាយថាហេតុ។
ប៉ុន្តែអ្វីដែលកត់សម្គាល់នោះ គឺពលរដ្ឋដែលកម្សាន្តលេងនៅតាមតំបន់ទេសចរណ៍ទាំងនោះគឺមានការយល់ដឹងពីអំពីការពារតាមគោលការណ៍របស់ក្រសួងសុខាភិបាល។
ទោះបីជាយ៉ាងណាក៏ដោយ ការរក្សាគម្លាតសុវត្ថិភាពនៅមិនទាន់អនុវត្តបានពេញលេញនៅឡើយទេ ជាពិសេសការអង្គុយទទួលទានអាហារជុំគ្នាច្រើនជាក្រុម ក្រុមគ្រួសារ ហើយរមណីយដ្ឋានខ្លះមានសភាពហួសចំណុះផ្ទុកធម្មតាដោយសារភ្ញៀវទេសចរមកលេងច្រើនក្នុងពេលតែមួយ។ នេះបើតាមការបញ្ជាក់របស់ក្រសួងទេសចរណ៍ដែលពង្រឹងការណែនាំឲ្យម្ចាស់រមណីយដ្ឋាននីមួយៗពង្រឹងការអនុវត្តតាមគោលការណ៍របស់ក្រសួងសុខាភិបាល៕ដោយ៖សហការី
